Білім-Ғылым

Есірткі – бұл қоғамның ең түйткілді мәселесі. Ол– адамның көңіл күйін, сана-сезімін, мінез-құлқын бұзатын қауіпті және заңмен тыйым салынған химиялық зат. Осы тұрғыда, ҚР Президенті Қасым-Жомарт Тоқаев Қазақстан халқына биылғы Жолдауында ұлтымызға қауіп төндіретін синтетикалық есірткімен күресті күшейтуді тапсырды.

«Тағы бір маңызды міндет – есірткі саудасына және нашақорлыққа қарсы күрес. Бұл – ұлттың генетикалық қорын аман сақтап қалу мәселесі деген сөз. Есірткі мәселесі ушығып барады. Біз заң мен тәртіп, білім мен парасат үстемдік ететін қоғам құруымыз керек. Азаматтары, әсіресе жастары мәдениетті, жаңашыл әрі жасампаз ұлттың ұпайы түгел. Сондықтан біз өркениетті ел болуға кедергі жасайтын жағымсыз әдеттерден арылуымыз керек»- деді Президент.

Мемлекет басшысы бұдан бұрын, Ұлттық құрылтайдың отырысында елдің болашағына кесірін тигізетін бес кеселге тоқталып, есірткінің, оның ішінде синтетикалық есірткінің таралуы болашақ ұрпақтың әл-ауқатына үлкен қауіп төндіретінін атап өткен болатын.

«Есірткісіз қоғам құру – әрбір қазақстандықтың алдында тұрған міндет» екенін айтқан ол Үкімет алдына бірқатар міндет жүктеді. Сонымен қатар есірткі нарығындағы өзгерістерге жедел ден қою және заңнамалық деңгейде синтетикалық есірткінің жаңа түрлерін енгізу мақсатында бірқатар заңнамалық бастама жүзеге асырылуда.

Бұл ғана емес, Мемлекет басшысының тікелей тапсырмасы бойынша есірткіні интернет арқылы таратқаны үшін қылмыстық жауапкершілік те күшейтілді. Осы ретте, Атырау облысы полиция департаментінің Есірткі қылмысына қарсы іс-қимыл басқармасының үйлестіруімен 2024-2025 жылғы оқу жылы басталғалы 209 мектепте есірткінің зияны туралы дәрістер мен викториналық сабақтар өткізілуде. Сондай-ақ, мектеп оқушыларына деректі фильмдер көрсетіліп, есірткіден аулақ болу қажеттілігі айтылуда.

Мұндағы басты мақсат - балалар мен жасөспірімдерге есірткінің заңсыз айналымына қатысты құқықбұзушылық пен қылмыстық жауаптылықты түсіндіру, нашақорлыққа қарсы теріс иммунитетті қалыптастыру. Қазіргі уақытта Атырау облысы аумағындағы барлық білім беру орындарын толық қамту жоспарда тұр.

Өйткені, есірткіні қолдану мен таратудың салдарын нақты түсіндіре отырып мектеп оқушыларына, олардың ата-аналарына үнемі семинарлар мен дәрістер өткізу осы мәселелердің алдын алуға ықпал. Бұған дейін, полиция тарапынан нашақорлыққа қарсы 550 алдын алу іс-шарасын ұйымдастырып, шараға 10 мыңнан астам жасөспірім мен жастар қамтылды.

Айта кету керек, жыл басынан бері Атырау облысы полиция департаменті Есірткі қылмысына қарсы іс-қимыл басқармасы есірткіге қатысты 120 қылмыс анықтап, 5 келіге жуық синтетикалық есірткі тәркіледі. Бұдан бөлек, аса ірі көлемде есірткі сақтаудың 10 дерегі, есірткі жарнамасын қатысты 5 дерек және есірткіні интернет арқылы сатудың 40 дерегі анықталып, күдіктілер ұсталды. Айта кетейік, қолданыстағы заңға сәйкес, есірткі қылмыстары үшін қылмыстық жауапкершілік 14 жастан басталады. Осыған байланысты, заңның талаптарын сақтауға және басқаларға қатысты құқыққа қарсы әрекеттер жасаудан аулақ болу керектігін ескертеміз. Жасөспірімнің қылмыстық жауапкершілікке тартылуы, оның алдағы өміріне кері әсерін тигізері сөзсіз.

