Спорт

Таяуда Атырау қаласында ұйымдастырылған үстел теннисі турнирінде аудан жастары топ жарды. 9 команда қатысқан тартысты ойында үздік шығып, чемпион атанған жасөспірімдер аудан абыройын асқақтатты. Дүбірлі дода облыстық білім беру басқармасы балаларға қосымша білім беру оқу-әдістемелік және ғылыми-практикалық орталығының ұйымдастыруымен өтті.

«Балалар-жасөспірімдердің дене шынықтыру даярлық клубтарының» арасындағы сайыс 2008-2011 жылғы жасөспірім балаларды қамтыды. Жарыс шарты бойынша әр ауданнан 2 ұл, 1 қыздан тұратын команда қатысып, олар ортақ ұпай жинау арқылы бақ сынасты. Осындай жауапкершілігі мол облыстық біріншілікке ауданымыздан №15 мектеп оқушысы Гүлсезім Асқарбекқызы, №7 және №6 мектеп оқушылары Медеу Гайдар, Расул Төлешовтер қатысып, маңызды бәсекеде жүлделі І орынды иеленіп қайтты. Балаларының жеңісіне тақымын қысып отырған ата-аналар да қуанып, жаттықтырушылардың төбесі көкке бір елі жетпей, ауданның мерейі үстем болып, тағы бір деңгейге жоғарылады.

Балаларға салауатты өмір салтын ұстанып, шымыр болып өсуіне өз ықпалын тигізетін Жылыой Балалар-жасөспірімдер денешынықтыру даярлық клубы бүгінде өз еңбегінің жемісін көруде. Құрама командаға өз білгенін үйретіп, жарысқа дайындаған мұғалім-жаттықтырушы Досбек Қызылғұлов №15 мектептің дене шынықтыру пәнінің мұғалімі болып жұмыс атқарады. Облыстық біріншілік аясында ол:

-Байқау жоғары деңгейде өтті. Барлық қатысушылар өте жақсы дайындықпен келген. Қай команда болмасын, барлығы да чемпион атанғысы келеді. Ал, ауданның үмітін арқалап барған оқушыларым жаттығу кезіндегі ойынынан да асып түсіп, чемпион болу қолынан келетіндігін көрсетті. Мен оларға ризамын және алдағы сайыстарда тек сәттілік тілеймін, - деді.

Дүбірлі дода қорытындысы бойынша Жылыой Балалар – жасөспірімдердің денешынықтыру даярлық клубы ең үздік деп танылды. Ал ІІ орынды Құрманғазы ауданы иеленіп, ІІІ орынды Қызылқоға командасы қанжығасына байлады. Ал, қалған өзге ауданның сайыскерлері Алғыс хатпен марапатталды.

Д. ІЗБАСАРҚЫЗЫ

Қазақстан мұнайының 125 жылдығына орай мұнайшылар арасында спорттық жарыс өтті. Исатай ауданындағы Балғымбаев кен орнында ұйымдастырылған дүбірлі додаға жеті мұнай компаниясының ардагерлерінен құралған командалар қатысты.

Спорттың бильярд, асық ату, дойбы, шахмат, тоғызқұмалақ, ұзындыққа секіру түрінен болған сайысқа аудандағы «Жылыоймұнай-газ» мұнай-газ өндіру басқармасының зейнеткерлері де сақадай сай дайындалып барған еді.

Спорттың қай-қай түрінен де мықты екендігін көрсете білген біздің ардагерлер бес рет бірінші орын алып, өзге ойындарда екі рет екінші орынды жеңіп алды. Сонымен қатар, үш рет үшінші орынды иеленіп, жеңістің биік тұғырынан көрінді. Нәтижесінде, командалық есеп бойынша жүлделі І орынды иеленіп, ауданның ардагер мұнайшылары қанжығасын алтынмен майлап, чемпион атанып қайтты.

Кезінде ел қазынасын еселеуге атсалысқан мұнайшылар бүгінде сол түлеп ұшқан қара алтын қара шаңырағының абыройын асқақтату үстінде. Бұқаралық спортты дамытуға үлес қосып жүрген ардагерлердің бағындырар биіктері әлі де алда.

