Мұнай

Жақында өткен жоспарлы-алдын алу жұмыстары кезінде Атырау мұнай өңдеу зауытының ЭЛОУ АТ-2 технологиялық қондырғысының пештерінде ескірген 36 дана жанарғы ауыстырылды.

Іс-шара «Қазмұнайгаз» АҚ ҰҚ-ның 2022 – 2031 жылдарға арналған төмен көміртекті даму Бағдарламасына сәйкес пештерді техникалық қайта жарақтандыру жобасы аясында іске асырылды.

Тұтану жүйесімен және жалынды өшіру датчиктерімен жабдықталған жаңа жанарғыларды итальяндық International Compbustion Equipment S.r.l компаниясы АМӨЗ-дің тапсырысымен дайындады.

Жанарғыларды жаңартудан бөлек құрылыс-монтаждау жұмыстары аясында шығын өлшегіштерді ауыстыру, электрмен басқарылатын сұқпажапқыштарды орнату, газ тазарту сүзгілерін, қосымша клапандар, түтін газдарындағы оттегі құрамын талдағыштар, түтін сорғыштардың қозғалтқыштарындағы жиілікті реттегіштерді монтаждау жұмыстары жасалды.

ЭЛОУ АТ-2 қондырғысының операторлары жаңа жанарғыларды іске қосу және пайдалану негіздері бойынша теориялық дайындықтан өтті, ал қондырғыны іске қосу кезінде оларға құрылғыны тұтандыру бойынша қосымша дәріс берілді. Сондай-ақ операторларға жанарғыны пайдалану кезінде орын алуы мүмкін ауытқулар және тәуекелдерді мейлінше азайту үшін қажетті шаралар туралы айтылды.

«АМӨЗ» ЖШС-нің энерготиімділік жөніндегі бас маманы Сергей Шумиловтың айтуынша, пештерді техникалық қайта жарақтандыру жобасын жүзеге асырудың нәтижесінде тиімді жану есебінен пештерде отын шығынын төмендетуге, түтін газдарымен бірге атмосфераға шығарылатын ластаушы заттардың көлемін азайтуға және пештердің түтін сорғыштарында электр энергиясын үнемдеуге болады.

Қазіргі кезде жобаның энергия тиімділігін растау және бағалау мақсатында тәжірибелік-өнеркәсіптік сынақ жүргізілуде.

Kazenergy қауымдастығының ұйымдастыруымен мұнай-газ секторындағы экология саласындағы мәселелерге арналған дөңгелек үстел өтті, - деп хабарлайды Өңірлік коммуникациялар қызметі.

Оған ҚР Экология және табиғи ресурстар вице-министрі Жомарт Әлиев және министрліктің экологиялық реттеу және бақылау комитетінің басшылары мен мамандары, сондай-ақ қауымдастыққа мүше мұнай-газ өндіру және өңдеу кәсіпорындарының өкілдері қатысты.

Олар  компанияның негізгі экологиялық нысандарына, Теңіз ЭкоОрталығына, сондай-ақ суды қайта өңдеу және кәріз-тазарту ғимараттарына барды. 

-    Сапарымыздың негізгі мақсаты – мұнай-газ секторындағы ірі компаниялардың өндірістік қызметімен, сондай-ақ жаңа техникалық шешімдерді енгізу қарқынымен , қоршаған ортаны қорғау іс-шараларын іске асыру деңгейімен танысу және тәжірибе алмасу. Экологиялық бағытта көптеген жұмыс атқарылып жатқанын, әрі біз барған компаниялар бұл мәселеге немкетті қарап отырмағанын атап өткім келеді, -  деді Ж.Әлиев. 

«Теңізшевройл» компаниясының бас директоры Кевин Лайонның айтуынша,  кәсіпорын 2000 жылмен салыстырғанда атмосфераға жіберетін  шығарындылардың қарқындылығын 76%-ға төмендетті, бұл компания тарихындағы ең төменгі деңгей.

-    ТШО адам денсаулығы мен қоршаған ортаны қорғауға басымдық бере отырып, Қазақстанның стратегияларын қолдауда өз рөлін атқарады. Біз ҚР Экологиялық кодексін іске асыруда қолдау көрсету үшін экология және табиғи ресурстар министрлігімен ынтымақтасуға дайынбыз. ТШО-ның экологиялық қағидаттары мен құндылықтарын ұстана отырып, біз келесі буын үшін тұрақты болашақ пен одан әрі экономикалық прогресс құру бойынша ортақ күш-жігерге өз үлесімізді қосамыз деп үміттенеміз, - деді К.Лайон. 