Есіңізде болсын! Қылмыстың құрбаны болмас үшін абай болып, сақтану шараларын да қабылдау қажет. Егер өзіңізге қатысты заңсыз әрекет жасалғалы жатыр деген ой туындаса немесе сондай әрекеттер жасалса, дереу «102» телефон нөмірі арқылы полицияға хабарласыңыз немесе көшедегі кез келген полиция қызметкеріне жүгініңіз.

Шеберлік сағаты технология әлеміне қызығушылығы бар мұғалімдер мен оқушыларды және ата-аналарды біріктірді.
Қатысушылар зымыран жасау және автомодельдеу спортындағы жарыстарға қатысу ережелері мен талаптары туралы ғана емес, сонымен қатар нақты модельдер жасау бойынша практикалық дағдыларды да үйренді.

Іс-шара барысында оқытушылар шағын автокөлік және зымыран моделін жасауға ең қолайлы материалдар мен бөлшектер туралы айтып, алдағы жарыстар туралы ақпаратпен бөлісті. JasUp жобасының менеджері Асқар Алданның айтуынша, шеберлік сабақтарының басты сәттерінің бірі стриммер S6a класты зымыран үлгісін жасау болды.

"Бұл зымыран модельдері жеңіл және шағын құрылым болып табылады. Қатысушылар осындай зымыранды жасап қана қоймай, оны іске қосуға да мүмкіндік алды, бұл шараға қатысушылардың барлығын қызықтырды. Мұндай класты зымыран үлгілері көп жағдайда халықаралық жарыстарда, мысалы, зымыран модельдеу спорты бойынша әлем чемпионаттарында қолданылады, онда ұшу қашықтығы мен биіктігі, сондай-ақ төмендеуді бәсеңдету тиімділігі бағаланады" дейді JasUp жобасының менеджері Асқар Алдан.

Автомодельдеу шеңберінде оқушылар мен мұғалімдер 1:24 автотрассалық моделінің талаптарымен танысты. Бұл үлгілер жарыс жолында жоғары дәлдікпен басқаруды және берілген траектория бойынша қозғалыс жылдамдығын қамтамасыз етеді. Шеберлік сабақтары қатысушыларға осы спорт түрлерінің негіздерімен танысып қана қоймай, жарыстарға әрі қарай қатысуға және күрделі әрі инновациялық үлгілерді жасауға шабыт берді.

Зымыран модельдеу және автомодельдеу жарыстары техникалық дағдыларды ғана емес, сонымен қатар баланың шығармашылық ойлауын жетілдіріп, топта жұмыс істеу қабілетін дамытады.

Александрияда информатикадан IOI-2024 халықаралық олимпиадасы аяқталды. 90 елден келген 350 қатысушының арасында Қазақстанның құрама командасы үш күміс және бір қола медаль жеңіп алды.
Максим Цой — Алматы қаласындағы Республикалық физика-математика мектебінің 10-сынып оқушысы;

Мансұр Таймас — Атырау облыстық №1 «Білім-Инновация» лицей-интернатының 11-сынып оқушысы;

Назар Серазитдинов — Алматы қаласындағы мектептің 11-сынып оқушысы;

Ахмет Иса — Қызылорда облыстық «Білім-Инновация» лицей-интернатының 10-сынып оқушысы.
Команда жетекшілері: Темірлан Сатылханов — ACM бас бапкері, халықаралық және республикалық олимпиадалардың жеңімпазы; Айбар Қуанышбай — IITU магистранты, республикалық және халықаралық олимпиадалар жеңімпазы.
 Бұл жетістікпен қазақстандық оқушылар биылғы жеті беделді халықаралық олимпиадаларға қатысуын қорытындылайды. Біздің құрама командалар IMO (математика), IPhO (физика), IBO (биология), IChO (химия), IOL (лингвистика), IGeO (география) және IOI (информатика) қатысып, нәтижесінде 26 медаль және 1 грамотаға ие болды. Анықтама үшін: жалпы білім беретін пәндер бойынша халықаралық олимпиадалардың жеңімпаздары мен жүлдегерлеріне, оларды дайындаған педагогтарға біржолғы сыйақы беріледі. Алтын медаль жеңіп алған оқушы 1500 айлық есептік көрсеткіш (АЕК) мөлшерінде, күміс медаль үшін – 1000 АЕК, қола медаль үшін – 500 АЕК мөлшерінде ақшалай сыйақы алады.