Мұстахима ИСАЙНОВА,

басқарманың ардагерлер кеңесінің төрағасы

Жексенбі күні өткен марафон 13 пен 62 жас аралығындағы салауатты өмір салтын ұстанушы тұрғындарды жинады. XYZ қауымдастығы мен Kemel тобы ұйымдастырған "5K Run & Walk" марафонына шетелдік компаниялардың қызметкерлері мен олардың отбасы мүшелері қатысты. Марафонның жалпы қашықтығы 5 шақырымды құрады. Ретро парк - орталық көпір – Ретро парк бағыты бойынша өткен марафон көп адамды біріктірді.

Нигериядан келген Тереза Окерекенің айтуынша, ол Атырауға күйеуімен тура бір жыл бұрын жұмысқа келген. Үш баланың анасы өзін үнемі формада ұстауға тырысады.
- Маған Жайық жағалауында балалармен серуендеген өте ұнайды, жағалау өте әдемі. Анголадағы досым Литисиямен бірге жаяу жүру марафонына қатыстым. Мұндай іс-шаралар жаңа адамдармен танысуға мүмкіндік береді- деді Тереза Окереке. Марафонның ең жас қатысушысы - 13 жасар Ұлан Омаров болды.

Екінші жыл қатарынан ол ересек қарсыластарымен бірге жаяу жүру жарысына қатысуда.

- Марафонға анаммен бірге келдім, 5 шақырым жаяу жүруді жоспарлап отырмын. Мен өзім жүзуге барамын, күн сайын ерте тұрамын. Спортпен шұғылданғанды ұнатамын, өскенде де салауатты өмір салтын ұстанғым келеді,-деді 13 жасар Ұлан Омаров.

Марафонның ең үлкен қатысушысы АҚШ-тан келген 62 жастағы Стив Коннер болды. Ер адам марафонға әйелі Элизабетпен бірге қатысып, 5 шақырым жолды жүгіріп өтті. Жарысқа қатысушылардың айтуынша, олар спортпен саналы түрде айналысады. 57 жастағы Заманбек Жауыр осы марафонның екінші жылы қатарынан жүлдегер атанды.

- Өткен жылы жүгіру бойынша өзімнің жас санатымда үшінші орынды, биыл жаяу жүру бойынша екінші орынды иелендім. Жалпы, 2005 жылдан бастап түрлі қайырымдылық марафондарына қатысамын. Жүгіру және жаяу жүру марафонының қорытындысы бойынша 35 + және 35- номинациялар бойынша 18 жеңімпаз анықталды. Олардың арасында әйелдер де, ерлер де бар.

V Дүниежүзілік көшпенділер ойындары аясында құсбегілік өнері бойынша сынға түскен атыраулық спортшы Арман Қошқаров дүбірлі додаға баптап жүрген екі бірдей бүркітін әкелген.

"Финалда сәтті өнер көрсеттік. Қазақстандық құсбегілердің қай-қайсы да жақсы нәтиже көрсетті. Финалға Нарын есімді құсыммен шықтым. Екінші құсым іріктеу турнирінен өтті, дегенмен, Нарынның жылдамдығы жоғары болды" дейді құсбегі Арман Қошқаров.

Еске сала кетсек, құсбегілік өнер бойынша финалға 10 құс шықты. Қатысушылар арасында Қазақстан, Испания, Ресей, Қырғызстан және басқа да мемлекеттер бар.

Шетелдік спортшылар, туристер Қазақстанда өтіп жатқан V Дүниежүзілік көшпенділер ойындарының жоғары деңгейде өтіп жатқанын айтуда. Солардың бірі Оңтүстік Корея республикасының ұлттық құрама командасының өкілі Хуингмо Канг. Ол біздің түсірілім тобына берген сұхбатында Корея елінен Қазақстанға алғаш рет келіп тұрғанын айтты. "Астанаға бірінші рет келуім. Бұл жер өте әдемі әрі маған қызық болып жатыр. Дүниежүзілік көшпенділер ойынына да алғаш рет қатысуым. Кореялық спортшылар қазақ күресі және алыш күресі түрлері бойынша қатысып жатыр" дейді Оңтүстік Корея республикасының ұлттық құрама командасының өкілі Хуингмо Канг.

