Қоғам

 Қазақстан Халық Кеңесінің Төрағасы Ерлан Қошанов Батыс Қазақстан облысына жұмыс сапарымен барып, «Жаңа қоғамдық этика: мәдениет, әдеп, әдет» атты республикалық форумға қатысты. Бұл – Президент тапсырмаларын жүзеге асыру аясында конституциялық органның өңірлерде өткізген алғашқы іс-шарасы. Диалог алаңында мыңнан астам қоғам өкілі, белсенді аналар мен сарапшылар бас қосты.

Алдымен Ерлан Қошанов Мемлекет басшысы Қасым-Жомарт Тоқаевтың форум қатысушыларына арналған құттықтау хатын оқып берді. Президент республикалық форумының ашылуымен құттықтап, Қазақстан Халық Кеңесінің ұйымдастыруымен өткізіліп жатқан алқалы жиын ұлттық тәрбие мен қоғамдық мәдениеттің сабақтастығын дәріптейтін маңызды іс-шара екенін атап өтті. 

«Конституция – еліміздің өсіп-өркендеуіне жол ашатын қастерлі құжат әрі халқымыздың жаңа дәуірдегі болмыс-бітімін айқындайтын темірқазық. Сондықтан бәріміздің алдымызда тұрған аса маңызды мақсат – Конституциямыздың басты құндылықтары мен маңызын халық арасында, әсіресе, жастарға жан-жақты түсіндіріп, кең ауқымда дәріптеу. Өйткені, қазіргідей құбылмалы, тұрақсыз және күрделі уақытта мемлекеттігіміздің мыңдаған жылдық тарихы мен дәстүрін жадымызда сақтай отырып, жұртымыздың бойына озық ойлы ұлтқа тән игі құндылықтарды сіңіру аса өзекті міндет саналады» – делінген құттықтауда.

Сонымен қатар Мемлекет басшысы өркениетті ел болу қастерлі Отанымыздың мүддесі үшін тұтас қоғам болып табанды еңбек етуден басталатынына ерекше мән берген. Себебі, еңбекті қадірлейтін қоғамның азаматтары әр іске зор жауапкершілікпен, жанашыр жүрекпен және адал ниетпен қарайтыны сөзсіз.

«Біз тұтас қоғам болып «Таза Қазақстан» жалпыұлттық бастамасын қолға алдық. Бүкіл ел бойынша тазалық іс-шараларын жүргізіп, осы қасиетті ұғымның терең мағынасын жұртымыздың, әсіресе, жастарымыздың санасына сіңіре бастадық. Осылайша, тазалық ұлт болмысының ажырамас бөлігіне, халқымыздың мызғымас құндылығына айналуда. Біз заң мен тәртіп үстемдік құратын, білім мен ғылымға, инновацияға баса мән беретін, бірлігі бекем, Әділетті, Қауіпсіз, Күшті әрі Таза Қазақстанды құрып жатырмыз. Осы маңызды миссияны жүзеге асыруға мемлекеттік мекемелермен қатар, тұтас қоғам, яғни әр отбасы, әр азамат, сондай-ақ қоғам белсенділері, ұстаздар қауымы және еріктілер күш біріктіріп, белсене атсалысуы керек. Бүгінгі басқосуда айтылатын ұтымды ұсыныстар мен тың идеялар осы мақсат-міндеттерді іске асыруға ықпал етеді деп сенемін», – делінген Президент құттықтауында. 

Ерлан Қошанов өз сөзінде Мемлекет басшысы алға қойған ауқымды міндеттерді іске асыруда Халық Кеңесінің белсене атсалысатынын атап өтті. Конституциялық консультативтік органның басты миссиясы – жұртшылықты Президент реформалары мен бастамалары төңірегінде топтастыру.

«Бүгінгі әңгіме – Отан мен отбасы туралы әңгіме, болашақ туралы әңгіме. Әдеп пен әдет, қоғамдық этика арқылы ұлттың жаңа сапасын қалыптастыру туралы кеңес. Конституциямен бірге қоғамның сана-сезімі мен дүниетанымында да терең әрі маңызды өзгерістер орын алып жатыр. Президент әрбір қазақстандықтың туған тілін құрметтейтін, салт-дәстүрін сақтайтын, үлкенді сыйлап, білімге ұмтылатын, сонымен қатар әлемге ашық азамат болғанын қалайды. Осы қасиеттер отбасындағы тәрбиеден басталып, «Заң мен тәртіп», «Таза Қазақстан», «Адал азамат» қағидаттары арқылы қалыптасуы тиіс», – деді Е. Қошанов.