Мемлекет басшысының 2022 жылғы халыққа Жолдауында айтылған «Жайлы мектеп» ұлттық жобасын орындау мақсатында «Атырау» ықшамауданынан 1200 орындық жаңа «Жайлы мектеп» құрылысы бой көтеріп келеді. Келер жылдың маусым айында «Болашақ» ықшамауданынан 2000 орындық БИНОМ мектебі мен 300 орындық балабақша құрылысы басталады. ТШО демеушілігімен «Береке» ықшамауданынан салынып жатқан 600 орындық мектеп келесі айда пайдалануға беріледі. Бұл жөнінде аудан әкімінің орынбасары Гүлнафис Айшуақова «Digital Kazakhstan: Жаңа замандағы білім беру» тақырыбында өткен аудандық тамыз кеңесінде хабарлады.

БЫЛТЫР 18 903 ОҚУШЫ БІЛІМ АЛДЫ

Гүлнафис Аязберікқызының айтуынша, сонымен қатар, 300 орындық Білім Инновация Лицейінің құрылысы да жоспарда бар. «Жылыой ауданының 2023-2027 жылдарға арналған даму жоспарында» Майкөмген ауылынан №17 орта мектепке 300 орындық жаңа мектеп салу да жобаға енгізілді. Биылғы су тасқынынан зардап шеккен мектеп және балабақша ғимараттарын қайтадан қалпына келтіру, оларды іске қосу жұмыстары жүргізіліп жатыр.

–Мен ауданымызда болған су тасқыны кезінде бір кісідей жұмыла қызмет атқарған ұстаздарға алғыс айтқым келеді. Жаңа оқу жылының қарсаңында сіздермен жүздескеніме өте қуаныштымын. Біздің еліміз дамудың жаңа кезеңінде тұр. Жаңа Қазақстанның басты байлығы - интеллектуалдық капитал, еңбек тұлғасы, инновациялық ойлар. Президент білім саласының алдына маңызды тапсырмалар қойды. Мемлекет тарапынан білім саласы үшін жасалып жатқан қолдау өте көп. Бұл ретте ауданның білім беру саласының материалдық-техникалық базасымен жабдықталу мәселесі оңтайлы шешіліп келеді. Өздеріңіз білесіздер, аудан экономикасы қарқынды даму үстінде, - дей келе, педагогтар қызметіне толайым табыс, жемісті еңбек тіледі.

Иә, жыл сайын тамыз айының соңғы аптасында педагог қауымдар осылай бас қосып, өткен оқу жылын қорытындылап, жаңа оқу жылындағы жаңалықтары мен дайындықтарын пысықтайды. Қаладағы «Кең Жылыой» мәдениет үйінде өткен педагогика қызметкерлерінің аудандық тамыз кеңесі көптеген тақырыптарды қамтыды. Пленарлық сессияның тізгінін ұстаған аудандық білім бөлімі басшысының міндетін атқарушы Гүлжансара Таңатарова өткен жетістіктерді саралап, келер күннің бағыт-бағдарын бағамдап, «Мұғалім» атты мәртебелі мамандық иелерін алдағы оқу жылының басталуымен құттықтау үшін сөз кезегін аудан әкімінің орынбасары Гүлнафис Айшуақоваға берді.

Бұдан соң, Қазақстан Республикасы Оқу-ағарту министрі Ғани Бисембаевтың барша ұстаздар қауымын жаңа оқу жылының басталуымен құттықтаған бейнежазбасы экран арқылы көрсетілді. Онда ол еліміздегі білім сапасы, жеткен жетістіктер мен ұлттық бағдарламаның алдағы міндеттерін атап өтті. Осыған орай «Аудандағы білім саласының жай-күйі: мәселелер мен шешімдер» атты арнайы дайындалған бейнеролик те көпшілік назарына ұсынылды.

