Таразы

Аудандық полиция бөлімінің алаңында қысқы киім нысанына көшуге байланысты жеке құрамның қатысуымен дәстүрлі саптық байқау өтті. Оны бөлім бастығының кадр саясаты жөніндегі орынбасары, полиция подполковнигі Жақан Нариков пен тәрбие және кадр жұмысы бөлімшесінің бастығы, полиция майоры Жеңіс Садықов жүргізді. Алдымен, полиция бөлімі қызметкерлерінің жедел-қызметтік міндеттерді орындауға үлгілі келбеті мен әзірліктерін тексеру мақсатында қысқы киім үлгісіне көшу бойынша жеке құрамның саптық жиыны болды. Тәртіп сақшыларының нысанды киім-кешектері мен олардың сыртқы түрінің белгіленген нормаларға сәйкестігін тексеріп, қызметтік куәліктерінің, айырым белгілерінің талаптарға сай болуын және сәйкестігіне көз жеткізді.

Қызметкерлер саптық жиынға жауапкершілікпен қарап, барлығы нысанды және арнайы киім кию ережелерінің талаптарына сәйкес келді. Полиция бөлімінің бастығы, полиция полковнигі Ринат Икласов жеке құрамды тексеріп, қызметтік міндеттерін адал атқаруды, қоғамдық тәртіпті қорғау жөніндегі шараларды күшейтуге назар аударуды тапсырды. Өткізілген байқаудан кейін қызметтік міндеттерін әділ орындап, қоғам қауіпсіздігін қамтамасыз ету жолында ерекше үлес қосқан, өз кәсіби қызметін адал атқарған, жоғары жетістіктерге қол жеткізген полиция қызметкерлерін марапаттады. Саптық байқау салтанатты шерумен аяқталып, кейін полиция қызметкерлері өз міндеттеріне кірісті. Мұндай байқау, сондай-ақ Теңіз полиция бөлімшесінің алаңында да өтті.

Негізгі мақсат – қоғамдық тәртіпті сақтау және жол қауіпсіздігінің алдын алу бағытындағы тапсырмаларды орындауда жеке құрамның даярлығын тексеру. Сондай-ақ, қоғамдық тәртіп пен қауіпсіздікті сақтауды қамтамасыз ету және заң бұзушылықтың жолын кесу. Саптық байқауды аудандық полиция бөлімінің тәрбие және кадр жұмысы бөлімшесінің бастығы, полиция майоры Жеңіс Садықов ашып, тәртіп сақшыларының нысанды киімдерін, қызметтік куәлік, бейнежетон мен планшеттердің жарамдылығын, сондай-ақ қызметтік автокөліктердің техникалық жағдайын тексерді. Тексеру қорытындысымен Теңіз полиция бөлімшесінің басшысына анықталған кемшіліктерді қысқа мерзімде жою міндеттелді. Жеке құрамға қызметтік міндеттерін орындау кезінде тәртіпті, заңдылықты және азаматтарға сыпайы қарым-қатынасты қатаң сақтау тапсырылды.

Тексерістен кейін Теңіз полиция бөлімшесінің бастығы, полиция подполковнигі Бақытжан Абилов қарауындағы тәртіп сақшыларына өз қызметін адал атқаруды, қоғамдық тәртіпті қорғау жөніндегі шараларды күшейтуге тапсырма берді. Ведомстволық талапқа сәйкес саптық байқаулар жылына 2 рет, яғни жеке құрамның сыртқы келбетіне қойылатын бірыңғай талаптардың орындалуын қамтамасыз ету үшін жазғы және қысқы киім нысанына көшу кезінде өткізіледі.

П.Қизатова

Жақында аудандық сотта өңірдегі белді бір банктің бұрынғы қызметкерінің үстінен көтерілген қылмыстық іс бойынша сот процесі өтті. Айыпкер өзінің қызметтік өкілеттігін пайдаланып, банктің кепілдігінде тұрған пәтерлерді заңсыз сатып, келген клиенттерді алдап, ақшасын алаяқтық жолмен өз қалтасына басып отырған.

