Жылыой ауданында білім бөлімінің ұйымдастыруымен «Қош келдің, әз - Наурыз!» атты мерекелік шара өтті.

Мерекелік шараға қатысқан ардагер ұстаз Н.Төлеуов және аудандық білім бөлімінің басшысы А.Қақпанбаева, ішкі саясат бөлімінің басшысы А.Нұрмаханова, жұмыспен қамту, әлеуметтік бағдарламалар және АХАТ бөлімінің басшысы Н.Сауытов мұғалімдер мен оқушыларды Наурыз мейрамымен құттықтап, оқушыларға ұлттық мейрамымыздың мән-мағынасын айтты.

Наурыздықта қазақтың әдет-ғұрыптарына ерекше көңіл бөлінді. Ұстаздар мен оқушылар «Шілдехана», «Тұсау кесу» және «Қымызмұрындық» секілді дәстүрлерін көрініс арқылы көпшілікке жеткізді. Сондай-ақ, дәстүрлі ән, күмбірлеген күй мен мың бұралған би жиналғандарға мерекелік көңіл-күй сыйлады.

Бабаларымыз жаужүрек батыр болған, ұланғайыр жерімізді шашақты найза, асыл қылышпен қорғап, бүгінгі ұрпағына аманаттаған. Ұлттық генімізде де ержүректілік пен жауынгерлік қасиеттер үстем болғанын тарихтан білеміз.

Содан ба, қазақ халқы қашан да ұл баланы отбасының тірегі, елдің қорғаны болуға тәрбиелеген. Көкірегінде намысы, бойында күш-қуаты бар, Отан үшін отқа түсетін әрбір азамат әскер қатарында болып, ел тыныштығын күзетуге өз үлесін қосады. Ата-баба аманаты болып қалған ұлан байтақ қазақ даласын аман сақтап, бейбіт күнде баянды тіршілік ету тәртіп пен тәрбиеге байланысты.

«Тәртіпсіз ел болмайды, тәртіпке бас иген құл болмайды» деп батыр атамыз Бауыржан Момышұлы бекер айтпаған. Ата Заңымызда “Қазақстан Республикасын қорғау – оның әрбір азаматының қасиетті парызы және міндеті” деп айқын жазылған.

Демек, еліміздің азаматтары заңда белгіленген тәртіп пен түрлер бойынша әскер қызметін атқару барысында бір ғана мақсатты көздейді. Ол – Республика қызметінің түбегейлі қағидалары болып табылатын қоғамдық татулық пен саяси тұрақтылыққа, бүкіл халықтың игілігін көздейтін экономикалық дамуға, қазақстандық патриотизмге адал қызмет ету.

Азаматтық борышын ғана өтеп қоймай, осы әскери салада еңбек етемін деп әскер болуды қалаған жастар да елімізде аз емес. Солардың арқасында айбынымыз асқақ, мәртебеміз биік, шекарамыз тыныш. Себебі, біз - өз қуатты әскері бар егемен елміз. Әскери маман боламын деп шешкен жастар ауданымызда да бар. Солардың бірі – жылыойлық Марат Медет Саматұлы.

Ол 2017 жылы Шоқпартоғай ауылындағы мектепті бітіреді. Сол жылы Алматы қаласындағы Қазақстан Республикасы Ұлттық қауіпсіздік комитетінің шекара қызметі академиясына оқуға түседі. 2021 жылы академияны ойдағыдай аяқтайды.

Қазір Ұлттық қауіпсіздік комитеті шекара қызметінде қызмет етеді. Шені - лейтенант. Жерлесіміз абыройлы еңбек етуде. Осындай өрендерге қарап өзге жеткіншектер үлгі алса дейміз.

Өз тілшіміз

№3 жалпы орта білім беретін мектепте «Біздің мектептің түлегі – әскери ұшқыш» тақырыбында сұхбат өтті. Оны алғашқы әскери және технологиялық дайындық пәні оқытушысы А.Абилхайыров ұйымдастырды.