Айта кетейік, Теңізде қалдықтарды басқарудың тиімді әдістерінің арқасында пайда болған қалдықтардың 51%-ы қайта өңделіп, пайдаланылады. Суды қайта пайдалану коэффициенті де саладағы ең жақсы көрсеткіштердің бірі болып есептеледі. 2024 жылдың үшінші тоқсанында судың 47% қайта пайдаланылған.

Облыс әкімінің орынбасары Марат Мурзиев жапондық ITO компаниясының өкілдерімен кездесті, - деп хабарлайды Өңірлік коммуникациялар қызметі. 

Кәсіпорын  газбен жабдықтауға қажетті құрылғыларды шығарумен айналысады. 

- Біздің кәсіпорын 90 жыл бұрын Жапонияның Осака қаласында құрылған. Бастапқыда  сұйытылған газ реттегіштерін шығарып, кейін табиғи газ нарығына шықты. Негізінен қысым реттегіштерді, клапандарды, буландырғыштарды, табиғи газ баллондарын жасап, сұйытылған газбен жабдықтау объектілерін жобалап, саламыз. Жапонияда 2020 жылы сатылым 120 млн. АҚШ долларын құрады,- деді ITO компаниясының өкілі. 

Облыс әкімінің орынбасары аталған ұсынысқа қызығушылық білдіре отырып, өңірді дамытуға бағытталған инвестициялық жобаларды қолдауға дайын екенін айтты.

Осы жылдың тамыз айында ҚР Президенті Қасым-Жомарт Тоқаев пен Жапон Премьер-Министрі Фумио Кисида кездескен еді. Соның аясында  Атырау облысынің  әкімдігі мен ITO Corporation  компаниясы арасында ынтымақтастық туралы меморандумға қол қойылды. 

Айта кетейік, биыл қаңтар-қыркүйек айларында Атырау облысы мен Жапония елі арасындағы тауар айналым - 19,1 млн.АҚШ долларын құрады. Тауар айналымының басым бөлігі импортқа тиесілі. Қазіргі таңда облыста жапондық 2 кәсіпорын жұмыс істейді.

Атырау мұнай өңдеу зауытына жұмыс сапарымен ҚР Экология және табиғи ресурстар вице-министрі Жомарт Әлиев келді. Делегация құрамында ЭТРМ Экологиялық реттеу және бақылау комитетінің төрағасы Ерболат Қожықов және орынбасары Әлібек Бекмұхамбетов, Атырау облыстық экология департаменті басшысының м.а. Ерлан Есенов, мемлекеттік экологиялық бақылау басқармасы, экология департаменті, сондай-ақ KAZENERGY ассоциациясы мен «ҚазМұнайГаз» АҚ ҰҚ өкілдері болды. 

Кездесу барысында өндірістік процестің қоршаған ортаға әсерін азайту мақсатында «АМӨЗ» ЖШС іске асырып жатқан жобалардың жайы талқыланды. Зауыт мамандары қонақтарға жаңа механикалық тазарту қондырғылары мен ағынды суларды биологиялық тазарту жүйесінің жұмысы туралы айтты. 2024 жылдың мамыр айында механикалық тазарту кешенін реконструкциялау жобасы аяқталған болатын. Нәтижесінде көмірсутектер иісінің ашық көздері жойылды, тазарту жүйесінің қуаты мен мұнай шламдарын өңдеу көлемі артып, ағынды суларды тазарту сапасы жақсарды.

Кездесуде қоршаған ортаға шығарылатын эмиссияларды мониторингілеудің автоматтандырылған жүйесін (МАЖ) енгізу мәселесіне ерекше назар аударылды. Делегация катализатордың үздіксіз регенерациясы бар каталитикалық риформинг қондырғысы мен жылу және электр энергиясы өндірісінің түтін мұржаларында орнатылған мониторинг жүйесінің жұмысымен танысты. АМӨЗ мамандары МАЖ көмегімен тек шығарындылар көлемін бақылап қана қоймай, қажет болған жағдайда технологиялық көрсеткіштерді жақсарту үшін режимді ретке келтіретіндерін атап өтті. 

