Өңірдегі денсаулық сақтау ұйымдарының инфраструктурасын дамыту мақсатында қарқынды жұмыстар жүруде. Бұл ретте қала мен аудандарда аталған саланың қызмет сапасын арттыру жоспарланып отыр. Бұл туралы облыстық денсаулық сақтау басқармасының басшысы Қайсар Абдалиев мәлім етті,- деп хабарлайды Өңірлік коммуникациялар қызметі.
«Ауылдық медицинаны жаңғырту» ұлттық жобасы шеңберінде 15 ауылдық елді-мекенде медициналық ұйымдардың жаңа ғимараты, оның ішінде 9 медициналық, 5 фельдшерлік-акушерлік пункт, 1 дәрігерлік амбулатория салыну жоспарлануда. Сондай-ақ, қазіргі уақытта «Ауылдық денсаулық сақтауды жаңғырту» ұлттық жобасына сәйкес, 15 медициналық нысанды салу іске асырылуда. Олар Құрманғазы, Қызылқоғада, Индер, Исатай аудандарында жүргізілуде. Мекемелердің құрылысы осы жылы аяқталады.

Қайсар Абдалиевтің айтуынша, қазіргі уақытта Атырау облысында 11 нысанның құрылысы жүруде. Қолданысқа берілетін мұндай заманауи нысандар облыста күннен-күнге саны артып жатқан халықтың медициналық көмек алуын жеңілдетеді.

-Атырау қаласы Жұлдыз ықшамауданы мен Амангелді ауылынан дәрігерлік амбулатория, Нұрсая, Өркен шағынаудандарында емхана, қалада үш подстанциясымен қоса жедел жәрдем стансасы, онкологиялық дипансердің радиологиялық корпусы, Жылыой ауданының Қарағай, Махамбет ауданының Аққайың ауылында медициналық пункт, Исатай ауданында Өркен фельдшерлік-акушердік пункті, Құрманғазы ауданының Сүйіндік, Балқұдық ауылдарынан дәрігерлік амбулатория салынуда. Сондай-ақ, Қайыршақты ауылдық округінде халық санының өсуіне байланысты Талғайраң селосында емхана салуды көздеп отырмыз. Атырау облыстық онкология диспансерінің қазіргі ғимараты бұзылып, орнына жаңа ғимарат салынады. Тамыз айында жобалық-сметалық құжаты мемлекеттік сараптамаға жолданып, келер жылы құрылысы басталады,-деді Қ.Абдалиев.

Бұл жаңа нысандарда кадр жетіспеушілігін болдырмау үшін облыстық денсаулық сақтау басқармасының бірнеше бағдарламасы бар. Олар: бір жолғы әлеуметтік өтемақы және қызметтік пәтер беру. Жобаларға қызығушылық танытқан 150-ге жуық маман өзге өңірлерден келеді деп болжануда.

Айта кетейік, «Ауылдық медицинаны жаңғырту» жоба аясында үш нысан 2023 жылы қолданысқа берілді. Олар Махамбет ауданы Талдыкөл ауданындағы фельдшерлік-акушерлік, Құрманғазы ауданы Шағырлы және Алтыншы ауылындағы медициналық пункттер.

Биыл 100-ден астам медицина қызметкерлеріне әлеуметтік көмек көрсету жоспарланды, деп хабарлайды AtyrauPress тілшісі.

Атырау облысында өткен жылдан бастап өзге өңірлерден келген тәжірибелі және жас мамандарға біржолғы әлеуметтік өтемақы және қызметтік пәтер беру бағдарламасы жүзеге асуда. Өңірлік коммуникациялар қызметі мәлім еткендей, өткен жылы облыс бойынша 103 маман әлеуметтік көмек алды. Оның 40-қа жуығы аудандық, ауылдық жерге жұмысқа орналасты. Оларға бес миллион теңге, ал Атырау қаласының медицина мекемелеріне жұмысқа орналасқандар үш миллион теңге көмек алды.

Атырау облысы денсаулық сақтау басқармасының басшысы Қайсар Абдалиевтің айтуынша, бұл бағдарлама медицина саласындағы кадр тапшылығын жою мақсатында іске асуда.