Ондағы айтылған жайттарға тоқталсақ: күні бүгін ауданда 20 жалпы орта білім беретін мектеп, 24 балабақша, мектептен тыс 4 мекеме және №2 педагогикалық-психологиялық түзету кабинеті бар. «Баршаға қолжетімді сапалы білім» атты ұлттық баяндамадағы басты міндеттердің бірі – барлық бала үшін сапалы мектепке дейінгі тәрбие мен білім алуға теңдей қолжетімділікті қамтамасыз ету. Бұл ретте аудан бойынша балабақшаларда 5089 бала тәрбиеленуде. Мектепалды сыныптар- да 1647 бала, мектеп жанындағы шағын орталықтарда 319 бала білім алып жатыр. Дегенмен де балабақша кезегінде тұрған бала саны – 1822. Өткен 2023-2024 оқу жылында 18903 оқушы білім алған. Мектептер бойынша сапа көрсеткіші 56,1 %-ды құрайды. Биыл 1 түлек «Алтын белгіге», 29 оқушы «Үздік аттестатқа» ие болған. Ұлттық бірыңғай тестілеуге 593 түлек қатысып, оның ішінде 236 бала мемлекеттік грантқа ие болған. Аудан бойынша ерекше білім алуды қажет ететін оқушылар саны – 271. Оның 150-і №2 педагогикалық-психологиялық түзету кабинетінде білім алды. Биыл жаңадан пайдалануға берілген 150 орындық ғимарат осы ерекше балаларға қызмет жасайтын болады. 2023-2024 оқу жылында конкурс негізінде 117 маман жұмысқа қабылданған. Осы мамандар ішінен «Дипломмен - ауылға» бағдарламасы бойынша 11 жас маман қызметіне кірісті.

EDUS ЭЛЕКТРОНДЫ ПЛАТФОРМАСЫ

Сонымен қатар пленарлық сессияда облыстық білім беру басқармасының бас маманы Дина Стамғали сөз сөйлеп, ауданның білім деңгейі облыс бойын- ша жақсы көрсеткішке ие болғанын атап өтті. «КазРоботикс федерациясы» республикалық қоғамдық бірлестігі филиалының директоры Алдан Асқар «JasUP жобасы: Жылыой ауданы жастарының болашағына инвестиция» тақырыбында баяндама жасады. Бұдан соң Т.Байсырымов атындағы Құлсары гуманитарлық-техникалық колледжі директорының оқу ісі жөніндегі орынбасары Гүлзия Әбілхайырова «Педагогикалық білім берудегі жасанды интеллект негізіндегі жүйелерді қолдану және жаңа платформалармен оқу процесін ұйымдастыру» жөнінде баяндады.

- Колледжіміз 2020 оқу жылынан бастап EDUS электронды платформасы арқылы білім беру жүйесін жүзеге асырады. EDUS білім беру платформасы, ең алдымен, оқу және ұйымдастыру процестерін автоматтандыру, күнделікті оқу функцияларын цифрландыру құралы. Сондықтан мұғалімдердің күнделікті қағаз жұмысын жеңілдету – жүйенің негізгі міндеттерінің бірі. Жүйе бүкіл оқу күнтізбесін жоспарлауға, сабақтар мен үй тапсырмасын ұйымдастыруға мүмкіндік береді. Электрондық сабақтар журналын жүргізуге, студенттердің үлгерімін бақылауға және бағалауға, есептер мен материалдарды автоматтандыруға арналған онлайн құралдарға қол жеткізеді. Интерактивті қосымшалардың арасындағы бүгінгі күннің басты өзекті тақырыбының бірі - чат джи пи ти. Яғни, жасанды интеллект. Жасанды интеллект – білім берудегі ең перспективалы зерттеу бағытының біріне айналды. Жасанды интеллект – адамның интеллектуалдық қабілетін талап ететін тапсырмаларды орындауға қабілетті компьютерлік жүйелерді құрумен айналысатын информатика саласы,-дей келе, бүгінгі колледж студенттері жасанды интеллект әлемін кеңінен пайдаланып жатқанын баса айтты.

