Аудан

Жуырда «Теңізшевройл» ЖШС-нің өкілдері аудан тұрғындарымен кездесіп, өлкедегі әлеуметтік жобалар мен олардың өңірдің өркендеуіне қосқан үлесі жайлы талқылау өткізді. Айта кету керек, бұрын мұндай кездесулер қоғамдық-консультативтік кеңестің отырысы ретінде ұйымдастырылып келсе, ал өткен жылдан бастап оған ауданның барлық мүдделі азаматтары қатыса алатын болды.

Кездесуге аудан әкімдігінің, үкіметтік емес ұйымдардың өкілдері, белсенді азаматтар, тұрғындар қатысты. «Теңізшевройл» компаниясының Үкіметпен және қоғаммен байланыс бөлімінің өкілі Нұрлан Ерғалиев көрсетілген демеушілік қолдау туралы, Әлеуметтік инвестициялар бағдарламасы аясында өңірде үкіметтік емес ұйымдар жүргізіп жатқан жұмыстар жөнінде кеңінен түсіндіріп өтті.

Оның айтуынша, осы жылы 16 үкіметтік емес ұйым 21 жобаны іске асырып жатыр. Соның ішінде ауданымыздан 4 үкіметтік емес ұйым бар. Бұлардың барлығы дерлік ауданға оң әсерін тигізіп жатқанын атап өткен жөн. Белсенді азаматтар білім беру сапасын жақсарту мен балалардың бос уақытын тиімді өткізуге арналған жобаларға ерекше қызығушылық танытты. Айталық, «Шырақ» жобасы аясында ауданнан 20 бала маусым-шілде айларында балаларға арналған IT лагерьде болады. Олар графикалық дизайн мен фронт-енд бағдарламалаудың (HTML, CSS) негізін үйренеді.

ТШО өкілдері 37 мердігер компаниямен жасалған меморандумның жүзеге асырылу барысы жөнінде де ақпарат беріп өтті. Еске сала кетейік, осы жылдың наурыз айында аудан әкімдігі, ТШО және мердігер мекемелер арасында жұмыспен қамту мәселелері бойынша үшжақты өзара түсіністік туралы меморандумға қол қойылды.

Әрине, тұрғындар мен қоғам белсенділерін көп мәселе қызықтырды. Олар жобаларды жетілдіру және ауданды одан әрі дамыту мүмкіндіктері жайлы өз ұсыныстарын белсенді түрде ортаға салды. Солардың ішінде жабдық сатып алу, жобаларды кеңейту, жаңа жобаларды ұсыну мүмкіндіктері және басқа да мәселелер бар.

Иә, тұрғындармен кездесу «Теңізшевройл» компаниясының бұрыннан келе жатқан игі дәстүрі. Бұл компанияның ашықтығын көрсетіп қана қоймай, тұрғындарға өз сұрақтарын компания өкілдеріне тікелей қоюға мүмкіндік береді. Бір жағынан бұл кездесудің басты мақсаты – компанияның ауданның дамуына қосып жатқан әлеуметтік үлесі туралы халықты хабардар етіп отыру.

Жартыжылдық жоспар -101,2 пайыз

«Ембімұнайгаз» АҚ-да 2025 жылдың бірінші жартыжылдығындағы өндірістік және қаржылық-экономикалық көрсеткіштердің орындалысы қорытындыланды. Бұл жөнінде «Ембімұнайгаз» АҚ-ның баспасөз қызметі хабарлады.

Өңір өндірісіндегі негізгі көрсеткіштер туралы компанияның Бас директоры Ринат Ізмұханбет Басқару аппараты ұжымымен өткен кездесу барысында хабарлама жасаған.

Ресми мәліметке сүйенсек биылғы алты айда өнім өндіру жоспары 101,2 пайызға, ал мұнай тапсыру көрсеткіші 101,5 пайызға орындалған. Бұл жетістікке қол жеткізу, ең алдымен, геологиялық-техникалық шаралардың тиімді жүзеге асырылуының нәтижесі екені атап өтілді. Бас директор жоспардың артығымен орындалуы жақсы нәтиже екенін айта келіп, қол жеткізген межемен тоқтап қалмай, қара алтын өндіру қарқынын әрі қарай да арттырып, жоспарлы көрсеткіштердің толық орындалуы үшін осы бағыттан таймау қажеттігін жеткізді.