Халық Кеңесінің Төрағасы Президент Қасым-Жомарт Тоқаевтың реформалары жеті жыл ішінде ел өміріне елеулі өзгерістер әкелгенін айтты. Жаңа экономикалық саясат экономиканы әртараптандыруға, әлеуметтік әділдікті нығайтуға мүмкіндік берді. Кейінгі жеті жылда Қазақстанның ішкі жалпы өнімі 181,7 млрд доллардан 306 млрд долларға дейін өсті. Жан басына шаққандағы ішкі жалпы өнім 9,8 мың доллардан 15 мың долларға жетті. 25 мың шақырым жол салынды. 1 300 жаңа мектеп бой көтерді, «Келешек мектептері» жобасы аясында 217 мектеп салынды.  

Президент бастамасымен тәуелсіздік жылдарында бұрын-соңды болмаған ауқымды реформалар жүзеге асырылды. Бүгінде Қазақстан экономикалық тұрғыда да, әлеуметтік, мәдени-рухани тұрғыда да дамудың жаңа кезеңіне қадам басуда. 

«Осы жаңғыру үдерістерінің шарықтау шегі – жаңа Халық Конституциясы. Онымен бірге бүгінде адамдардың жүрегі мен санасында терең әрі маңызды өзгерістер орын алуда. Реформалар елімізді бүгін өзгертсе, құндылықтар оның елу жылдан кейін қандай болатынын айқындайды. Сондықтан Президент күнделікті өмірдің ажырамас бөлігіне айналуға тиіс қоғамдық құндылықтар мен бағдарларды жүйелі түрде қалыптастырып келеді», – деді Ерлан Қошанов. 

Отырыс барысында форум қатысушылары тәрбие мәселесі, қоғамдағы адамгершілік құндылықтардың рөлі, білім беру және кітап оқу мәдениетін дамыту сияқты бірқатар маңызды мәселені ортаға салды. 

Қазақстан Халық Кеңесінің мүшесі Наталья Дементьева әскери бөлімдердегі моральды-тұрмыстық жағдайларды жақсарту мәселесін көтерді.

Бұл бағыт Халық Кеңесінің жұмысы аясында одан әрі жалғасын табады. Әскери бөлімдердегі жағдайды зерделеп, әскери қызмет өткеруді кезең-кезеңімен жақсарту шараларын айқындау жоспарланып отыр. 

Тағы бір маңызды мәселе – жастарды жұмыспен қамту. «Жаңа мүмкіндік» қоғамдық бірлестігінің жетекшісі Арман Түлкібаев сұранысқа ие мамандықтарды меңгеріп, жұмысқа орналасуға көмектесетін «JOLTAP» жобасын іске асыру тәжірибесімен бөлісті. Осы тәжірибені кеңінен қолдану перспективаларына, соның ішінде ауыл жастарының кәсіби білім алып, жұмысқа орналасу мүмкіндіктерін кеңейтуге мән берілді.

Кездесу барысында Халық Кеңесінің мүшесі, Республикалық Аналар алқасының төрайымы Назипа Шанаи және Құрылтай депутаты Снежанна Имашева мен облыс басшылығы да сөз сөйледі.

Сонымен қатар «Наири» ҚР армян мәдени орталықтарының қауымдастығы» ЗТБ Аналар алқасының төрағасы Татьяна Мурадян қоғамдық этика туралы сөз қозғаса, «Түркістан облыстық ата-аналар қауымдастығы» қоғамдық бірлестігінің төрағасы Ақбаян Жакипова әйелдер құқығын қорғау мәселесін көтерді. Ал қоғам қайраткері, ауған этномәдени бірлестігінің мүшесі Анна Мохаммад адал азамат туралы өз пайымымен бөлісіп, Амангелді ауылдық кітапханасының меңгерушісі Гүлсім Искалиева кітап оқитын ұлт мәселесін қозғады. 

Форум мемлекет пен қоғам арасында ашық пікір алмасу алаңына айналды. Алқалы жиын қоғамдық құндылықтарды нығайтуға, азаматтық жауапкершілікті арттыруға және қоғамдық әдепті қалыптастыруға бағытталған ел дамуының стратегиялық бағыттары мен нақты бастамаларды ұштастырды.

Атырау облыстық Жастар мәслихаты мен «Даму» кәсіпкерлікті дамыту қорының Атырау облысы бойынша аймақтық филиалы арасында ынтымақтастық туралы меморандумға қол қойылды.

Құжатқа Атырау облыстық Жастар мәслихатының төрағасы Жанболат Ізімғұтов пен «Даму» қорының Атырау облысы бойынша аймақтық филиалының директоры Берік Қадыров қол қойды.

Меморандумның негізгі мақсаты – өңір жастарының кәсіпкерлік бастамаларын қолдау, қаржылық сауаттылығын арттыру және мемлекеттік қолдау бағдарламалары туралы ақпараттандыру.