Бас пайдасын ойлаған бас маман

Оқиға 2017 жылдың маусым айында басталған еді. Айыпкер М. сол кезде банктің Құлсары қаласындағы филиалында бас маман лауазымында жұмыс жасап жүрген. Оның функционалдық міндеті - борышкерлердің қарызын қайтарту, жеке сот орындаушылардың жұмысын қадағалау, банктің атынан аукциондарға қатысып, пәтер сату, кепілдегі үйлерді бақылау, оларға мониторинг жүргізу. Бірақ бас маман бұл міндетін өзінің бас пайдасы үшін жүзеге асырды.

Сол күні әлеуметтік желідегі жарнаманың бірінен кепілде тұрған пәтерлердің бірін сатылымға шығарып қойғанын көріп, алуды көздеп келген А.есімді клиентті өзін бас маман ретінде таныстырған орда бұзар отыздан асқан жігіт қарсы алады. Ол өз кезегінде банктің иелігінде тұрған қаладағы көпқабатты ықшамауданның біріндегі пәтерді 780 000 теңгеге заңды түрде құжаттарын рәсімдеп, сатып алып береді. Қалтасы қалың клиентінің сеніміне алғаш осылай кірген ол әрмен қарай банктің емес, өзінің қу қара басының қамына жұмыс жасауға кіріседі.

Көп ұзамай клиентіне хабарласып, қаладағы көпқабатты ықшамауданнан кепілде тұрған тағы бір пәтердің сатылымға шығарылғанын, бірақ құны 2200000 теңге тұратынын жеткізеді. Алғашқы пәтерге қарағанда бағасының қымбат болатын жайы бар-ды. Өйткені ол күрделі жөндеу көрген жақсы баспана еді. Бұған көз жеткізу үшін А. кепілдегі мүлікті аяқтай барып қарайды. Үйді ұнатып тұрғанын байқаған бас маман бірден қармақ құрып, қаржыны қауып қалуға тырысады. Сол бойда пәтердің бағаланған сомасы - 2 млн. 200 мың теңгені банк қосымшасы арқылы өзінің жеке есеп-шотына аудартып алады. Бірақ М-ның әрекеті жалғыз мұнымен шектелмейді. 2019 жылдың маусым айының бір күні А-ның ұялы телефонына қоңырау шалып, қаладағы көпқабатты ықшамауданның біріндегі кепілдікте тұрған тағы бір пәтердің 1 400 000 теңгеге сатылымға шығарылғанын хабарлайды. Алдыңғы «сценарий» бойынша өз есеп-шотына қаржысын аудартып алған сабаз арада біраз күн өткеннен кейін «клиентіне» тағы қоңырау шалып: «Пәтерді құжат жүзінде иелігіне өткізу үшін қаражат қажет» деп қосымша 980 000 теңге сұрайды. Ойлағаны болған бас маман қалтасы қалың А.-ның өзіне қатты сенетініне әбден көз жеткізіп алады. Сондықтан да енді көпқабатты ықшамауданнан шығып, жер үйлерді саудалауға көшеді. Қаланың шеткі учаскесінде «кепілдікте тұрған» бір баспананың сатылымға шыққанын айтып, оған «Whatsapp» мессенджері арқылы алдын ала жылжымайтын мүліктің фотосуреттерін де жіберіп қояды. Шын мәнінде А-ның ұялы телефонына келіп түскен фотолар кепілде тұрған үйдің суреті емес-ті. Бұл алаяқтың кезекті алдап-арбау әрекеті екенін, әрине, ол білген жоқ. Ер-азамат ретінде оған имандай сенген нәзік жанды сол бойда сұратқан 1400000 теңге «үйдің бағасын» есеп-шотына аударып жібереді. Бұдан басқа, ол банктің бас маманы ретінде қаланың орталығында және көпқабатты ықшамауданында орналасқан екі пәтердің бірін 1000000 теңгеге, екіншісін 550 мың теңгеге сатып жіберіп, ақшасын қалтасына басады. Шын мәнінде бұл пәтерлердің ешқайсысы заңды түрде сатылып, клиенттің иелігіне өтпеген еді. М. оларды өз қызмет өкілеттігін пайдаланып, қарақан басының қамы үшін пайдаланып кетті. Соның кесірінен банк клиентіне 6 млн. 450 мың теңге материалдық шығын келеді.