⁃ Аталған жобаға биыл өзгерістер енеді. Атап айтсақ, өтемақы көлемін арттыруды көздеп отырмыз. Қалаға келген мамандарға бес миллион, ауданға барғандарға жеті миллион, ауылға орналасқандарға он миллион теңгеге дейін көтереміз. Қазір бұл ұсынысты облыстық мәслихатқа ұсындық. Сонымен қатар «Отбасы банкпен» бірлескен жобамыз бар. Онда мамандар 5%-бен 20 жылға дейін, бастапқы жарнасыз пәтер сатып алады. Ал мамандарды шақыру үшін медициналық ЖОО-мен тығыз байланыстамыз. Оларға жыл сайын барып, түсінік жұмыстарын жүргіземіз. Қызығушылық танытушылар осылай көбейеді. Биыл да жүзден астам маман келеді деп күтілуде,- деді Қ.Абдалиев.

Былтыр қазанда жұмысқа орналасып, желтоқсанда әлеуметтік өтемақыны алған дәрігер акушер-гинеколог Гүлфара Көктенова мұндай мемлекеттік қолдаулар жастар үшін үлкен мүмкіндік екенін айтты.

- Ресей мемлекеті Астрахань қаласынан медицина университетін аяқтап, акушер-гинеколог мамандығын Қазан қаласынан бітірдім. Жергілікті әкімшілік пен Денсаулық сақтау басқармасынан облыстық перинаталдық орталығына көп қолдау көрсетілді. Өзім жұмысқа орналасқан уақытта үш миллион өтемақы алдым. Бұл орталықта өте білікті мамандар көп, олармен бірлесе жұмыс жасап тәжірибемді арттырудамын. Мемлекеттің жас мамандарға деген қолдауына ризамын, деді Г.Көктенова.

Амандық САҒЫНТАЙҰЛЫ

Шетел азаматтары айналасындағыларға қауіп төндіретін ауру диагнозы қойылса, барлығы медициналық көмек ала алады. Оның түрлері мен көлемдері ҚР ДСМ 2020 жылғы 9 қазандағы №121 бұйрығымен бекітілген. Медициналық көмек Тегін медициналық көмектің кепілдік берілген  көлемі қаражаты есебінен берілетін болады.

Азаматтардың міндетті әлеуметтік медициналық сақтандыруға төлеген жарналары мен аударымдары қайда сақталатыны және бағытталатыны қазақстандықтарды жиі қызықтырады. Әлеуметтік медициналық сақтандыру қорының Атырау облысы бойынша филиалы оған жауап дайындады.

«Барлық жарналар мен аударымдар Қазақстан Республикасы Ұлттық банкінің арнайы шотына түседі, ал сол жерден халыққа көрсетілген медициналық қызметтерге ақы төлеу үшін медициналық ұйымдарға жіберіледі» - деп атап өтті «Әлеуметтік медициналық сақтандыру қоры» КеАҚ Атырау облысы бойынща филиалының директоры Салимгали Ганиет.

«Міндетті әлеуметтік медициналық сақтандыру туралы» Заңда (21-бап) Әлеуметтік медициналық сақтандыру қоры инвестициялық қызметті Қордың активтерін (МӘМС қаражатын) Қазақстан Республикасының Ұлттық Банкі арқылы қаржы құралдарына орналастыру жолымен жүзеге асыратыны көрсетілген.

Бұл ретте Қор мен Ұлттық Банк арасында сенімгерлік басқару шарты жасалды. Ол қалай жасалады?

Ұлттық Банк артылған ақшаны (МӘМС есебінен көрсетілген медициналық қызметтерге төленгеннен кейін қалатын ақша) қаржы құралдарының бекітілген тізбесіне сәйкес қатаң түрде бағалы қағаздар мен депозиттерге орналастырады. Бұл инвестициялық табыс алуға, яғни МӘМС жүйесінің жинақталған активтерінің сомасын ұлғайтуға мүмкіндік береді. Олар өз кезегінде тек медициналық қызметтерге ақы төлеуге бағытталады және Қордың қажеттілігіне жұмсалмайды. Осы ретте Қор МӘМС қаржысын өз еркімен орналастырмайды.

2024 жылғы 1 қаңтардағы жағдай бойынша 2017 жылдан бері жинақталған МӘМС активтерінің қалдығы 933 млрд теңгені құрады. 2024 жылдың төрт айында Қорға 441 млрд теңге МӘМС жарналары мен аударымдар түсті, оның ішінде 42 млрд теңге сомасына инвестициялық табыс алынды. Бұл ретте медициналық көмекке ақы төлеуге жұмсалған шығыстар 354 млрд теңгені құрады.

