Таразы

Заң қатайып, тағайындалар әкімшілік жазаның ауырлай түскеніне қарамастан көлік иелері арасында арақ-шарап ішіп, сыраға сылқия тойып алып, мас күйінде темір тұлпардың тізгініне жармасатын сабаздар азаймай тұр. Аудан аумағында өтіп жатқан «Қауіпсіз жол» жедел алдын алу іс-шарасы барысында осындай 13 жүргізушінің ұсталуы – соның айғағы.

Олар сөз жоқ, еліміздің Әкімшілік құқық бұзушылық туралы кодексінің 608-бабының 1-бөлігімен жауапқа тартылды. Көлік иелері «Көлік құралын алкогольдік ішімдік ішкен мас күйінде басқарғаны» үшін 15 тәулікке әкімшілік қамауға алынып, жеті жылға жүргізушілік куәлігінен де айрылды.

Иә, жүргізушілер арасындағы жолда жүру ережесін бұзу деректерін анықтау және оның жолын кесу, тас жолдардағы қауіпсіздікті қамтамасыз ету мақсатында сәуір айының 19-ы мен мамырдың 19-ы аралығында ауданда «Қауіпсіз жол» жедел алдын алу іс-шарасы өтіп жатыр.

Оған аудандағы патрульдік полиция взводының 21 арнайы автокөлігі мен 30 қызметкері жұмылдырылған. Шара барысында жүргізушілердің жолда жүру ережелерін бұзу деректерін анықтау және жолын кесу мақсатында полиция бөлімінің жеке құрамы күшейтілген жұмыс жүйесінде қызмет атқарып жүр.

Айталық іс-шара басталған сәуірдің 19-ынан бергі мамырдың 14-іне дейінгі аралықта жолда жүру ережелерін бұзғаны үшін барлығы 760 әкімшілік құқық бұзушылық дерегі анықталып, тиісті хаттамалар жасақталды. Соның ішінде, «Міндетті сақтандыру келісім шартын жасақтамағаны» үшін Қазақстан Республикасы Әкімшілік құқық бұзушылық туралы кодексінің (ӘҚБтК) 230-бабы 2 бөлігімен 85 жүргізуші, «такси болып, заңсыз жолаушы тасымалдағаны үшін» осы кодекстің 463-бабының 1-бөлігімен 2 азамат әкімшілік жауапкершілікке тартылса, «Қоғамдық орында «такси» деп айқайлап қоғамның мазасын алғаны» үшін 15 көлік иесінің үстінен 449-баптың 1 бөлігімен әкімшілік хаттама толтырылып, тиісті шара қолданылды.

Өкінішке қарай, құқық бұзушылар арасында жүргізушілік куәлігін мүлдем оқып, алмаған азаматтар да бар. Көлік айдауға құқығы жоқ болса да, олар темір тұлпардың тізгініне жармасады. Іс-шара кезінде осындай 40 «жүргізуші» ұсталып, ӘҚБтК-нің 612-бабының 2-бөлігі бойынша жауапқа тартылды. Оның ішінде мопед айдаған 12 азамат та бар. Бұдан басқа, ҚР ӘҚБтК-нің 573 және 590-баптың талаптарын бұзған 45 адам тоқтатылса, жаяу жүргіншілерге жол бермеген 116 жүргізушіге де 615-баптың талаптарына сәйкес шара қолданылды. Іс-шара барысында 67 автокөлік арнайы тұраққа қойылды.

Осындай мемлекеттік белгісі дұрыс емес, полиция бөлімінің рұқсатынсыз көлігін қайта жабдықтаған, мемлекеттік немесе міндетті техникалық қарап-тексеруден өтпеген, көлік құралын басқару кезінде ұялы телефон қолданған, маневр жасау қағидаларын бұзған, күндізгі мезгілде жарық беру шамдарын жақпаған, басқа да құқық бұзушылық деректері көптеп анықталды.

Жалпы, аудан аумағында «Қауіпсіз жол» жедел профилактикалық іс- шарасы кезінде ірі жол-көлік оқиғасы тіркелмеді. Ауданның барлық тас жолдарында жол оқиғаларының алдын алу мақсатында жүргізушілерге автокөлікті жылдамдықты асырмай, жол жүру ережелерін қатаң сақтап жүргізу туралы ескертпе беріліп, күшейтілген бағытта жұмыстар атқарылып келеді.