Алаяқтың қылмысы жалғыз мұнымен ғана шектелмейді. Айталық, 2018 жылғы сәуір айында Г.есімді келіншекті де тақыршаққа отырғызды. Оған көпқабатты ықшамаудандағы бір пәтердің банк арқылы 1 400 000 теңге сатылымда тұрғанын айтып сендіріп, ақшасын қолма-қол алып, қалтасына басады. Тіпті, оған үйдің кілтін беріп, «Осы пәтерге дәл қазір көшіп барып тұра бер, құжаттарын кейін рәсімдеп беремін» деп алдап соғады. Банктің бас маманының сөзіне иланған клиент өз иелігіне өтпеген пәтерге жанұясымен бірге көшіп барып, қоныстанады. Дәл осы «сценариймен» С. есімді азаматты да алдап соқты. Оған қаланың орталық көшесіндегі бір үйді көрсетіп, «Пәтердің құжаттарын заңдастырып жасап жатырмын, бірақ оны соңына дейін жеткізу үшін қосымша ақша қажет»-деп, алдымен, екі рет 1 млн. теңге, кейін 800 мың теңге тағы аудартып алып, 2 млн. 800 мың теңгесін қағып алады.

Ұстазын да тонады

«Дәндеген қарсақ құлағымен ін қазады» дегендей, алаяқ аз ақшаға қанағат тұтпай, енді бірте-бірте қомақты қаржыға қол сала бастайды. Адамдарды алдаудың кәсіби шеберіне айналған ол пәтерлердің құнын көтеріп жібереді. Бір қызығы, ол жылжымайтын мүліктерді бейне өзінің жекеменшік үйіндей саудалап, сата берген. Тіпті, пәтерге қоса автокөлікті де өткізіп, «түйені түгімен жұтты». Айталық, 2020 жылғы қазан айында танысы К. есімді азаматқа банкіде кепілдікте тұрған пәтердің бірін 8 500 000 теңгеге, ал маркасы «Тойота Хайлюкс» автокөлігін 8 000 000 теңгеге «саудалаған». 8 млн. теңгені Орал қаласында орналасқан төлем терминалы арқылы өзге біреудің атынан ашылған есеп-шотқа аудартып, пәтердің ақысы 8 млн 500 мың теңгені өзінің шотына түсірткен. Сөйтіп жәбірленушіге барлығы 16.500.000 теңгеге аса ірі көлемде материалдық шығын келтірген.

«Ұрының арты қуыс» дегендей, бас маманның былығы ақыры әшкере болып, 2022 жылғы сәуірде қызметінен босатылады. Бірақ «Ауру қалса да, әдет қалмайды» дегендей, ол кепіл мүлкін сатуға, банктің мүддесін білдіруге өкілеттігі жоқ бола тұрса да, алаяқтық әрекетін жалғастыра берді. Қалтасының қамын күйттегені сонша, тіпті, кездескен өзінің бұрынғы сынып жетекшісін де аяған жоқ. Он бір жыл білім берген ұстазын алдап, тақыршаққа отырғызып кетті. Шәкіртінің банкіде белді қызмет атқарып жүргеніне қуанған ұстазы оған қатты сеніп қалады. Оқушысының «Кепілде тұрған үйлерді төмен бағамен алып берейін» деген ұсынысына келісе кетеді. Оған да көпқабатты үйлердің біріндегі екі пәтердің бірін 3 млн. 800 мың теңгеге, ал екіншісін 2 млн теңгеге сатып, барлық қаржыны есеп-шотына аудартып алады.

Кейін сот процесінде жәбірленушілердің көпшілігі алаяққа қатаң жаза қолдануды талап етіп жатқанда ұстазы судьяға: «Мен тек өзіме келтірілген 5 млн. 800 мың теңгемді талап етемін, ал сотталушыға жеңіл жаза беруіңізді сұраймын, өйткені оның кішкентай балалары бар ғой" деп аяп, өтініш білдірді. «Бақсақ, бақа екен» дегендей, кейін белгілі болғанындай, орда бұзар отыздан асқан азамат нағыз құмар ойынының құлдығына түскен сабаз болып шықты. Соның кесірінен қарыздың батпағына белшесінен батқан ол амалсыздан осындай ауыр қылмысқа барған екен. Сотта өз әрекетін осылай ақтап бақты. Бірақ бұл жауап алаяқты заң алдында жазадан арашалап қала алмайтыны анық. Өйткені М-ның қармағына түсіп, қыруар қаражатынан қағылып, тақыршаққа отырып қалған жәбірленушілер қатары жоғарыдағы адаммен шектеліп қалмайтын еді. Ол барлығы 17 жәбірленушіні пәтер мен көлік алып беремін деп алдап, барлығы 37 млн. 683 мың теңге ақшасын алдап алған.