Компанияда мұнай өндіруді ұлғайту мақсатында бірнеше инвестициялық жоба қолға алынған. Бұлар табысты жүзеге асқан жағдайда «Ембімұнайгаз» қызметінің даму бағытына тың серпін береді деп күтілуде.

Кездесу барысында әлеуметтік тұрақтылық пен қызметкерлердің еңбек жағдайына қанағаттануын қамтамасыз ету мәселелеріне де ерекше назар аударылды. Атап айтқанда, биыл 6 жатақханаға күрделі жөндеу жүргізу жоспарланса, оның үшеуінде жұмыс қазірдің өзінде басталып кеткен. Сонымен қатар, кадр саясаты бағытында «Серпін», «Алып», «Дуалды оқыту», ішкі тәлімгерлер мектебі сынды бірқатар жобалар сәтті жүзеге асырылып келеді.

Осыған дейін компания басшылығы бірінші жартыжылдық қорытындысына арналған есепті кездесуін барлық мұнай-газ өндіру басқармаларында, соның ішінде «Ембімұнайэнерго» мен Өндірістік-техникалық қамту және жабдықтармен комплектациялау басқармаларында өткізген болатын.

Таяуда Атырау облысына жұмыс сапары аясында «ҚазМұнайГаз» ҰК» АҚ-ның басқарма төрағасы Асхат Хасенов «Ембімұнайгаз» АҚ-ның бірқатар өндірістік нысандарын аралады. Соның ішінде біздің өңірде орналасқан Прорва кен орнындағы бірқатар жобалар да бар. Бұл жөнінде қоғамның баспасөз қызметі хабарлады.

Жарқын жобалар жүзеге асуымен құнды

А.Хасенов өндіріс ошағындағы мұнай мен газды өндіру тиімділігін арттыру, операциялық шығындарды оңтайландыру бағытында іске асырылып жатқан жобалардың барысымен танысты.

Сапар барысында басқарма төрағасы Асхат Хасенов аудандағы іргелі кеніштің бірі - Батыс Прорва алаңындағы газ ұңғымаларын игеру жөніндегі бірінші іске қосу кешенін салу алаңына барды. Ресми мәліметтерге сүйенсек, жоба үш кезеңмен жүзеге асырылады. Біріншісінде - мұнай өндіру көлемі 45 мың тоннаға дейін, ал газ өндіру 160 млн м³-ке дейін артатын болады. Екінші және үшінші кезеңдерді іске асыру 2026–2027 жылдарға жоспарланған. Нәтижесінде бұл ірі жоба Батыс Прорва алаңындағы газ өндіру көлемін 600 млн м³-ке дейін көбейтуге мүмкіндік береді.

Сапар барысында Асхат Хасенов Исатай ауданында да болды. Онда орналасқан Оңтүстік-Шығыс Новобогат кен орнындағы инвестициялық жобамен танысты. Жоба бойынша жылына 80 млн м³ газды өңдеуге арналған кешенді газды даярлау қондырғысы (УКПГ) салынып жатыр. Нысанды іске қосып, пайдалануға беру 2026 жылдың көктеміне жоспарланған. Оңтүстік-Шығыс Новобогат кен орнын игеру басталғаннан кейін, жылына 100 мың тоннадан астам мұнай өндіруге мүмкіндік болады.

Бұдан бөлек, Асхат Хасенов С.Өтебаев атындағы Атырау мұнай және газ университетінің оқу-өндірістік полигонының құрылысымен танысты. Бұл нысан «Ембімұнайгаз» АҚ-ның қаржылық қолдауымен салынып жатыр. Қазіргі таңда құрылыс-монтаж жұмыстарының 95 пайызы аяқталған. Полигон аумағында 15 оқу алаңы, бұрғылау ұңғымалары қазылып, студенттердің практикалық машықтарын жетілдіруге арналған инфрақұрылым жасалған. Жобаны 2025 жылдың соңына дейін тапсыру көзделуде.