Бұдан соң ауданның білім саласына зор еңбек сіңіріп жатқан педагогтар марапатталды. ҚР Оқу-ағарту министрі Ғани Бейсембаевтың жас ұрпақты оқыту және тәрбиелеу ісіндегі елеулі табыстары үшін «Ы.Алтынсарин» төсбелгісін Хадиша Нұрғановаға, «ҚР білім беру ісінің құрметті қызметкері» төсбелгісін Алтынай Дүйсенғалиеваға табыстады. Қазақстан Республикасы Оқу-ағарту министрлігінің алғысхатымен Жұмагүл Қожағұлова, Күнзира Сүндетова, Айжан Сабытаева, Ғалия Боранқұловалар ұлығыланды. Аудан әкімі Жұмабек Қаражановтың Алғыс хатына да бір топ педагогтар ие болды. Солардың қатарында Әсемгүл Мақашева, Жұмабике Ихсанғалиева, Шара Сұлташева, Әйгерім Сарманова, Гүлназ Мұхановалар бар. Елімізде орын алған төтенше жағдай кезінде халықпен бірлесе жұмыс жасап, бірлік пен төзімділіктің үлгісін көрсетіп, қолдау білдірген Мөлдір Әлиева, Назгүл Шарғабаева, Айгүл Мұқанова, Айгүл Ербосынова, Салтанат Жұмағалиева, Алтынгүл Ибраева, Майра Бейісовалар да аудан басшысының алғысхатымен, ал аудандық мәслихат төрағасының алғысхатымен Фарида Төреханова, Балжан Құтова, Роза Мырзағалиева, Гүлназ Жолболдықызы марапатталды.

Тамыз кеңесінің пленарлық сессиясы аудан өнерпаздарының дайындаған концерттік бағдарламасына ұласты.

П.ҚИЗАТОВА

Білім күні Исатай ауданы Жалпы білім беретін Өркен орта мектебінде «Жас сақшы» сыныбы ашылды. Биылғы оқу жылының өз жаңашылдығымен ерекшеленді. Себебі, ІІМ-нің нұсқауына сәйкес, Атырау облысы бойынша қызметтік міндеттерін атқару кезінде өзгенің өмірін құтқару кезінде ерлікпен қаза тапқан бүгінгі күннің батыры полиция кіші сержанты Өтемісов Нұрберген Сисембайұлының атына «Жас Сақшы» Өркен орта мектеп төрінен ашылды.

Мақсаты ауқымды шарада өзгенің өмірін құтқарып ерлікпен қаза болған полицей Өтемісов Нұрберген Сисембайұлының өмір жолы, ерлігі, қызмет атқарған жылдары туралы деректер айтылды. Бұл сынып, оқушыларымыздың патриоттық сезімін арттырып, халқына қызмет ететін ержүрек, жанашыр ұрпақтың жалғасуына өз септігін тигізбек.

#Атырауполиция #ПолицияАтырау #Атыраулықполицейлер #ПолицейскиеАтырау #Атыраулықтәртіпсақшылары #СтражипорядкаАтырау #АтырауоблысыПолицияДепартаменті #ДепартаментполицииАтырау #ИсатайАПБ #МахамбетАПБ #ЖылыойАПБ #ҚұрманғазыАПБ #ИндерАПБ #МақатАПБ #ҚызылқоғаАПБ #АтырауҚПБ

Атырау облысы Жылыой ауданы Құлсары қаласы №9 орта мектебінде ҚР ІІМ-нің нұсқауына сәйкес, қызметтік міндетін атқару кезінде қаза тапқан полиция сержанты Шалқар Көшкінбайұлы Ақымғалиевтің есіміне кадет сыныбы ашылды.
Оқушылар Отанды қорғауға және еліміздің жас ұрпағы үшін нағыз батылдық пен ерліктің үлгісі болуға ант берді. Іс-шарада тәртіп сақшылары батыр полицейдің өмірі, қызмет еткен жылдары, ерлігі туралы айтып берді және бұдан былай сынып оқушылары батырдың есімін мақтанышпен алып жүретін болады.
Кадет сыныбының ашылуы әскери-патриоттық тәрбиені арттыруда ерекше рөл атқаратынына сенімдіміз. Оның тәрбиеленушілері таңдалған жолдың маңыздылығы мен жауапкершілігін сезінеді, сондай-ақ, өздерін қоғамға қызмет етуге арнағандардың ерліктері мен өмірі туралы әңгімелерді естеріне сақтап жүретін болады.