Биылғы маусым айында аудандық сот алаяққа қатысты ақырғы үкімін шығарды. Өйткені ол осыған дейін де осы әрекетімен құқық қорғау органдарының көзіне түсіп, бірнеше мәрте қылмыс жасағаны үшін сотталып, шартты жазамен шектелген еді. Бірақ сот алдына қайтадан келген алаяқты заң бұл жолы кешіре алмады. Қазақстан Республикасы Қылмыстық кодексінің 190-бабы 4-бөлігінің 2) тармағында көзделген қылмыстық құқық бұзушылықты жасағаны үшін кінәлі деп таныды. Өйткені ол «Алаяқтық» яғни, «бөтеннің мүлкін жымқыру немесе алдау немесе сенімді теріс пайдалану жолымен бірнеше рет ірі көлемде, аса ірі көлемде бөтен мүлiкке құқықты иемденіп, қылмыстық құқық бұзушылықты жасаған». Сондықтан оған осы бап бойынша 7 жыл мерзімге банк қызметімен айналысу құқығынан айыра отырып, 6 жыл 6 ай мерзімге бас бостандығынан айыру жазасы тағайындалған-ды. Бірақ Қылмыстық кодекстің 14-бабының 1-бөлігіне сәйкес айыпкердің әрекетінде қылмыстың қайталануы бар деп танылып, осыған дейінгі тағайындалған шартты жазаларды неғұрлым қатаң түріне сіңіріп, ішінара қосу жолымен түпкілікті 7 жыл мерзімге бас бостандығынан айырылды. Жазасын қылмыстық-атқару жүйесінің орташа қауіпсіз мекемелерінде өтеу белгіленді. Оған қоса, барлық жәбірленушілердің талап арыздары қанағаттандырылып, ондаған миллион теңге айыпкер есебінен өндірілетін болды.

Жайнагүл Төкешова, аудандық сот әкімшісінің бас маманы,

Ербол Бисекенұлы, өз тілшіміз

Бауыржан Төлегенұлы Әленов Қазақстан Республикасы Ішкі істер министрінің бірінші орынбасары лауазымына тағайындалды, деп хабарлайды Egemen.kz Ақорда баспасөз қызметіне сілтеме жасап.

Мемлекет басшысының өкімімен Бауыржан Төлегенұлы Әленов Қазақстан Республикасы Ішкі істер министрінің бірінші орынбасары лауазымына тағайындалды.

Бауыржан Аленов 1976 жылы 8 қарашада Ақмола облысында өмірге келген.

2004 жылы «Фемида» заң институтын, 2012 жылы Қарағанды заң институтының магистратурасын тәмәмдаған. Ішкі істер органдарындағы қызметін 1997 жылдың мамыр айында бастады.

Ол 2021 жылдың қаңтар айынан бастап Қазақстан ІІМ жедел қызмет департаментінің бастығы, оған дейін Қазақстан ІІМ жетінші департаментінің бастығы болған.

Алматы облысының Полиция департаментін 2022 жылдың қаңтар айынан бері басқарған.

Азаматтардың қаржылық қауіпсіздігі мен сауатын арттыру мақсатында интернет-алаяқтықтың алдын алу үшін Атырауда полиция департаменті мен Цифрландыру орталығымен бірлескен іс-шаралар үшін меморандумға қол қойды.
Меморандум облыс тұрғындары мен қонақтарын интернет-алаяқтық қылмыстарынан қорғау және интернет желісі арқылы жасалатын қылмыстардың алдын алуға ықпал етуге бағытталған 109-көмек call орталығының жұмысы арқылы жүзеге асырылмақ. Орталыққа кез-келген тұрғын хабарласып интернет алаяқтық деректері туралы, одан қорғану және интернет-алаяқтық деректері тіркелген онлайн сайттар мен парақшалар туралы мәліметтерді ала алады.