«АМӨЗ» ЖШС бас директоры Ғалымжан Жусанбаев қазіргі таңда кәсіпорынның штаттық режимде жұмыс істеп тұрғанын, тауарлық өнім шығару және жөнелту процесі тұрақты жүргізіліп жатқанын жеткізді. 

Кездесу соңында Жомарт Әлиев өңірдегі экологиялық жағдайды жақсартудың маңыздылығын айтып, кәсіпорын басшылығына тиісті жобаларды жүзеге асыру жұмыстарын күшейтуді тапсырды.

«Атырау мұнай өңдеу зауыты» ЖШС-де жоспарлы-алдын алу жұмыстары бекітілген кестеге сай жүргізілуде. Бүгінде жабдықтарды тазалау, пештер мен реакторларды қаптау, тозған жабдықтар мен катализаторларды ауыстыру, колонна жабдығының ішкі құрылғыларын модификациялау және т.б. жұмыстар атқарылып жатыр. Қысыммен жұмыс істейтін құралдарды тексеру мен қадағалау жөніндегі іс-шаралар жалғасуда.

Бұдан бұрын жиналған қор есебінен жоспарлы-алдын алу жұмыстары кезінде ҚР Энергетика министрлігінің кестесіне сәйкес бензин, дизель отыны, сұйытылған газ, авиаотын және басқа да мұнай өнімдері тұрақты әрі жүйелі жөнелтіліп жатыр. 

Бүгінгі таңда зауыт резервуары паркінде мұнай өнімдері қорының көлемі мынадай: 

  автобензин — 10,9 мың тонна; 
  дизель отыны — 4,1 мың тонна; 
  авиаотын — 2,4 мың тонна; 
  сұйытылған газ — 100 тонна. 

Қазіргі кезде Атырау мұнай өңдеу зауыты күніне орта есеппен 1,1 мың тонна автобензин, 1,2 мың тонна дизель отынын жөнелтіп отыр. Батыс Қазақстан облысының мұнай базаларында 2024 жылдың 16 қазандағы жағдай бойынша АИ-92 маркалы бензиннің 2,7 мың тоннасы сақталуда. Жолда шамамен 1,29 мың тонна өнім бар. АИ-92 жалпы көлемін (мұнай базасында+жолда) ескерсек, өңірде барлығы 3,98 мың тонна бензин бар, бұл шамамен екі апталық қорға тең.

Сондай-ақ ішкі нарықта тұрақты жағдайды сақтап тұру үшін ҚМГ-ның басқа мұнай өңдеу зауыттарында жанар-жағармай материалдарының жекелеген түрлерін өндіру көлемі ұлғайтылды. Атап айтқанда, «Павлодар мұнай-химия зауыты» ЖШС-нен және «ПҚОП» ЖШС-нен (Шымкент МӨЗ-і) күніне орта есеппен автобензин — 4,2 мың және 7,4 мың тоннадан, дизель отыны — 7 мың және 5,5 мың тоннадан жөнелтіледі.

Бұған дейін хабарланғандай, Атырау мұнай өңдеу зауытында жоспарлы-алдын алу жұмыстары 2024 жылдың қазан айының соңында дейін аяқталып, кәсіпорын тұрақты технологиялық режимге шығады деп жоспарланып отыр.

1 қазанда Атырау мұнай өңдеу зауытында жоспарлы-алдын алу жұмыстары басталды. Іс-шара өнеркәсіптік қауіпсіздікті қамтамасыз ету саласындағы заңнама талаптарына және ҚР Энергетика министрлігі бекіткен кестеге сәйкес іске асырылуда. Жоспарлы жұмыстарды жүйелі түрде жүргізу технологиялық қондырғылардың қауіпсіз қызметі мен жабдықтардың тұрақты жұмысын қамтамасыз етіп, өндіріс тиімділігін арттыру үшін қажет. Жоспарлы-алдын алу жұмыстары кезінде АМӨЗ-де технологиялық жабдықтар мен құбырлардың өнеркәсіптік қауіпсіздігін техникалық куәландыру, тексеру және сараптамадан өткізу секілді іс-шаралар кешені жоспарланған.