Осылайша, 2024 жылғы 1 мамырдағы жағдай бойынша Қор активтерінің қалдығы – 1020 млрд теңге. Ұлттық Банк МӘМС активтерінің бұл қаражатын Ұлттық Банктің қысқа мерзімді депозиттеріне (медициналық көмектің ағымдағы төлеміне жіберіледі) – 171 млрд теңге, орта және ұзақ мерзімді облигацияларға - 108 млрд теңге және мемлекеттік бағалы қағаздарға 741 млрд теңге сомасында орналастырды.

Бұл жүйеге және пациенттерге қандай мүмкіндіктер береді?

2023 жылы алынған инвестициялық табыс 113 млрд теңгені құрады, яғни МӘМС пакетінің бюджетіне қосымша 113 млрд теңге түсті.

Айта кету керек, 2022 жылмен салыстырғанда инвестициялық кіріс 1,6 есе өсті. Бұл қаражат МӘМС-тің қалған активтерімен бірге 2024 жылдың басында медициналық ұйымдармен 2024 жылға жасалған шарттар бойынша 30% мөлшерінде аванс төлеуге бағытталды. МӘМС қаражатын тиімді сақтаудың бұл тетігі міндетті әлеуметтік медициналық сақтандыру туралы заңнаманы бекіту кезінде қаланды және жүйенің активтерін, оның ішінде жыл сайын көрсетілетін медициналық қызметтердің санын ұлғайтуға және қазақстандықтар үшін медициналық көмектің қолжетімділігін қамтамасыз етуге мүмкіндік береді.

Айта кетерлігі, Әлеуметтік медициналық сақтандыру қорының қаржы-шаруашылық қызметі және МӘМС активтері бойынша жыл сайын тәуелсіз аудит жүргізіледі. Жыл қорытындысы бойынша қаржылық есептілік ҚР Қаржы министрлігінің депозитарийінде және Қордың ресми сайтына орналастырылады.
Сондай ақ Қор ҚР Үкіметінде және ҚР Үкіметінің шоғырландырылған есептілігі шеңберінде ҚР Парламенті депутаттарының алдында үнемі есеп береді.

Жақында Құлсары қаласындағы аудандық емханаға барып массаж, электрофарез, физио емдерін алдым. Онда адамдар өте көп. Массажист Құралай Тәттібайқызының айтуынша, ол барлығын бір күнде қамтып үлгере алмай жата- ды екен. Оның сөзіне ем алып жүргенде куә болдым. Демек, емханаға қосымша тағы бір маман керек. Мамыр айының аяғында аяқ асты- нан қан қысымым көтеріліп, «Жедел жәрдем» шақырдым. Өте тез келді. Фельдшердің жанында екі медбикесі бар. Тексеріп, қарап, тездетіп екпелерін салып, дәрілерін беріп ауруханадан бір-ақ шығарды. Системасын салып бірге жүрді. Мен таң қалып “қатты жетілген екенсіңдер, бұрынғының бәрі артта қалған екен” дедім. Сонда жас фельдшер:

– «Жедел жәрдем» көлігінде жабдықтардың бәрі жаңарды, бұрынғы фельдшер Қорабай зейнеткерлікке шықты. Ескі «УАЗ»-дар жойылып, келмеске кетті. Орнына біздер – «Жаңа Қазақстанның» жастары келдік,-деді күлімсіреп. Шынымен де солай екен. Арбамен зырылдатып ауруханаға алып келіп, бастапқы ем-домдарын жасап, бірнеше аппаратпен жүрек, тамыр соғысын, қызуымды тексеріп, нөмірі 6-палатаға әкеліп кереуетке жайғастырды. Ауруханадағы палата іші өте жайлы, медициналық кереуеттер толық, кереует сайын бір-бір кислород әр адам басына дайын тұр. Әжетхана ішінде екі қол жуатын жері бар. Кварц, түрлі жабдықтарымен, тоқ желісімен қамтамасыз етілген. Бұлардың бәрін көріп, разы боласың, жетілген медицинаның осындай игі жақсылығы туған жерің – Құлсарыда болғаны қандай керемет. «Жаңа Қазақстанның» бір куәсі осы.