Келісім аясында жастарға арналған семинарлар мен тренингтер өткізу, табысты кәсіпкерлермен кездесулер ұйымдастыру, сондай-ақ «Жастар кәсіпкерлігі мектебі» жобасын іске асыру жоспарланып отыр.

Аталған ынтымақтастық жастардың кәсіпкерлік әлеуетін дамытуға, бизнес-идеяларын жүзеге асыруға және мемлекеттік қолдау тетіктерін тиімді пайдалануға мүмкіндік береді.

Тараптар бірлескен бастамалар арқылы өңірдегі жастар кәсіпкерлігін дамытуға және жаңа буын кәсіпкерлерінің қалыптасуына үлес қосуды көздейді.

Премьер-министрдің орынбасары – ұлттық экономика министрі Серік Жұманғарин Үкімет отырысында осы жылдың 9 айындағы әлеуметтік-экономикалық даму туралы баяндады. Оның деректері бойынша өсім шикізатқа қатысты емес сектор есебінен қамтамасыз етілді, бағалау бойынша 5,4%-ға өсті.

«Қазақстан экономикасы өсуін жалғастыруда және оң динамиканы көрсетуде. Осы жылдың тоғыз айының қорытындысы бойынша экономиканың өсуі 4,2%-ды құрады. Экономиканың өсуі шикізатқа қатысты емес сектор есебінен қамтамасыз етілді, ол бағалау бойынша 5,4%-ға өсті. Салалар арасында құрылыс, өңдеу өнеркәсібі, көлік қызметтері және сауда ең жоғары қарқын көрсетуде. Осы салалардың жалпы ішкі өнімнің өсуіне қосқан жиынтық үлесі 75%-дан асады»,
 — деп атап өтті вице-премьер.

Серік Жұманғарин экономиканы кезең-кезеңімен әртараптандырудың нәтижесінде 2025 жылдың қорытындысы бойынша жалпы ішкі өнім құрылымындағы мұнай өндіру үлесі 7,8%-ға дейін қысқарғанын атап өтті. Осы жылғы бірінші жартыжылдықтың қорытындысы бойынша өңдеу өнеркәсібінің үлесі 14,1%-ға дейін ұлғайды, ал тау-кен өндіру өнеркәсібінің үлесі 12,4%-ды құрады.

@KZgovernment

2026 жылғы қаңтар-маусымдағы өндіріс әдісімен ЖІӨ көлемі (есепті деректер бойынша) 71 215 382,4 млн. теңгені құрады.

Өткен жылдың тиісті кезеңімен салыстырғанда ЖІӨ нақты мәнде 4,1%-ға өсті.

Жалпы өңірлік өнімнің (ЖӨӨ) өсу қарқынының ең жоғары көрсеткіштері Ұлытау (15,3%), Түркістан (13,3%) және Солтүстік Қазақстан (11,4%) облыстарында байқалды.

2026 жылғы қаңтар-маусымда ЖІӨ құрылымында ең үлкен үлесті Алматы қаласы (20,2%), Астана қаласы (12,5%) және Атырау облысы (11,7%) иеленді.

ЖІӨ өсіміне ең жоғары үлесті Алматы қаласы (0,68 п.т), Астана қаласы (0,62 п.т) және Алматы облысы (0,47 п.т) қосты.

11 қазанда Атырауда BINOM SCHOOL мектептер желісінің ұйымдастыруымен BINOM MARATHON 2026 бұқаралық марафоны өтті. Қалада алғаш рет ұйымдастырылған спорттық шараға 3 мың адам қатысып, оқушыларды, ата-аналарды және ұстаздарды біріктірді.

Марафонға қатысушылар 400 метр, 1, 3, 5 және 10 шақырым қашықтықтарда жүгірді. Ұйымдастырушылардың айтуынша, шараның мақсаты – салауатты өмір салтын насихаттау, бұқаралық спортты дамыту және балалардың спортқа қызығушылығын арттыру.

BINOM SCHOOL аймақтық кеңсе директоры Дастан Мұхтардың сөзінше, марафон мектеп қауымдастығының бірлігін нығайтып, балаларға спорттың маңызын іс жүзінде көрсетуге мүмкіндік береді.

«Оқушы, ата-ана және ұстаз бір сапта жүгіргенде, олардың арасындағы байланыс нығайып, ортақ мақсатқа деген ұмтылыс артады. Біздің мақсатымыз – білімді ғана емес, дені сау, белсенді әрі өзіне сенімді ұрпақ тәрбиелеу. BINOM MARATHON алдағы уақытта да дәстүрлі түрде жалғасады деп сенемін», – деді ол.