Әділет Сәлімов,

аудандық полиция бөлімінің патрульдік полиция

ротасының командирі, полиция капитаны

#ЗАҢМЕНТӘРТІП

Жасөспірімдер арасында есірткі және токсикоманияға бейімділіктің алдын алу — қоғам үшін аса маңызды әрі өзекті мәселелердің бірі болып табылады. Осы мақсатта Атырау облысы полиция департаментінің Жергілікті полиция қызметі бөлімінің қызметкерлерімен кездесу ұйымдастырылды. Іс-шараға Есірткі қылмысына қарсы іс-қимыл басқармасы бастығының орынбасары полиция полковнигі Роман Ермұханов пен Атырау облыстық психикалық денсаулық орталығының психиатр-нарколог дәрігері Талғат Есенгельдин қатысты.
Кездесу барысында тәртіп сақшыларына жасөспірімдердің есірткі және токсикоманияға бейімделуінің бастапқы белгілерін анықтау әдістері бойынша практикалық ұсыныстар берілді. Сондай-ақ, есірткі заттарын жасырған адамдар анықталған жағдайда қолданылатын іс-қимыл алгоритмі көрсетілген жадынамалар таратылды.

Аталған шара полиция қызметкерлерінің кәсіби даярлығын арттырып, жасөспірімдер арасында құқық бұзушылықтың және есірткіге бейімділіктің алдын алуға бағытталған.

#ЗАҢМЕНТӘРТІП

Құрметті жүргізушілер!

Жол қозғалысы қауіпсіздігін сақтау – әрбір жүргізушінің азаматтық әрі адами борышы. Әсіресе, тас жолдарда жылдамдықты шектен тыс арттыру – ең қауіпті құқықбұзушылықтардың бірі болып табылады.

Жоғары жылдамдық — жүргізушінің жолдағы жағдайды бақылау қабілетін төмендетіп, апатқа әкеп соқтыруы мүмкін. Адам өміріне қауіп төндіретін жол-көлік оқиғаларының басым бөлігі жылдамдықты шамадан тыс асыру салдарынан орын алады.

ҚР жол қозғалысы ережесіне сәйкес, әрбір жүргізуші белгіленген жылдамдық шегін сақтауға міндетті. Жолдың жағдайына, ауа райына, көліктің техникалық мүмкіндігіне қарай жылдамдықты ақылмен реттеп отыру – қауіпсіз қозғалыстың басты талабы.

Құрметті жүргізушілер! Сіздің бір сәттік асығыстығыңыз өзіңізге де, өзгелерге де орны толмас қайғы әкелуі мүмкін. Отбасыңыздың, жолаушылар мен басқа жол қозғалысына қатысушылардың өміріне қауіп төндірмеңіздер.

#ЗАҢМЕНТӘРТІП

Республика көлемінде өткізіліп жатқан «Қауіпсіз жол» жедел-профилактикалық іс-шарасы аясында 11 мамыр күні Атырау қаласы, Досмұхамедов көшесіндегі №11 мектеп тұсында маркасы Hyundai Elantra автокөлігі тоқтатылды. Тексеру кезінде жүргізушіден алкогольдік ішімдіктің иісі сезілуіне байланысты сараптамаға жеткізіліп, жүргізушінің жеңіл дәрежеде мас күйде екені анықталды. Аталған дерек бойынша жүргізушіге қатысты ҚР ӘҚБтК-нің 608-бабы 6-бөлігіне сәйкес хаттама толтырылып, іс әкімшілік мамандандырылған сотқа жолданды.

Сонымен қатар, Сәтбаев және Неграсов көшелерінің қиылысында маркасы Toyota Camry автокөлігі тоқтатылды. Тексеру кезінде жүргізушінің бұрын сот шешімімен көлік құралын басқару құқығынан айырылғаны анықталды. Осыған орай, жүргізушіге қатысты ҚР ӘҚБтК-нің 612-бабы 3-бөлігіне сәйкес хаттама жасақталып, іс сотқа жіберілді.

Сондай-ақ, Жұмыскер мөлтек ауданындағы 20-көше бойында «Қорғау» жүйесі арқылы маркасы Nissan Quest шетелдік автокөлігінің қала аумағында төленбеген 19 айыппұлы бары анықталды. Осыған байланысты автокөлік айыппұл тұрағына қойылды.

Құрметті жүргізушілер! Сіздерден жол қозғалысы ережелерін қатаң сақтап, жолда абай болуларыңызды сұраймыз. Ережені сақтау — қауіпсіздіктің кепілі.

Қазақстан Республикасы Президентінің 2025 жылғы 30 сәуірдегі Жарлығымен Алтыналиева Мөлдір Даулетбекқызы, Ишахатова Әйгерім Әділқызы Атырау қаласының №2 сотының судьясы лауазымына, Құралбеков Асылжан Сейітжапарұлы Атырау қаласының әкімшілік құқық бұзушылық жөніндегі мамандандырылған сотының судьясы лауазымына, Аязов Алмас Құралбекұлы, Қонысбаев Жақсылық Жахангерұлы Атырау облысы Жылыой аудандық сотының судьясы лауазымына, Құлманова Аида Жалғасбекқызы Атырау облысы Индер аудандық сотының судьясы лауазымына тағайындалды.