Сондай-ақ, меморандум аясындағы бірлескен қызметті 109-көмек орталығы мен Кримналдық полиция басқармасы, Киберпол қызметі жүргізеді. Меморандумға қол қойғанға дейін тараптар өзара іс-қимылдан күтілетін нәтижелер мен орталық операторларының ақпараттық қамтамасыз етілуін жоспарға сәйкес өткізді.

Бүгінгі жиында Атырау облысы полиция департаментінің бастығы полиция генерал-майоры Нұрхат Оразбаев қоғамда белең алған мәселелердің бірі интернет-алаяқтық қылмысына төтеп беру, азаматтарды қылмыстың кез-келген түрінен қорғау үшін ресурстарды тиімді пайдалану, халыққа бірлесіп қызмет ету туралы сөз қозғады.

Айта кетейік, үзіліссіз қызмет ететін 109 Сall орталығы Атырау облысы аумағында 2020 жылдан бері іске қосылған. Тұрғынның сауалын жауапсыз қалдырмайтын орталықта 40 қызметкер жұмыс істейді. Өңірдің өзекті мәселелеріне қатысты жұртшылыққа тиімді ақпарат беруге бағытталған жүйе енді интернет желісіндегі құқық бұзушылықтардың алдын алуға ықпал етуге үлесін қоспақ. Департамент қызметкерлері орталықпен үнемі кері байланыс орнатып, жұмыс тиімділігі үшін семинарлар, дөңгелек үстелдер өздізуді жоспарлап отыр.

Әкімшілік рәсімдік-процестік кодекстің артықшылығы аз емес. Бұл құжат мемлекеттік органдардың ішкі әкімшілік рәсімдерін және әкімшілік сот ісін жүргізу тәртібін реттейді. Кодекс екінші тарап ретінде мемлекеттік органдар әрекет ететін істерді қарау кезінде азаматтар мен заңды тұлғалардың құқықтарын қорғаудың тиімді тетіктерін белгілеуге арналған. Құқықтық-жариялық даулар барысында билік органдарының шешімдері мен іс-әрекеттеріне шағым жасау кезінде азаматтар көбінесе тең емес жағдайда күрес жүргізіп келді. Әкімшілік әділетті енгізу – бұл кемшілікті жойып, мемлекеттік орган мен азаматтар арасындағы тепе-теңдікке қол жеткізуді көздейді. Әкімшілік әділет - бұл жаңа институт емес, ол әлемнің көптеген елдерінде бұрыннан жұмыс істеп келе жатыр. Ол - құқықтық мемлекеттің маңызды атрибуты, азаматтардың құқығы мен бостандығы мемлекеттік органдардың заңсыз әрекетінен қорғауға кепілдік беретін «естуші мемлекеттің» күшті тірегі болып табылады.

Әкімшілік рәсімдік-процестік кодекстің қабылдануы – мемлекет үшін маңызды оқиға: енді талап-арыздар мемлекеттік органның кінәлілік презумпциясы қағидаты бойынша қаралады. Бұл дегеніміз мемлекеттік орган өзі қабылдаған шешімнің, әрекет пен әрекетсіздіктің заңдылығы мен негізділігін дәлелдеуі қажет болады. Кодексте әкімшілік актіге бастамашылық етудің, оны қараудың және қабылдаудың бірыңғай, түсінікті рәсімі бекітілген. Әкімшілік рәсімдік-процестік кодекс 2021 жылдың 1 шілдесінен бастап күшіне енді. Жаңа кодекс – мемлекеттік органдардың әкімшілік және ішкі мемлекеттік рәсімдерін жүзеге асыру тәртібін, сондай-ақ жария-құқықтық қатынастар аясында дауларды шешу тәртібін реттейтін заңнамалық акті. Құжатқа сәйкес, әкімшілік рәсімдер мен әкімшілік сот ісін жүргізу кезінде келесі қағидаттарға назар аударылады:

* құқықтар басымдығы қағидаты - барлық күдікті қайшылықтар мен түсініксіз нәрселер әкімшілік рәсімге қатысушының пайдасына түсіндіріледі;

* ресми талаптарды теріс пайдалануға тыйым салу-әкімшілік органға, лауазымды адамға әкімшілік рәсімге қатысушының құқығын іске асырудан бас тартуға, шектеуге, тоқтатуға, сондай-ақ заңнамада белгіленбеген талаптарды сақтау мақсатында оған міндет жүктеуге тыйым салынады;

