Олардың қатарында атыраулық спортшылар да бар

Жерлесіміз, парадзюдошы Әнуар Сариев Токиода өтіп жатқан Паралимпиада ойындарында күміс медаль жеңіп алды, деп хабарлайды Атырау облысы өңірлік коммуникациялар қызметі. ​
​
Ақтық сында 60 келіге дейінгі салмақта өнер көрсеткен қазақстандық спортшы Ануар Сариев әзірбайжандық Вугар Ширинлиден жеңіліп қалды. Жартылай финалда Ануар Сариев Венесуэла өкілі Маркос Бланкомен күресіп, иппон тәсілімен таза жеңіске жеткен болатын.​
​
Айта кетейік, Әнуар Сариев 1992 жылы Атырау қаласында дүниеге келген. Ол – паралимпиадалық дзюдодан Қазақстан Республикасы құрамасының мүшесі. Х.Досмұхамедов атындағы Атырау университетінің Дене шынықтыру факультетін бітірген. Көлік апатынан кейін көру қабілеті нашарлаған.

Ерік-жігері мұқалмаған Әнуар өзін спорт саласынан тапты.

60 келі салмақ дәрежесінде B3 класында нашар көретіндер арасында өнер көрсетеді.

Ержан Сәлімгереев Паралимпиада ойындарында алтыншы орын иеленді, деп хабарлайды Атырау облысы өңірлік коммуникациялар қызметі. Токиода өтіп жатқан Паралимпиада ойындарында жүзуден жарыстар жалғасуда. 50 метрде баттерфляй әдісімен жүзуде жерлесіміз Ержан Сәлімгереев жүлдеге іліге алмады. Ержан 33,14 секунд нәтижесімен іріктеу кезеңін жетінші орынмен аяқтады. Ал, финалда 32.53 нәтижесімен алтыншы келді. Айта кету керек, Ержан 1 қыркүйек күні 100 метрде баттерфляй әдісімен жүзуде бағын сынайды. Ендеше, спортшымызға сәттілік серік болғай!

Дзюдошы Ануар Сариев Токио Паралимпиада ойындарындағы екінші кездесуін сәтті өткізіп, финалға жолдама алды.

Ол жартылай финалда венесуэлалық Бланко Маркос Денистен басым түсті.

60 келіде белдесетін балуанымыз алғашқы кездесуінде моңғол спортшысы СухэБатор Ядамдоржды ұтқан болатын.

Финалдағы қарсыласы - әзірбайжандық Вугар Ширинли.

Зарина Байбатина Паралимпиада ойындарының күміс жүлдегері атанды, деп хабарлайды Атырау облысы өңірлік коммуникациялар қызметі. Атыраулық дзюдошы Зарина Байбатина +70 келі салмақта Токио Паралимпиада ойындарында күміс жүлдеге ие болды. Зарина алғашқы кездесуінде моңғол спортшысы Нямаа Алтанцецегті ұтса, жартылай финалда италиялық әлем чемпионатының қола жүлдегері Коста Каролинаны тізе бүктірді. Ақтық сында әзірбайжандық Каримова Дурсадафтан ұтылды. Осылайша Зарина төрт жылдықтың басты бәсекесінде жүлде алған үшінші атыраулық спортшы атанып отыр. Бұдан бұрын Ануар Сариев пен Дәулет Теміржан күміс жүлде иеленген болатын.

Токиодағы паралимпиада ойындарында бақ сынаған парадзюдошы Дәулет Теміржан күміс медальға қол жеткізді.

73 келіге дейін салмақта өнер көрсететін жерлесіміз Дәулет Теміржан Токио олимпиадысының күміс жүлдесін місе тұтты. Финалдық кездесуде ол Өзбекстан спортшысы Феруз Саидовтан таза жеңіліп қалды.Бұл салмақта қола украиналық дзюдошы Руфат Могомедов пен литвалық спортшы Освальдас Барейкиске бұйырды.

Дәулет жартылай финалда грузиялық Гиорги Калданиді 11:1 есебімен жеңіп ақтық сайысқа жолдама алған болатын.

Бұл Қазақстанның Токиода өтіп жатқан Паралимпиада ойындарындағы үшінші медалі. Бұған дейін пауэрлифтингтен 54 келіге дейін салмақта Давид Дегтияров алтын алса, парадзюдошы Әнуар Сариев Қазақстан қоржынына күміс медаль салған болатын.

Елімізден Токиодағы Паралимпиада ойындарына 25 спортшы аттанғанын айта кетейік.