Мөлдір Алтыналиева 1991 жылы Батыс Қазақстан облысында туған. М.Өтемісов атындағы БҚО мемлекеттік университетін бітірген.

Сот жүйесіндегі өз еңбек жолын 2013 жылы Атырау қаласының №2 сотының бас маман – сот мәжілісінің хатшысы лауазымынан бастап, кейін қызметін Астана қаласының қылмыстық істер жөніндегі ауданаралық сотының бас маман – сот мәжілісінің хатшысы лауазымында жалғастырып, қазіргі тағайындалуға дейін қызмет атқарды. Қазақстан Республикасы Жоғарғы Соты жанындағы Сот төрелігі академиясының түлегі.

Ишахатова Әйгерім 1991 жылы Атырау облысында туған. Л.Гумилев атындағы Еуразия ұлттық университетін бітірген.

Сот жүйесіндегі өз еңбек жолын 2013 жылы Астана қаласының соттарында бас маман – сот мәжілісінің хатшысы лауазымынан бастап, қазіргі тағайындалуға дейін қызмет атқарды. Қазақстан Республикасы Жоғарғы Соты жанындағы Сот төрелігі академиясының түлегі.

Асылжан Құралбеков 1989 жылы Қарағанды облысында туған. Қарағанды қаласының экономикалық университетін бітірген.

Сот жүйесіндегі өз еңбек жолын 2015 жылы Астана қаласының мамандандырылған ауданаралық экономикалық сотының бас маман – сот мәжілісінің хатшысы лауазымынан бастаған. Кейін заңгерлер кеңесінің мүшесі ретінде еңбек етті. 2024 жылы Астана қаласының қорғаушылар алқасының қорғаушысы лауазымында болып, қазіргі тағайындалуға дейін қызмет атқарды. Қазақстан Республикасы Жоғарғы Соты жанындағы Сот төрелігі академиясының түлегі.

Алмас Аязов 1982 жылы Оңтүстік Қазақстан облысында туған. М.Сапарбаев атындағы Оңтүстік Қазақстан гуманитарлық институтын бітірген.

Сот жүйесіндегі өз еңбек жолын 2004 жылы бастап, Оңтүстік Қазақстан облысы соттарында түрлі лауазымдарда еңбек етті.

2023 жылы Кентау қаласы Қарнақ ауылы округі әкімдігінің заңгері лауазымында болып, қазіргі тағайындалуға дейін қызмет атқарды.

Жақсылық Қонысбаев 1992 жылы Жамбыл облысында туған. Астана қаласының Тұран университетін бітірген.

Өз еңбек жолын 2019 жылы Жамбыл облысы әкімдігі бөлімінің бас маманы лауазымынан бастаған. Әр жылдары Жамбыл облысының және Астана қаласының соттарында түрлі лауазымдарда болып, қазіргі тағайындалуға дейін қызмет атқарды. Қазақстан Республикасы Жоғарғы Соты жанындағы Сот төрелігі академиясының түлегі.

Аида Құлманова 1988 жылы Қызылорда облысында туған. Қорқыт ата атындағы Қызылорда мемлекеттік университетін бітірген.

Өз еңбек жолын ЖШС-де заңгер болып бастаған. Әр жылдары Астана қаласының және Қызылорда облысының соттарында жетекші маман, бас маман – сот мәжілісінің хатшысы, кеңсе меңгерушісі лауазымдарында болып, қазіргі тағайындалуға дейін қызмет атқарды. Қазақстан Республикасы Жоғарғы Соты жанындағы Сот төрелігі академиясының түлегі.

М.Парменов судьяларды тағайындалуларымен құттықтап, олардың сот төрелігіне деген сенімді нығайту жолындағы қызметіне сәттілік және судьялық антқа адал болуды тіледі.

Амандық АБДОЛ

#ЗАҢМЕНТӘРТІП 

9 мамыр күні сағат 10:36-да Атырау қаласы Полиция басқармасы Жедел басқару орталығының инспекторы «Ретропарк» саябағы алдында мотокөліктердің жиналғанын анықтап, патрульдік полиция қызметкерлерін бағыттады. Оқиға орнына барған инспекторлар қоршаған ортаны ластаған мопед жүргізген 3 жасөспірімді анықтап, оларға ҚР ӘҚБтК-нің 434-2-бабымен хаттамалар толтырды. Саябақта жиналған 50-ден астам мотокөлік жүргізушілеріне түсіндіру жұмыстары жүргізіліп, құжаттары тексерілді. Тексеру кезінде 8 мотокөліктің құжаттары толық болмай шықты. Оның ішінде 7 көлік айып тұрағына қойылып, оларды 7 жасөспірім жүргізгені белгілі болды. Бір жасөспірімнің ата-анасына ҚР ӘҚБтК-нің 127-бабымен хаттама толтырылды, тағы біріне қатысты материалдар жинақталуда.