* қорғау құқығына сенім - әкімшілік рәсімге қатысушының әкімшілік органның, лауазымды адамның қызметіне сенімі заңмен қорғалады;

* соттың белсенді ролі - сот әкімшілік процеске қатысушы адамдардың түсініктеме, мәлімдеме, өтініш-хаттарымен, олар ұсынған дәлел, дәлелдемелер және әкімшілік істің өзге де материалымен шектелмей, әкімшілік істі дұрыс шешу үшін маңызы бар барлық нақты мән-жайларды жан-жақты толық және объективті зерттейді;

* әкімшілік процеске қатысушы жандардың бастамасымен немесе өтініш-хаты бойынша қосымша материалдар мен дәлелдемелерді жинайды;

* әкімшілік істің нақты және заңды тараптарына қатысты құқықтық негіздемелер бойынша өзінің алдын ала құқықтық пікірін айтуға құқылы.

Әкімшілік актілер қолайлы, яғни жаңа құқық беретін, міндеттерді тоқтататын, жағдайды жақсартатын және ауыртпалық түсіретін құқықтарды тоқтататын, міндеттерді жүктейтін, жағдайды нашарлататын болып бөлінеді. Сонымен бірге, заң шығарушы орган заңсыз ауыртпалық салатын актінің әрқашан міндетті түрде жойылуға жататынын, ал заңсыз қолайлы актінің күші жойылған кезде әкімшілік рәсімге қатысушының сеніміне құқықты қорғау қағидаты ескерілетінін бекітеді. Бұл принцип-қабылданған әкімшілік актінің заңды және дәйекті екендігінің кепілі. Тағы бір маңызды жаңалық: алғашқы әкімшілік процедура жүргізіліп жатқан адамға процедуралық тыңдалу кепілдігі енгізіліп, түпкілікті шешім қабылданғанға дейін өз ұстанымын – позициясын білдіруге мүмкіндік береді. Сондай-ақ, әкімшілік рәсімді жүзеге асыру нәтижесінде қабылданған шешімге шағымды қараудың алқалық тәртібі белгіленген. Бұл әрине, істің мұқият, негізделген және әділ түрде қаралуын қамтамасыз етеді.

Тағы бір маңызды ерекшелік: әкімшілік орган актіге шағым түскен сәттен бастап үш күн ішінде істі жоғары тұрған органға жіберместен өз қатесін түзетуге немесе істі бітімгершілікпен аяқтауға мүмкіндік ала алады. Сонымен қатар, жоғары тұрған орган төменгі органның қабылдаған ауыртпалық түсіретін актісін жөнсіз, орынсыздығы үшін заңсыз деп танып, оның күшін жоюы тиіс. Сот әкімшіліктің шешіміне, әрекетіне құқықтық бақылауды жүзеге асыруға ғана құқығы бар.

Гүлназ Көпжан,

аудандық сот әкімшісінің жетекші маманы

Тіл – қазақтың байлығы. Ол – қоғам өмірін ұйымдастырушы басты күш. Сонымен қатар, әлеуметтік және экономикалық өрлеу мен дамудың, халық пен қоғам өміріндегі өзгерістер мен жаңалықтардың айнасы.

Халық батыры Б.Момышұлы тілге үлкен баға берген: «Тілсізді айуан дейді. Тілі кедей елді мәдениетсіз, анайы, надан халық деп санайды». Тіл - адам баласының негізгі қасиеті. Сондықтан, тіл байлығы – елдің елдігін, ғылыми-әдебиетін, өнеркәсібін, мәдениетін, қоғам құрылысын, салт-сананы, жауынгерлік дәстүрін, мұрасын қай дәрежеде екенін көрсететін рухани құрал екенін атап кеткен болатын.

Әрбір ұлт пен ұлыстың басқа халыққа қарағанда, оның ерекшелігін көрсететін қолдағы қымбат мұрасының бірі - ана тілі. Бір кезде «Бас кеспек болса да, тіл кеспек жоқ» деген қағиданы берік ұстаған халқымыз елдің тағдырын бір ауыз сөзбен шешіп отырған. Әйгілі бабамыз Төле би, Қазыбек би, Әйтеке билер қара сөзді қару етіп, шешендігімен жаудың бетін қайтарып, ел мақтанышына айнала білді.