Бұрынғы аурухана дәрігерлерінен Әлия Нығметоллақызы қалыпты. Білікті де білімді жастар да келген. Кардиолог Айдана мен невропатолог Арайлым Аманқосқызы, аурухана меңгерушісі Айгүл Саидқызы бастаған дәрігерлердің науқастармен жақсы қарым-қатынаста сөйлесуі, инабаттылығы көрініп-ақ тұр. Медбикелер – Ақерке, Нұргүл, Ләззат т.б піспелерін салып, дәрілерін беріп, шауып жүр. «Бізден тағы қандай көмек керек» деп қояды күлімсіреп. Тамақ рационы да түгел өзгерген, уақытында келеді. Жақсы дайындайды екен. Аспаз Айнагүл Жақсылыққызы тік тұрып, жылы шыраймен дайын тағам түрлерін таратуда. Тек бір айыбы, тамақ өте аз. Жарытпайды, мүмкін қан қысымы, жүрек талмасы бар адамға бөлінген мөлшері солай ма деп қалдық.

Біз 6-палатада төрт кісі болып жаттық. Ауырып келіп, жақсы сауығып шықтық. Олар – Елубай Құттығұлов, Қалыбай Ерғазы, Бағытжан Мұқашев, Абат Ғазимов. Барлық ем-домдарына ризамыз.

Өкінішке орай, аурухана ішінің кемшілігі баршылық екен. Салқындатқыш жоқ, екі қолжуғышқа да айна қоймаған, душтың суы төмен қарай кетпейді. Коридорда немесе асханада ыстық, салқын су тарататын кулерді көрмедік. Шай қайнатып ішетін электр шәйнектер де жоқ. Әжетхана ішіндегі вентиляция жасамай тұр. Хлор иісі мен жағымсыз ауа ұзақ тұрады. Теледидар атымен жоқ. Медбикелерді шақыртатын дабыл беретін құрылғы жасамайды, батареялары отырған. Жарықшамдары жеткіліксіз. Дәретхана қағазы жоқ. Он күннің ішінде біздің айтуымызбен бір рет қана қағаз қойылды. Антисептик сабындары да қойылмаған.

Осы кемшіліктерді айтып көріп едік, дәрігерлер «Біздің кінәміз жоқ, әкімшіліктің кінәсі» деді. Мүмкін салқындатқыш, айна, таза су, шай қайнатқыш, теледидар ауруханаға тиесілі емес шығар, оны біз білмейміз. Осындай керекті заттарды сұрағанымызда, «Бәрін үйден алып келесіңдер» деді.

Сондықтан науқас ретінде талабымыз: ауруханаға тиесілі керекті заттармен қамтамасыз етілуі тиіс. Осы кемшіліктердің жойылып, қателіктердің түзетілуін сұрай келіп, туған қаламыздағы жайлы ауруханамыз барлық игілікті керекті заттармен қамтамасыз етіліп, жайнап тұруын қалаймыз. Өйткені, аудандық емдеу орнының қандай екені облыстық, республикалық басқа ауруханалардан емделіп келетін кісілердің көзіне бірден көрінеді. «Мә! Мына жері дұрыс емес екен», - деп жатады.

Әрине, біз біреулерді кінәлаудан аулақпыз. «Жаңа Қазақстанның» аудандағы ауруханасы жаңа талапқа сай болып, науқас адамдардың тез жазылып, сауығып шығуына мүмкіндік беретін бірден бір кешенді емдеу орталығына айналса, дейміз.

Елубай ҚҰТТЫҒҰЛОВ,

Қалыбай ЕРҒАЗЫ,

Құлсары қаласы

Атырау облысында осыдан екі жыл бұрын екі жастар денсаулық орталығы ашылған болатын. Қазір бұл орталықтар жастардың репродуктивті сауаттылығын арттыруда бірқатар жұмыс атқаруда. Соның ішінде Атырау қаласындағы Геолог емханасында орналасқан «Самға» жастар денсаулық орталығында пациенттердің келуі үшін ыңғайлы орта қалыптасқан.

Аймаққа іссапармен келген Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі Ұлттық комиссияның мүшесі, Атырау облысының кураторы, «SAMRUK-KAZYNA TRUST» қорының бас директоры Альфия Адиева аталған орталықтың жұмысымен танысты.
Геолог емханасындағы «Самға» жастар денсаулық орталығының басшысы Әлішер Талғаттың айтуынша, мұнда тіркеу бөлімі⁠, дәрігер акушер-гинеколог, уролог-андролог, психолог, ⁠ем-шара кабинеттері үздіксіз жұмыс істеуде. Сонымен қатар ⁠жеке сөйлесу немесе заңгерлермен кеңесуге арналған сұхбаттасу кабинеті бар. Дәрігер-терапевт пен педиатр кабинеттері де қызмет етеді. Тәулік бойы жедел желі телефоны жұмыс жасап тұр.