Сол күні ол «Ембімұнайгаз» АҚ ұжымымен өндірістік кеңес жиынын өткізді. Онда компанияның биылғы бес айдағы жұмыс қорытындысы қаралды. Осы кезеңде 1 млн 140 мың тонна мұнай өндірілсе, бұл жоспардан 14 мың тоннаға артық. Жалпы, 2025 жылға арналған мұнай өндіру жоспары 2 млн 813 мың тоннаны құрайды.

Жалпы жиын барысында қазіргі кезде игеріліп жатқан және тиімділігі төмен кен орындарын барлау, Батыс Қарасор кен орнын игеру мәселелері талқыланды. Бұл жерде мұнай өндіру биыл басталмақ, мұнай қоры 3 млн 102 мың тонна, ал газ қоры 96 млн м³ деп бағаланған. Қисымбай мен Ақінген кен орындарындағы газ қабаттарын игеру, жұмысшылардың әлеуметтік-тұрмыстық жағдайын жақсарту мәселелері де күн тәртібінен қалыс қалмады.

Қорытындысында «ҚазМұнайГаз» ҰК АҚ басқарма төрағасы Асхат Хасенов «Ембімұнайгаз» басшылығына нақты міндеттер жүктеді. Атап айтқанда, мұнай мен газ өндіру көлемін арттыру, операциялық шығындарды оңтайландыру және компанияның тұрақты дамуын қамтамасыз ету бағытында бірнеше міндеттер қойды,- делінген баспасөз хабарламасында.

А.МОЛДАШЕВ

Кезекті еңбек демалысынан шыққан аудан әкімі Жұмабек Қаражанов, ең алдымен, аудан активін жинап, бірден аппараттық мәжіліс өткізді. Онда, негізінен, ең өзекті деген төрт мәселе қаралды. Нақтырақ айтқанда, «Таза Қазақстан» республикалық акциясы аясында ауданда атқарылған жұмыстар таныстырылды. Өйткені, тазалық пен экология – тұрғындардың өмір сапасына тікелей әсер ететін маңызды бағыт.

Екіншіден, биылғы жылдың бірінші жартыжылдығында телеграм-чат арқылы тұрғындардан келіп түскен сұрақтар сараланып, жауапты бөлімдерге тапсырмалар берілді. Содан кейін «Смарт Құлсары» жобасы аясында Бірыңғай байланыс орталығына түскен өтініштер мен сұрақтарға сәйкес атқарылған жұмыстар қаралды. Соңында нысандарды аралау кезінде берілген хаттамалық тапсырмалардың орындалу барысы тыңдалды.

Барлық мәселе бойынша жауапты бөлім басшылары баяндама жасап, атқарылған жұмыстар мен орындалмай қалған тапсырмалар туралы мәлімет берді. Соңғы мәселелер бойынша нақты себептері анықталып, нақты мерзімі белгіленді.

Құрылыс басында

Өңір басшысы Жұмабек Қаражанов кейін аудан аумағындағы бірқатар маңызды нысандарды аралап, олардың жұмысымен кеңінен танысты.

Соның бірі – Құлсары қаласындағы кәріздік сорғы станциялары. Онда жақында насостар ауыстырылып, шахталар тазартылған еді. Ал су тазарту станциясы – қалада бұрыннан келе жатқан өзекті мәселенің бірі. Оны шешу мақсатында құрылыс жұмыстары басталды. Жұмабек Байрақбайұлы, міне, осы нысандарда атқарылып жатқан жұмыстардың жай-жапсарын көзбен көріп, жақынырақ танысты. Сондай-ақ, «Болашақ» ықшам ауданында қысымды күшейту станциясы да іске қосылған еді. Бұл жаңадан бой көтерген қалашықтағы тұрғындардың сапалы әрі үздіксіз ауыз сумен қамтуына жол ашады. Аталған нысандардағы барлық жұмыстар аудан басшысының ұдайы бақылауында болады.

Аудан әкімі Жұмабек Қаражанов аудандағы бірқатар білім беру нысандарында жүргізіліп жатқан құрылыс жұмыстарын да аралап көрді.

Алдымен, Шоқпартоғай ауылдық округінде салынып жатқан 280 орындық балабақша құрылысымен танысты. Қазіргі таңда нысанда жұмыстар қарқынды жүріп жатыр. Бұл – ауыл тұрғындары үшін маңызды әлеуметтік жоба. Өйткені бұрынғы мектепке дейінгі мекеме жарамсыз деп танылып, ауыл бүлдіршіндері балабақшасыз қалған еді.