Отан қорғау ісінде ерлік пен батырлықты үлгі тұтып, намыс туын әрдайым жоғары ұстау міндетіміз. Осы бағытта Атырау қаласындағы бейбіт күннің батыры Шалқар Ақымғалиев түлеп ұшқан білім ордасы Береке орта мектебінде қызмет бабында қайтыс болған полицей есіміне «Кадет сыныбы» ашылды. Сыныптың ашылу рәсіміне полиция департаментінің бастығы полиция генерал-майоры Нұрхат Оразбаев, Шалқар Ақымғалиевтің анасы Ләззат Мұқанова мен інісі Мейіржан Көшкінбайұлы қатысты.
Тәлім-тәрбиесі, мақсаты ауқымды шарада өзгенің өмірін құтқарып ерлікпен қаза болған полицей Шалқар Көшкінбайұлының өмір жолы, ерлігі, қызмет атқарған жылдары туралы деректер айтылды. Ал кадет сыныбының алғашқы мүшелері өз Отанының қорғаушысы болуға, қоғамдық жұмыстарда белсенділік танытудағы алғашқы сабағын бастап кетті.
Қазіргі таңда Атырау облысында ержүрек полицей Шалқардың атына өзі оқыған мектептен бөлек Индер, Жылыой және Махамбет аудандарында кадет сыныптары ашылған.

Бүгін 1 қыркүйекте «Ақжар-2» шағын ауданында №44 мектеп-гимназиясы 1-сынып табалдырығын аттаған 70 балаға есігін айқара ашты,-деп хабарлайды Өңірлік коммуникациялар қызметі.
Салтанатты шараға жергілікті атқарушы органдардың өкілдері мен білім саласының ардагерлері қатысты. Қонақтардың қатарында облыс әкімінің орынбасары Жасұлан Бисембиев те болып, жаңа оқу жылының басталуымен құттықтады.

- Бүгін Ақжар-2 шағынауданының тұрғындары үшін қос мереке – жаңа мектеп-гимназия ашылды. Бүгін соның куәсі болып отырмыз. Енді оқушыларымыз алысқа қатынамайтын болды. №44 мектеп-гимназиясы балаларымыздың сапалы білім алатын орнына айналады деген сенімдемін. Алдағы оқу жылы толағай табыстар мен игі жақсылықтарға толы боларына сенімім мол , – деді Жасұлан Бисембиев.

№44 мектеп-гимназиясының директоры Абай Ақмурзиевтің айтуынша, бір ауысымда алты жүз оқушы білім алады. Түстен кейін қосымша сабақтар ұйымдастыру жоспарлануда. Сұраныс артқан сайын екінші ауысымда қосымша сыныптар ашылуы әбден мүмкін, өйткені жақын маңайда шағынаудандар қарқынды түрде салынып жатыр.

Сонымен қатар, өткен оқу жылына дейін басқа оқу орындарында білім алғандардың арасында талапкерлер де бар. Абай Ақмурзиев түсіндіргендей, №44 мектеп-гимназиясында 1-11-сыныптар аралығында толыққанды білім беру үдерісіне барлық жағдай жасалған. Мұнда отыздан астам оқушы сыныбы, оннан астам зертханалық жұмыс кабинеттері, спорт залы мен ойын алаңдары бар. Мектеп 200 орындық акт залымен, асханамен, толық жабдықталған ағылшын тілі кабинетімен, лингафон кабинетімен, еңбекке үйрету шеберханаларымен және жеке атыс тирі бар алғашқы әскери дайындық кабинетімен жарақталған.

Шеберханаларда қыздар аспаздық және тігіншілік (асхана жабдықтары бар), ал ұлдар ағаш ұстасы мен токарлық (станоктар мен тігін машиналары бар) мамандықтарын оқи алады.