Сонымен қатар реакторлық жабдықтардағы катализаторлар ауыстырылады. Зиянды заттардың атмосфераға шығарылуын болдырмау мақсатында технологиялық жабдықтарды тазалау процесі жабық жүйеде өтеді. Жоспарлы-алдын алу жұмыстарына 2 мыңнан астам жұмысшы мен 70 арнайы техника жұмылдырылмақ. Жұмыстар кезінде мұнай өнімдерінің негізгі түрлері жинақталған қор есебінен ҚР Энергетика министрлігімен келісілген жоспарға сәйкес жөнелтіледі.

Қазіргі кезде зауыттың резервуар паркінде келесідегідей қор көлемі жинақталған: автобензиндер - 30 мың тонна; дизель отыны - 15 мың тонна; әуе отыны - 6,5 мың тонна; сұйытылған газ - 500 тонна. Қазан айының соңына дейін жоспарлы-алдын алу жұмыстары аяқталып, кәсіпорын тұрақты жұмыс режиміне шығады деп жоспарланған.

Өткен жұмада Атырауда “PetroMaintenance 2024” мұнай-газ саласына техникалық қызмет көрсету бойынша форум өтті. Форумда «Теңізшевройл» (ТШО) компаниясы іс-шараға қатысушылармен осы бағыттағы техникалық қызмет көрсетуді жүргізу және қазақстандық қамтуды дамыту тәжірибесімен бөлісті.
Форумда ТШО-ның өндіріс жөніндегі бас менеджері Стивен Коннер сөз сөйледі. Оның айтуынша, ТШО қазақстандық қызметкерлердің дамуына белсенді түрде инвестиция салуда. 2007 жылдан бері 460-тан астам ұлттық қызметкер негізгі басшылық және техникалық позициялардағы шетелдік мамандарды алмастырды. Сондай-ақ, Стивен Коннер соңғы 31 жылда ТШО-ның қазақстандық қамтушылардан 48,4 миллиард АҚШ долларына тауарлар мен қызметтер сатып алғанын атап өтті. Ал, 2023 жылы компанияның сатып алуларының 70%-ы жергілікті компаниялардың үлесіне тиді, бұл 1993 жылғы 11% көрсеткіштен едәуір жоғары.

"Біз шағын, орта және ірі жеке бизнестің нарықтық экономиканың негізі екендігін мойындаймыз. Сондықтан да, осы бизнесті қолдау, технологияларды беру және жергілікті әлеуетті барынша пайдалану бойынша шараларды белсенді түрде енгізудеміз ", - деп атап өтті Стивен Коннер.

Ол ТШО-ның болашақ тауарларды сатып алудағы қазақстандық қамтуды  жоспарлаудан бастап, өндірісті оқшаулау, қызметкерлерді оқыту мен отандық тауарларды сатып алуды тұрақты мониторингтеу бойынша жаңа қамтушылардың  міндеттемелерінен бастап, кешенді тәсілді қамтитын өндірісті оқшаулауды ілгерілету жүйесін енгізгенін жеткізді. Стивен Коннер ТШО-ның Қазақстан экономикасына қосқан үлесі туралы да баяндады. Ол компанияның 1993 жылдан бастап 2024 жылдың бірінші жарты жылдығына дейін Қазақстан Республикасына 196 миллиард АҚШ долларынан астам сомаға тікелей қаржылық төлемдерді аударғанын атап өтті.

Сонымен қатар, ол Қазақстан Республикасы Қаржы министрлігінің ТШО-ны үш жыл қатарынан елдегі үздік салық төлеушісі деп танығанын еске салды. Сондай-ақ, форумда ТШО-ның техникалық қызмет көрсету бөлімінің басшысы Джеррод Хант сөз сөйлеп, кадрларды ұлттандыру мен жергілікті мердігерлермен ынтымақтастықтың маңыздылығын атап өтті. Ол қазіргі уақытта техникалық қызмет көрсету бөлімі қызметкерлерінің 95% -дан астамы Қазақстан азаматтары екенін айтты. «Біз қазақстандық мамандарды жоғарылатқан сайын оңды өзгерістерді байқадық. Олар талантты, және де біздің басшылық оларды мақтан тұтады», — деді Джеррод Хант.

Форум ТШО үшін Қазақстанның мұнай-газ секторындағы басты ойыншы ретіндегі рөлін нығайта отырып, қазақстандық қамтуды дамытуға және сала бойынша өзінің адалдығын растау, әрі сала әріптестерімен табысты стратегиялармен бөлісу мақсатында жақсы платформа болды.