Сонымен қатар, 5 жасөспірімге ҚР ӘҚБтК-нің 612-бабы 2-бөлігімен және 590-бабы 2-бөлігімен хаттамалар және 18 жасқа толған жүргізушіге 612-баптың 4-бөлігімен 1 хаттама рәсімделді.

Атырауда Ұлы Отан соғысының және Ішкі істер министрлігінің ардагері, милиция полковнигі Биғамбаев Қабдыраш Биғамбайұлын еске алуға арналған жасөспірімдер арасындағы XIII республикалық еркін күрес турнирі өтті.

Турнирге 2010, 2011 және 2012 жылы туған 200-ге жуық жас балуан қатысты. Жарыс бозкілем шеберлерінің басын қосып қана қоймай, өскелең ұрпаққа батыр ардагердің ерлігі мен елге сіңірген еңбегін үлгі етуге бағытталды.

Шараның салтанатты ашылу рәсімінде Атырау облысы полиция департаментінің бастығы полиция генерал-майоры Нұрхат Оразбаев турнирдің маңыздылығын атап өтіп, қатысушыларға сәттілік тіледі.

- Бұл турнир — Қабдыраш Биғамбайұлы сынды халқына адал қызмет еткен тұлғаны ұлықтаудың айқын көрінісі. Осындай жарыстар жас спортшыларға тек спорттық шеберліктерін шыңдауға емес, Отанға деген сүйіспеншілікті арттыруға да ықпал етеді. Бүгінгі балуандар — ертеңгі ел қорғаны. Барша қатысушыларға сәттілік тілеймін, — деді департамент бастығы.

Турнир нәтижесінде жеңімпаздар мен жүлдегерлер анықталып, арнайы марапаттарға ие болды.

Айта кетейік, Ұлы отан соғысының жауынгері Қабдыраш Биғамбаев әскер қатарына 1944 жылы алынып, 13-атқыштар дивизиясының 365, 92 және 742-ші атқыштар полктерінде бөлімше командирі кызметін атқарады. 1959 жылдан бастап облыстық ішкі істер органдарында түрлі жауапты лауазымдарда еңбек етті. Қоғамдық тәртіпті қорғау басқармасында, кылмыстық іздестіру бөлімінде және қалалық ішкі істер бөлімінде басшылық қызметтер атқарып, кейін облыстық фельдегерлік қызмет бөлімін 12 жыл бойы басқарды.

 Жақында аудандық сот ғимаратында «Билер Кеңесі» қоғамдық бірлестігінің кезекті отырысы өтіп, өңірдегі билер дөңгелек үстел басында бас қосып,жасалған жұмысы мен алдағы атқарылар қызметін талқыға салды.

Онда аудандық қоғамдық бірлестіктің қоғамға тигізіп жатқан пайдасының көп екендігін, сотқа дейінгі дау-дамайға араласып, әртүрлі шешімін таба алмай келген мәселелердің түйінін тарқатып, көптеген отбасының бұзылмай, шаңырағын сақтап қалуға, адамдар арасындағы басқа да даулардың шешілуіне септігін тигізіп жатқаны айтылды.
  -Аудандық «Билер Кеңесі» қоғамдық бірлестігі 2018 жылы қараша айында құрылды. Содан бері қоғамға тигізген ықпалы зор, әлі де билеріміздің берері көп, ақыл-кеңесін аямай татуластырып, көмек сұрап келген әрбір азаматқа өз қызметін  көрсетберелі. Қара қылды қақ жарған, турасын айтып, әділдікке жүгінген қаймана халықтың ұрпағы бүгінгідей өз алдына ел болып, еңсесі биік дамыған мемлекеттің қатарына жетуді көздеп отырған шақта сол адами қалып-парасат биігінен көрінуге тиіспіз- деген бірлестік төрағасы Гүлайым Есенова билерімізге серт қабылдатып, төсбелгілер табыстады.
   Сонымен қатар, «Билер Кеңесі» қоғамдық бірлестігінің құрылғанынан бастап күні бүгінге дейін жұмысын тоқтатпай қоғамға өз үлесін тигізіп, Атырау аймағының мәдени-бұқаралық дамуына және ауданның Билер кеңесі жұмысының өрістеуіне қосқан үлесі үшін аудандық ардагерлер қоғамының мүшесі, республикалық «Құлсары» газетінің  бас редакторы, зейнеткер Әбдіхалық Сисенбердиевті «Атырау облысының ардақты ардагері» алтын медалімен марапаттады.

  Бұл ауданның Билер кеңесі мен оның мүшелерін көрсетілген зор құрмет болды.

Гүлзада Жанғазиева,

аудандық сот әкімшісінің

аға сот приставы