–Биыл жұмысын одан әрі жандандыра түскен бұл орталық осыған дейін бірнеше білім беру мекемесінде, атап айтқанда, мектептер мен колледждерде түрлі бағытта ақпараттық-танымдық жұмыстар жүргізіп келеді. Жыл басынан бері 2000-ға жуық жас біздің мамандардың қабылдауында болса, жедел желі телефонына барлығы 101 қоңырау тіркелген. Көбіне жастардың жыныстық гигиенасы, ерте жүктілік пен жыныстық жолмен таралатын инфекциялардың алдын алу тақырыптары қамтылып, 18 бен 29 жас арасында отбасын жоспарлауда кәсіби бағдар берілуде, – дейді Әлішер Талғатұлы.

Алтыншаш ҚҰРМАШЕВА

Ауданның санитариялық-эпидемиологиялық бақылау басқармасының мамандары жазғы айларда «Сальмонеллез» ауруынан сақтануға шақырады.

Сальмонеллез – сальмонелла адам мен жануардың туындайтын жұқпалы ауруы. Сальмонеллез қоздырғыштарының температура, ылғалдылық және жұғу көлемділігіне байланысты сыртқы орта объектілерінде өмір сүруге қабілеті өте зөр. Көбінесе негізгі жұқпа көзі құстар болып табылады. Қазіргі уақытта тауық, ірі қара мал қоздырғыштың эпидемиялық маңызды көзі болып есептеледі. Сальмонеллез ауруын жұқтырған адам (әсіресе симптомсыз тасымалдаушы) тағамды дайындап, таратса, сондай-ақ азық-түлік өнімдерін сатса, ерекше қауіп төндіреді.

Қоздырғышты жұқтыру механизмі көбінесе тамақ арқылы (алиментарлы) жұғады. Бұл ретте тағам өнімдері, әсіресе ет, ет құс өнімдері, жұмыртқа және крем өнімдері қоздырғышты тарату факторы болып табылады. Тауық жұмыртқалағанға дейін жұқтырылған жұмыртқа, сондай-ақ одан дайындалған өнімдер ерекше қауіп төндіреді. Ірімшік, брынза, балық, соның ішінде ысталған балық және теңіз өнімдерін пайдалану салдарынан туындаған сальмонеллез аурулары белгілі.

Сальмонелла үшін сілікпе, құйма тағамдар, кремдер, ет фаршы, салаттар, сүт өнімдері қолайлы орта болып есептеледі. Әсіресе бұл микробтар бөлме температурасында және жылыда дайын тағам өнімдерінде қарқынды дамиды.

Сондықтан сальмонеллез ауруы жазғы маусымда, ыстықта өседі. Бұған қоса, аурудың жұғу қаупі дайын тағамдағы сальмонеллалардың тағам түрін, иісін, дәмін өзгертпестен көбеюінен артады. Сальмонеллез қауіпсіз ауру емес. Сальмонеллалар ұзақ уақыт бойы толық емделмеген сырқаттың ағзасында сақталуы мүмкін.

Міне, сондықтан сальмонеллез сияқты бұндай зұлым аурумен біз өздігімізше күресе алмаймыз. Осыған орай, барша тұтынушы және сатушыларды сальмонеллез ауруынан сақтануға шақырамыз.
Талғат Хабибуллин, аудандық санитариялық-эпидемиологиялық бақылау басқармасының басшысы