Құлсары қаласындағы №19 жалпы білім беретін орта мектепте жүргізіліп жатқан күрделі жөндеу жұмыстарының барысын да көзбен көріп шықты. Оқу орны жаңа оқу жылына толық дайын болуы үшін мердігер мекемелерге нақты тапсырмалар берілді. Сондай-ақ, Құлсарыдағы №20 орта мектеп жанынан бой көтеріп жатқан 180 орындық қосымша ғимараттың құрылысы да назардан тыс қалмады.

- Барлық жұмыстар сапалы әрі мерзімінде аяқталуы тиіс. Басты мақсат – балаларымызға қолайлы, қауіпсіз білім беру ортасын қалыптастыру, - деді аудан әкімі Жұмабек Қаражанов.

Аудан басшысы Қосшағыл ауылдық округіндегі «Қосшағыл» ауылдық мәдениет үйінің күрделі жөндеу жұмыстарының барысымен де танысты.

Ауылға арнайы ат басын бұрып, мәдениет үйінің құрылыс барысын қарап шыққан ол қазіргі уақытта нысанда жүріп жатқан сыртқы және ішкі әрлеу жұмыстарын көрді. Құрылыс сапасына қатысты бірқатар мәселелерге назар аударып, кемшіліктер бойынша тиісті ескертулер берді. Сонымен қатар, жобада өзгеріс енгізу қажет тұстар да көрсетілді.

- Ауыл тұрғындары асыға күтіп отырған бұл нысан мәдени шаралар мен қоғамдық жиындардың ордасына айналуы тиіс. Сондықтан құрылыс жұмыстары сапалы әрі мерзімінде аяқталуы қажет. Бұл бағытта жұмыстар тұрақты бақылауда болады,-деді әкім.

Тазалық пен тәртіп

Аудан әкімі Жұмабек Қаражанов шағын шаһардағы аялдамалар, орталық көшелер мен жалпы қаланың архитектуралық келбетін назарға алды.

Қаланы аралау барысында кейбір тұрғын үйлердің алдына жиналған құрылыс қалдықтары, бетон кесінділері мен түрлі қоқыстар көзге түсті. Мұндай көрініс қаланың сәулеттік келбетіне кері әсер етіп қана қоймай, санитарлық жағдайдың да төмендеуіне себеп болары анық. Сондықтан рұқсатсыз қоқыс жинау деректері бойынша әкімшілік жауапкершілік қарастырылатынын ескерткен әкім бұл бағытта әкімдік тарапынан тиісті шаралар қабылданатынын айтты.

- Дегенмен, бастысы – тазалық пен тәртіп – бәрімізге ортақ жауапкершілік. Барша қала тұрғындарын тазалыққа, ұқыптылыққа, қоғамдық тәртіпке үлес қосуға шақырамын,-деді аудан басшысы.

Халық өтініші аяқсыз қалмайды

Қала, кент және ауылдық округ әкімдерімен, дербес бөлім басшыларымен жұмыс жиналысын өткізген аудан басшысы Жұмабек Қаражанов бірқатар өзекті мәселелерге назар аударды.

Атап айтқанда Telegram чат арқылы тұрғындардан келіп түскен сұрақтардың зерделенуі және жауаптардың берілуі қаралды. 109 – Бірыңғай байланыс орталығы арқылы түскен өтініштер бойынша атқарылған жұмыстар тыңдалды.

Нысандарды аралау мен азаматтарды қабылдау кезінде көтерілген мәселелер де назарға алынып, орындалу барысы талқыланды.

Бөлім басшылары өз жұмыс бағыттары бойынша есеп берді. Басты мақсат – тұрғындармен кері байланысты нығайтып, әр сұрақ пен ұсынысқа нақты жауап беру екені ескертілді.