Шара соңында барлық қатысушыға естелік медаль табысталды. Ал өз қашықтықтарында үздік нәтиже көрсеткен жүгірушілер марапатталып, жеңімпаздар мен жүлдегерлерге арнайы құрмет көрсетілді.

Ұйымдастырушылардың айтуынша, BINOM MARATHON алдағы уақытта да жалғасып, мектеп қауымдастығы арасында салауатты өмір салтын насихаттауға бағытталмақ.

Атырау қаласында «Әділет» партиясы облыстық филиалының ұйымдастыруымен «Әйел өмірі үшін» республикалық айлығы аясында әйелдер марафоны өтеді.

Марафонның мақсаты – әйелдер денсаулығын сақтаудың маңызын насихаттап, сүт безі обырының алдын алу және оны ерте анықтау мәселесіне қоғам назарын аудару.

Күні: 18 қазан, 2026 жыл
Іс-шараның өту уақыты:
Қатысушыларды жинау: сағат 08:00–08:40
Жүгірудің ашылу рәсімі: сағат 08:50
Жүгірудің басталуы: сағат 09:00
Акцияның жабылуы: сағат 10:00

Бағыты: Әлиев көпірінің маңынан Халел Досмұхамедұлы атындағы Атырау университетіне дейін.
Қатысушылар: 18-60 жас аралығындағы әйелдер.

Салауатты өмір салтын қолдап, марафонға бірге қатысайық!

«Әділет» партиясы Атырау облыстық филиалы Әйелдер қанатының ұйымдастыруымен Атырау қаласындағы №7 емханада «Әйел өмірі үшін» республикалық айлығы аясында ашық есік күні ұйымдастырылды. Әйелдер онколог-маммолог пен акушер-гинеколог дәрігерлерден кеңес алып, тексеруден өтті.

Акция аясында партияның қолдауымен облыстағы барлық емханада ашық есік күндері, диагностикалық тексерулер мен кездесулер өткізіліп жатыр. Мамандар сүт безі обырының алдын алу, скринингтен уақтылы өтудің және ауруды ерте анықтаудың маңызы туралы ақпарат беруде.

№7 емхананың профилактикалық бөлімінің меңгерушісі, дәрігер Мәдина Ахметқазиеваның айтуынша, медициналық мекемеде күніне шамамен 50 әйел маммографиялық тексеруден өтеді. Ашық есік күні 250 әйел дәрігерлерге қаралып, медициналық кеңес алды.

– Сүт безі обыры – әлемде әйелдер арасында ең жиі кездесетін қатерлі ісік түрі. Ресми деректерге сүйенсек, Атырау облысында осы диагнозбен есепте тұрған әйелдердің саны 800-ден асады. Оны ерте анықтау үшін профилактикалық тексерулер мен скринингтен тұрақты өтіп тұру қажет. Кейде әйелдер отбасы мен күнделікті тірлікті бірінші орынға қойып, өз денсаулығын кейінге қалдырады. Ал уақытылы тексерілу ауруды ерте кезеңде анықтап, емді дер кезінде бастауға мүмкіндік береді. Сондықтан әр әйел денсаулығына жауапкершілікпен қарап, дәрігерге қаралуды кейінге қалдырмағаны жөн,— деді Мәдина Ахметқазиева.

Ашық есік күніне келген тұрғындардың бірі – Гүлжихан Қарабалина.

– «Әділет» партиясы емханада ашық есік күнін өткізіп жатқанын естіп, тексерілуге келдім. Денсаулықты үнемі қадағалап, жыл сайын дәрігерге қаралған жөн. Мұндай ашық есік күндерінің маңызы зор, — деді ол.

Қазақстан Халық кеңесінің мүшесі, «Әділет» партиясы Атырау облыстық филиалы Әйелдер қанатының жетекшісі Айгүл Әмірғалиеваның айтуынша, халықтың денсаулығы мен медициналық көмектің қолжетімділігі партияның сайлауалды бағдарламасындағы басым бағыттардың бірі.

– Әйел денсаулығын қорғау – қоғамның ортақ міндеті. «Әйел өмірі үшін» республикалық айлығы аясында партия ақпараттық кездесулер мен ашық есік күндерін ұйымдастырып, әйелдердің медициналық ақпарат пен мамандар кеңесін алуына жағдай жасауға атсалысып келеді. Басты мақсатымыз – әйелдердің өз денсаулығына уақытылы көңіл бөлуіне ықпал ету. Осы мақсатта Индер ауданына да іссапармен барып, әйелдермен кездестік. Х.Досмұхамедұлы атындағы Атырау университетінің ұжымымен, студент қыздармен де кездесу ұйымдастырдық. Бүгін №7 емханада ашық есік күнін қолға алып жатырмыз, — деді Айгүл Әмірғалиева.