Италиядан арнайы келген фотожурналист Федерико Спануды этноауылдан кездестірдік. Қазақстан, соның ішінде Астанаға бірінші рет келіп отырған италияндық әріптесіміз бұл сапардың өте қызық болып жатқанын айтты.

"Бұл елдегі адамдар өте қонақжай, мейірімді. Италияда көшпенділер спорты аса дамымаған. Мен осындай қызықты спорт түрлерінің біздің елімізде де дамығанын қалар едім" дейді ол.

Қырғызстандық бапкер Жаниш Ташматов V Дүниежүзілік көшпенділер ойындарының ашылу салтанаты жоғары деңгейде өткенін атап өтті.

"Көшпенділер ойындарының ашылу салтанаты жоғары деңгейде өтті. Қазіргі уақытта қазақ күресін тамашалап отырмын. Ойындар жоғары деңгейде өтіп жатыр. Қазақ күресі, алыш күресі бойынша спортшыларды алып келдім" дейді Қырғыз Республикасының алыш күресі бойынша бас бапкері Жаниш Ташматов.

Еске сала кетсек, Астана қаласында 8 қыркүйек күні V Дүниежүзілік көшпенділер ойындары басталған болатын.

Бүгін елімізге Париж - 2024 паралимпиадасының жүлдегерлері оралды. Олимпиада оғландарын Астана әуежайында елордалықтар үлкен қошеметпен күтіп алды. Парадзюдо тарихында бұрын-соңды болмаған тарихи жеңіске қол жеткізген Қазақстан XVII паралимпиадасын үлкен жеңіспен аяқтады.
"Паралимпиадаға дзюдодан барлығы он спортшыны алып бардық. Барлық спортшымыздың жүлдемен оралатын мүмкіндігі болған еді. Дегенмен, бес спортшымыз 1 алтын, 1 күміс, 3 қолаға қол жеткізіп отырмыз. Мұның өзі үлкен нәтиже. Тарих жаңарып жатыр. Спортшылардың жетістігіне көңіліміз толады. Енді Лос- Анджелес олимпиадасына дайындаламыз" дейді Парадзюдодан ҚР Ұлттық құрама командасының Бас бапкері Жандос Қиянов.

Паралимпиада кезінде парадзюдодан екі бірдей қола медаль жеңіп алған атыраулық спортшылармен сұхбаттасқан едік. Париж паралимпиадасының қола жүлдегері Жұрқамырза Шүкірбеков барша қазақстандықтарға қолдауы үшін алғыс айтты.

"Париж паралимпиадасында парадзюдодан қола жүлдегер атандым. Бразилиялық палуанмен кездестім. Екінші белдесуде грузиялық палуаннан ұтылдым. Қола жүлдеге таласта франциялық палуанды жеңдім. Негізі алтын медальді көздеп барған едім. Бұйырғаны қола болды. Бізді қолдаған барлық қазақстандықтарға алғыс айтамын" деді Париж паралимпиадасының қола жүлдегері.

Паралимпиаданың парадзюдодан қола жүлдегері Зарина Раифова Париж төріндегі доданың өзі үшін ерекше естеліктерге толы болғанын айтты.

"Паралимпиада кезінде бірінші қарсыласым Қытай палуаны болды. Өкінішке орай, ол қарсыласымнан ұтылып қалдым. Кейін жұбаныш раундында австриялық палуанмен кездесіп, жеңіске жеттім. Италиялық палуанмен қолаға таластық. Нәтижесінде қола медаль иелендім. Бізді үлкен құрметпен, қошеметпен күтіп алып жатқан жерлестеріме, Қазақ еліне алғысым шексіз" дейді Паралимпиаданың парадзюдодан қола жүлдегері Зарина Раифова.