Сол ата-бабамыздың арқасында бұл күнде тіліміз мемлекеттік тіл мәртебесіне ие болды. Ол барлық салада білім-ғылымда, өнеркәсіпте, шет мемлекетпен байланыста болсын үлкен рөл атқаруы керек деп есептеймін.

Қоғамымыз қарыштап дамыған, сан салалы жаңалықтар жаршысы болған жаңа ғасырда да тіл мәселесі бар. Сондықтан ана тілімізді қадірлеу, құрметтеу мақсатында сот төрелігі саласында да кеңінен қолданылуы керек. Өйткені, бұл - адам санасын құқықтық тұрғыдан оятатын, жақсылыққа қарай үндейтін, дұрыс тәрбиеге бейімдейтін маңызды сала. Егер еліміздегі заң мен құқықтық норма ана тілімізде сөйлесе, онда мемлекеттік тілдің өрісі кеңейіп, абыройы арта түседі.

Қазақстан Республикасы Азаматтық процестік кодексінің 14-бабының 2-бөлігіне сәйкес сот ісін жүргізу тілі сотқа талап қою берілген тілге байланысты сот ұйғарымымен белгіленеді. Сол бір азаматтық іс бойынша іс жүргізу бастапқы белгіленген сот ісін жүргізу тілінде жүзеге асырылады. Сол себептен, сотқа жүгінуші тараптың мемлекеттік тілде талап қоюын толықтай қамтамасыз ету үшін, заң саласының өкілдері болып жұмылып тиісті жұмыстар жасалуы қажет деп санаймын.

Мемлекеттік билік тармақтарының ішіндегі өзіміздің сот билігінің негізгі қызметі – сот төрелігі. Ол қашанда мемлекеттік тілде жүргізілетін болса, оның мәртебесі үстем болары күмәнсіз. Бұл ана тіліміздің абыройын ғана емес, сот жүйесінің имиджін көтеретіні сөзсіз.

Гүлзада Жанғазиева,

аудандық сот әкімшісінің жетекші маманы

Бүгінде облыстық прокуратура мен құқық қорғау органының күштері есірткі қылмысына қарсы аяусыз күреске жұмылдырылған. Есірткіні заңсыз таратуға ниет білдірген әрбір адамды қатаң шара мен ауыр жаза күтіп тұр. Төмендегі оқиға - дәл соның айғағы.

Жақында мемлекеттік айыптаушы ретінде Атырау облысының қылмыстық істер жөніндегі мамандандырылған ауданаралық сотында алқабилердің қатысуымен Жамбыл облысы, Тараз қаласының екі тұрғынына қатысты қылмыстық іс қаралды. Олар Қазақстан Республикасы Қылмыстық кодексінің 297-бабының 3-бөлігі 1,3,5-тармақтары бойынша 10 және 11 жылға бас бостандығынан айыру жазасына кесілді. ​​

Бұл адамдар «Телеграм» электрондық ақпараттық ресурсын пайдаланып, аса ірі мөлшерде «Альфа-пвп» психотроптық заттарын заңсыз сақтап, оны өткізу мақсатында тасымалдаған. Және сол үшін құрықталып, заң бойынша жазаға тартылып, темір торға тоғытылды.
Атырау облысының прокуратурасы ​

Бас Прокурордың бұйрығымен Еркебұлан Нұрымұлы Ермеков Атырау облысы Жылыой ауданының прокуроры болып тағайындалды.
Е.Н. Ермеков 1987 жылы туылған. Прокуратура органдарында 2009 жылдан қызмет етеді. Қызмет жолында Қызылқоға ауданы прокурорының көмекшісі, аға көмекшісі, орынбасары, Атырау қаласы прокуратурасының бөлім бастығы, Атырау облысы прокурорының көмекшісі, аға көмекшісі, Атырау облысының мамандандырылған табиғат қорғау прокурорының орынбасары лауазымдарын атқарды. Осы тағайындауға дейін Атырау облысының мамандандырылған табиғат қорғау прокуроры болды.
Сыныптық шені – әділет кеңесшісі.

Атырау облысының прокуратурасы