Осы мектепте оқыған талабы таудай жас Елеубай Сағадат Асылұлын тек мектебі ғана емес, барша ауылдастары мақтан етеді. Оның себебі де бар. Ол - Ақтөбе қаласындағы Екі мәрте Кеңес Одағының батыры, Т.Бигелдинов атындағы Әуе қорғаныс күштері әскери институтының курсанты. Болашақ әскери ұшқыш №3 мектепте оқыды, осы білім ұясының 2020 жылғы түлегі.

Елеубай Сағадат кездесуге келген ауылдастары мен мектеп оқушыларына өзі таңдаған мамандық туралы әсерлі әңгімеледі. Институттағы қызықты сәттерімен бөлісті. Жас жеткіншектер оның әңгімелерін зор ынтамен тыңдады. Сағадат оларды Әуе қорғаныс күштерінің әскери институтына оқуға шақырды. Биылғы мектеп түлектеріне ҰБТ-дан жоғары балл жинап, қалаған мамандық иелері болуларына тілектестігін білдірді.

Жоғары сыныптың шәкірттері сұрақтар блогын дайындаған. Мектеп директоры Шолпан Оңғарбаева сөз сөйлеп,  іс-шараға келгені үшін алғысын білдіріп, Е.Сағадатты марапаттады.

Алғашқы әскери және технологиялық дайындық пәні ұйымдастырушысы және оқытушысы А.Абилхайыров та алғысын білдіріп, «Ғасырлар тоғысындағы қазақ жыры» атты кітапты сыйлады.

Өз тілшіміз

Біздің  кейіпкеріміз Қамит Ақылбек жас та болса ізденгіш жан. Қашан да оны көрсеңіз тыным таппай, еңбектенеді де жүреді. Әрине, талаптанған жанға кәсіп те, жұмыс та табылары сөзсіз. Ақылбек қазіргі - заманауи үлгідегі фотографтардың бірі.

Қазір үйде отырып алып, телефонға телміріп, ақша тігіп олжаға ерте кеңелемін деген жастардың көбейіп кеткенін байқап жүрміз. Әсіресе, жасы 20-60 жас  аралығындағы адамдар осы құмар ойынының құрбанына айналған. Біздің елімізде адамдардың ерме екенін, алып-қашпа қауесеттерге сенгіш келетінін жоққа шығармаймыз. Мәселен, қаржы пирамидасын алып қарайық. Оның жарнамасының өзі ауқымды. Әсіресе, сенгіш  әйелдер мен ер азаматтар жарнамасына қарап-ақ тұзаққа ілінеді. Осыған  миллиондаған тиынды өз қолымен санап беріп, опық жеп, өкініштен өзектері өртеніп жүргендер де жоқ емес. Қазір қоғамда 70 пайызға жуық адам осындай ойынқұмарлық пен қаржы пирамидаларының кесірінен сан соғып отыр. Өйткені қаржы пирамидалары өздерін бәс тігетін спорттық ойындармен, букмекерлік орындармен байланыстырып алған. Мәселен, олар онлайн ойындарға ставка тігу арқылы жылдам баюдың жолын ұсынады. Былай алып қарасақ, оңай олжаға батырамыз деп уәде береді. Сондықтан болар, аңғал адамдар осындай пәлеқорлардың құрығына оңай түседі.

«Президент «қарақшылар мен террористік топтардың шабуылы» деп бағалаған елдегі ахуал біртіндеп қалыпқа түсіп келеді» деп хабарлайды Атырау облысының өңірлік коммуникациялар қызметі.

«Берсең – балаға бер!». Тумысынан денсаулығында ақауы бар және ерекше күтім мен білім беруді қажет ететін бүлдіршіндерге арналған Атырау облыстық балаларды оңалту орталығы жаңа құрал-жабдықтармен толықты.

ЕЛІМІЗДЕ МУЛЬТИПЛИКАЦИЯЛЫҚ КИНО ЖАСАЙТЫН 10-НАН АСА КИНОСТУДИЯ БАР. СОҢҒЫ ЕЛУ ЖЫЛДА ҰЛТТЫҚ АННИМАЦИЯМЫЗ ДАМЫП КЕЛЕДІ. АЛАЙДА КЕМШІЛІК ТЕ ЖОҚ ЕМЕС...