Еске сала кетсек, Париж паралимпиадасын қазақстандық спортшылар үлкен абыроймен аяқтады.

Қазақстандық команда барлығы 9 медаль жеңіп алды. Оның ішінде, 2 алтын, 3 күміс, 9 қола медаль бар.

V дүниежүзілік көшпенділер ойыны аясында Атырау облысының Махамбет атындағы қазақ драма театрының өнер ұжымы Астанаға арнайы келді. Елорда төрінде жасақталған этноауылда атыраулық театр ұжымы қазақ халқының салт-дәстүрлерін дәріптейтін көріністерді қойып жатыр.

"Еліміздің батыс өлкесінде сақталған көрісу, өскелең ұрпаққа бата беру сынды дәстүрлеріміз көпшілікке насихатталуда. Этноауылға келушілер арасында астаналықтар, еліміздің түкпір-түкпірінен келген қонақтар және шетелдік туристер бар" дейді Атырау облысының Махамбет атындағы қазақ драма театрының директоры Сағынтай Көпжасаров.

Еске сала кетсек, бұған дейін V дүниежүзілік көшпенділер ойыны аясында жасақталған этноауылға Атырау облыстық тарихи өлкетанк музейі 200-ден астам экспонаттар, қолөнершілер көптеген бұйымдарын әкелгенін хабарлаған болатынбыз. V дүниежүзілік көшпенділер ойыны аясында 11 қыркүйек күні этноауылда Атырау облысының өнерпаздары мерекелік концерт қояды.

8 қыркүйек күні елорда төрінде V дүниежүзілік көшпенділер ойыны ресми түрде ашылды. Халықаралық додаға Қазақстан Президенті арнайы қатысты.
"Бұл – ұлттық спорт түрлерінен өтетін әлемдегі ең ірі дода. Оны Көшпенділер олимпиадасы деуге болады. Бұл ойындар дала өркениетін жер жаһанға паш етеді. Спорт – өзара құрмет пен сыйластық символы. Спорттың басты миссиясы – халықтар достығын нығайту" деп атап өтті Президент Қасым-Жомарт Тоқаев.

Тарихи оқиғаға куә болғандар қатарында атыраулық делегация да бар. Әлемнің 100 елінен 4000-нан астам спортшы бақ сынасып жатқан халықаралық додаға Атырау облысынан үш спортшы қатысуда. Олар - алыш күресі бойынша Қазақстан Республикасы чемпионатының жеңімпазы Нұржан Сәрсенғалиев, құсбегіліктен Қазақстан Республикасының спорт шебері Арман Қошқаров және дәстүрлі садақ атудан Қазақстан Республикасының спорт шебері Марат Бексұлтан. 3 спортшы, 10 елшіден тұратын атыраулық көшті батыр, Дүниежүзілік көшпенділер ойынының жеңімпазы Сұңғат Закарияев бастап барды.

Атап өтерлігі, "Астана Арена" стадионында өткен шараға Өзбекстан Президенті Шавкат Мирзиёев, Қырғызстан Президенті Садыр Жапаров, Түрікменстан Халк Маслахатының төрағасы Гурбангулы Бердімұхамедов, Татарстан Республикасының Раисы Рустам Минниханов, Саха Республикасының басшысы Айсен Николаев, Моңғолияның бұрынғы президенті Энхбаяр Намбарын, Дүниежүзілік этноспорт конфедерациясының президенті Біләл Ердоған, сондай-ақ ЮНЕСКО, АӨСШК, БҰҰ Дүниежүзілік туризм ұйымы, Түркі мемлекеттері ұйымы, ТҮРКСОЙ, Түркі инвестициялық қоры, Түркі мемлекеттерінің Парламенттік ассамблеясы, Ислам спорт қауымдастығы, Азық-түлік қауіпсіздігі жөніндегі Ислам ұйымының басшылары, Еуропа Одағының Орталық Азиядағы арнайы өкілі және басқа да ресми тұлғалар қатысты.