Ауданымызда Халықаралық жастар күні ауқымды тойланды.
Жыл сайын 12 тамызда аталып өтетін бұл мереке жас буынның қоғамдағы рөлін айшықтап, белсенділігін арттыруға, сондай-ақ олардың арман-мақсаты мен бастамаларын қолдауға арналды.
Бүгінде аудан халқының саны 86 мыңға жуықтаса, соның 28 мыңға жуығын 14 пен 35 жас аралығындағы жастар құрайды. Бұл өңіріміздің әлеуетті, алға ұмтылған, жаңа серпін әкелетін ең белсенді бөлігі десек артық айтқандық болмас. Мерекелік кеш те сол жас толқынның өнерін, таланты мен жігерін дәріптеуге арналды. «Жастар – өнердің жаңа тынысы» атты салтанатты кеш орталық алаңда ұйымдастырылып, аудан тұрғындарына ерекше көңіл-күй сыйлады. Шара шымылдығын халықтық «Жем аруы» би ансамблі ашып, сахна төрін әуен мен ырғаққа бөледі. Одан кейін арнайы дайындалған «Жылыой жастары» әні орындалып, көрермен қошеметін жаудырды. Жиналғандар ішінде бұл мерекеге алғаш рет келгендер де болды. Олардың бірі – №3 мектептің 8-оқушысы Бибінұр Мақсым. Жалынды жастардың атаулы мерекесін тойлауға шыққан ол концерт туралы ойын білдіріп:
- Маған бұл мереке ұнап жатыр. Жастар мерекесіне алғаш рет қатысып тұрмын. Болашақта бизнес саласында менеджмент бағытында жұмыс істегім келеді. Егер осы ойым жүзеге асса, жақсы жерде білім алып, туған жеріме кері келемін. Және туған қаламды көркейтуге өз үлесімді қосамын,-дейді арманын жасырмай.
Иә, Халықаралық жастар күні 2000 жылдан бері тойланып келеді. Еліміздің тарихы, мәдениеті, бүгіні мен ертеңі жастарға байланысты. Оның үстіне жастар – қай заманда, қай елде болмасын асқақ арман мен үміт, биік ар мен өр намыстың символы. Еліміздегі жас буын өкілдері мемлекетіміздің жаңа келбетін қалыптастырады. Олардың жаңа белестерге деген ұмтылысы жаңа идеялардың туындауына себепші болады. Ал жаңа идея қазақ елінің жаңаруына бағыт алып, «Мәңгілік ел» болуына нық қадам бастайды. Бұл ретте Жылыой жастары да қатардан қалмай, ел еңсесін көтеріп, аудан атын талай сайыстарда шығарып жүр. Бірі әнмен, бірі бимен өнерлерін паш етсе, бірі жаңа жоба ойлап тауып, бірі кәсіпкер атануда. Ауданымыздың мәдениетіне үлес қосып жүрген жастар бұл кеште де төбе көрсетті. Олардың қатарында Индира Темірханова «Сүйіктіме» әнін орындаса, Нұрлыбек Құсман «Кішкентай қыз», Оралхан Қарашаев «Түнгі сыр», Бекет Аманқос «Қош бол дедің» әндерімен көптің көңілінен шықты. Сондай-ақ «Би - би» үлгілі би ансамблі де кештің көрігін қыздырды.
Кеш барысында өңірдің талантты жастары бірінен соң бірі сахнаға көтеріліп, жаңа туындыларын көпшілікке ұсынды. Солардың бірі – жас ақын, әнші, «Тәуелсіздік ұрпақтары» грантының иегері Нұрлыбек Амандықов. Жуырда ғана тұсауы кесілген ән шашуын жылыойлықтарға ұсынған ол:
- Мереке әдеттегідей тамаша өтуде. Бүгінде аудан әкімшілігі жастармен тығыз жұмыс жасауда. Бұл концерт сол игі істің көрінісі іспеттес. Бұдан бөлек өңірдегі қаншама жастың кәсіп бастап, қайтарымсыз грант иегері атанып жатқанын көріп, естіп жүрміз. Бұл ауданның жетістігі үшін әрине жағымды жаңалық. Бүгінде өзім медиа және өнер саласында жұмыс істеп жүрмін. Бүлдіршіндерге арналған қазақ тілді ютуб-арнам бар. Бұл ретте менің командама әкімдіктен үлкен қолдау көрсетілуде. Сондықтан жастарға қолдау білдіретін жанашыр жандарға алғысым шексіз. Өсе берейік, өркендей берейік. Жылыойдың жастары жасасын!-деді жастарды мерекемен құттықтай отыра. Кеш соңында «Таза Қазақстан» экологиялық акциясы аясында концерттен кейін қаланы тазалауға атсалысқан жастар арнайы марапаттар мен сыйлықтарға ие болды. Олар топ-топқа бөлініп, командалық жұмыстың нәтижесін көрсетті. Жасөспірімдер қатысқан игі іс жылыойлықтар үшін ерекше көрініске айналды.
Иә, жастар – елдің ертеңі, ұлттың үміті. Олар – қоғамның жүрек лүпілі, заманның жаңғырығы, болашақтың асыл негізі. Қолында қаламы, жүрегінде оты бар жас толқын – бұл ғасырдың нағыз батырлары. Көңілдерінде асқақ арман, жанарларында нұр ойнаған жас ұрпақ - еліміздің рухани да, әлеуметтік те келбетін қалыптастыратын басты күш.
Жылыойдың жастары жарқыраған жұлдыздай, қараңғыда жол көрсететін шамшырақтай. Олар тек сахнада ғана емес, өмірде де өз орнын таба білген, жігері жанып, арманы алға жетелеген өрендер. Бүгінгі мереке олардың қуанышы, ертеңге деген сенімі мен талпынысының көрінісі.
Д.ДЕРБІС