Қызылша – ауа жолы арқылы өте жылдам таралатын вирусты жұқпалы аурудың бірі. Бұрын қызылшамен ауырмаған немесе егілмеген адам қызылшамен ауырған адаммен байланыста болса, жұқтырып, ауырып қалу мүмкіндігі өте жоғары. Ауру байланыс және ауа арқылы ауа-тамшы жолымен таралады. Вирус сыртқы ортаға ауырған адам сөйлегенде, жөтелгенде, түшкіргенде түкірікпен бөлінеді. Вирустың тез тарайтыны соншалықты, сыртқы ортада тұрақсыздығына қарамастан, ауа толқынымен ғимараттың вентиляциялық жүйесі арқылы таралған жағдайлар да белгілі.
Инкубациялық кезеңнің 2-күні мен бөртпелер шыққаннан кейінгі 4-күн аралығында ауырған адам инфекция көзі ретінде айналадағыларға қауіпті таратушы болады. Ал, 5-күннен бастап, бөртпесі бар адам ауруды жұқтырмайды. Бұл аурумен ауырып жазылған адам өмір бойы иммунитетін сақтайды. Ал қызылшамен ауырған анадан туған балалар 3 айға дейін бұл ауруға шалдықпайды. Өйткені осы аралықта олардың қанында анасынан берілген антиденелері сақталады. Бұл аурумен ауырмаған және егілмеген адамдар қызылшаны жұқтыруға бейім болады және өзінің өмірінде кез-келген жасында ауруды жұқтырып алуы мүмкін.

Науқаспен байланыста болғандар 21 күн медициналық бақылауда болады және 72 сағат ішінде егуге жататындар егіледі. Инкубациялық кезеңі - жұқтырғаннан кейін бірінші белгілері пайда болғанға дейін, яғни 7 күннен 14 күнге дейін созылады. Ең маңыздысы – ауру суық тию белгілерімен басталады: дене қызуының 38-40 градусқа көтерілуі, әлсіздік, тәбеттің болмауы, құрғақ жөтел, мұрынның бітуі.

Кейінірек конъюктивит (көздің шырышты қабығының қабынуы), беттің шырышты қабығында (азу тістерінің тұсында) ұсақ ақ дақтар, ал аурудың 3-5 күні ашық түсті бір-біріне өзара ұқсас дақтар пайда болады.

Ең алдымен, олар құлақтың артында және маңдайда, содан кейін тез арада бет, мойын, дене және аяқ-қолға таралады. Ұсақ қызғылт дақтар тез арада үлкейіп, формасын өзгертіп, бір-біріне қосылады. Бөртпелердің қалың шыққан кезеңінен 2-3 күн өткеннен кейін дене қызуы 40,5 градусқа қайта көтерілуі мүмкін.

Бөртпелер 4-7 күн сақталады. Дақтардың орнында қоңыр пигменттер қалады, олар 2 аптадан кейін кетіп, тері қайта тазарады. Қызылшаның асқынуы: ең көп тараған түрі ортаңғы құлақтың қабынуы (отит), соқырлық, бронхтық пневмония, мойын лимфотүйіндерінің қабынуы, ларингит, энцефалит. Әрбір адам суық тиіп мазасызданған сәттен бастап, дер кезінде дәрігерді үйге шақыртып, тексеріліп, қаралуы керек.

Бұл уақтылы диагноз қойып, ем тағайындап және ұйымдасқан ұжымда тіркелсе, ауру ошағын бұғаттап, әрі қарай таралуына жол бермеуге, алдын алу іс-шараларын жүргізу үшін өте маңызды. Қызылшаның алдын алудың ең тиімді, сенімді және баламасыз жолы - вакцинация.

Ауруға қарсы егу – вирусты жасанды жолмен тоқтатады. Нәтижесінде ағза өзін тұрақты қорғайтын иммунитет қалыптастырады. ҚР ұлттық егу күнтізбесіне сай ең алғашқы вакцинация балаларға 12-15 айлығында, екіншісі 6 жаста жасалады. Қызылшаға қарсы қосымша егулер эпидемиологиялық көрсетіліммен:

- науқаспен байланыста болған қызылшаға қарсы егілмеген немесе егуі туралы мәліметі жоқ, осы аурумен ауырмаған 30 жасқа дейінгі адамдарға;

- 55 жасқа дейінгі медициналық жұмыскерлерге және өз қалауымен 30 жастан асқан адамдарға салынады. Барша аудан тұрғындарын қызылша індетінің алдын алудың бірден-бір жолы екпе алуға шақырамыз. Сонымен бірге адамдар көп жиналатын жерге бармай, жеке бас гигиенасын сақтап, бөлме ішін жиі желдетіп, ылғалды тазалау жұмыстарын жиі жүргізген абзал.

«Ауырып ем іздегенше, ауырмайтын жол іздейік» ағайын!

Т.Хабибуллин, аудандық санитариялық-эпидемиологиялық бақылау басқармасының басшысы