Бұдан кейін аудан әкімі аудан тұрғындарын жеке мәселелері бойынша қабылдады. Қабылдау барысында азаматтар жұмыссыздық, тұрғын үй алу, кәсіп бастау үшін жер телімінің заңдылығы, әлеуметтік қолдау және өзге де маңызды мәселелерді көтерді. Әрбір сұрақ заң аясында мұқият қаралып, тиісті түсініктемелер берілді. Жеке өтініштер бойынша нақты шаралар қабылданатын болды.

- Мұндай кездесулер – халықтың көкейіндегі өзекті мәселелерді тыңдап, шешу жолдарын бірге қарастырудың тиімді жолы. Сондықтан жеке қабылдаулар тұрақты түрде жалғасатын болады,-деді аудан басшысы.

                                                    Өз тілшімізден

Жуырда өңірімізге Қазақстан Республикасы Парламенті Мәжілісінің депутаттары арнайы іссапармен келіп кетті. Ат басын алғаш бұрғандардың бірі - Әділ Жұбанов еді. Ол Жылыойдағы жұмыс сапарын Жаңа Қаратон кенті мен Қара Арна ауылдық округінің тұрғындарына арнады. Олардың әлеуметтік қолдау, инфрақұрылым, білім мен денсаулық салаларына қатысты ұсыныс-пікірлерін тыңдап, бір нәтиженің боларына сендірді.

«Монополистер қызметін мемлекеттік меншікке беру керек»

Ал Жылыойға түскен жолдың ізін ала келген Дүйсенбай Тұрғанов Құлсары қаласындағы қайғылы жағдай орын алған «Ниет» жанар-жағармай құю бекетіне ат басын тіреді. Оқиғаның мән-жайымен танысып, қазіргі ахуалды көзбен көріп, көңілге түйді. Содан кейін аудан әкімдігімен кеңес өткізіп, дербес бөлім басшыларының жыл басынан бергі атқарған жұмыстарын сарапқа салды.

Әділ Орынбасарұлы Жаңа Қаратон тұрғындары мен шоқпартоғайлықтармен жай кездесіп қана қойған жоқ, ауылдағы мәдениет үйінің құрылысы мен амбулатория және білім ордасын аралап, ғимараттардың ішкі ахуалымен танысты. Парламент Мәжілісінің депутатымен жүздесуге аудан орталығынан қоғам белсенділері де арнайы келіп, өңірдегі проблемаларды ортаға салған. Олар медициналық сақтандыру қорына түскен қаржының халық үшін тиімді пайдаланылуы, Теңіз кенішіндегі вахталық әдісті 14 күнге ауыстыру, азық-түліктің қымбаттауы, су, газ, электр энергиясын тасымалдайтын монополист мекемелер қызметін мемлекет меншігіне алу, зейнеткерлерге жағдай жасау, жұмыссыздықты жою, ауылішілік жолдарды сапалы салу сияқты әлеуметтік мәселелерді көтерді. Соның бірі – Райса Телеубаева. Халық арасынан сөз алып, өткір де өжет көзқарасымен өзімен қоса өңірдегі азаматтарды толғандырып жүрген проблемаларды ашық айта білген ол:

-Құлсары қаласының тұрғындарына экологиялық коэффициент төлеу, тәулігіне 30 000 м3 су тазарту ғимараты құрылысын салу, кәріз жүйесін жаңғырту, сонымен қатар әуе көлігінің инфрақұрылымын дамыту мақсатында Құлсары қаласынан әуежай салу мәселелерін айтып-айтып қоямыз. Бірақ осы бағытта нақты жұмыс басталғанын естімеппіз. Одан кейін 1,2,3-ықшам аудандардағы 30 жыл бойы қаңырап бос тұрған, құрылысы аяқталмай қалған көп қабатты үйлерді бұзу, заңсыз карьерлердің жұмысын тоқтату, «Болашақ» ықшам ауданынан берілген жер учаскелерін инженерлік инфрақұрылым желілерімен қамтамасыз ету қашан орындалатынын да білмей далмыз. Ауданды көгалдандыру мен абаттандыру жұмыстарының мардымсыздығы, автокөлік жолдарының сапасыздығы – бәрі-бәрі тұрғындарды алаңдатып отырған негізгі мәселелер. Осы сынды сан сауалдарға қарапайым халық қашан нақты жауап алады, бұған кім жауап береді деген уайымымыз бар. Жиынға қатысушы тұрғындардың көбі жеке бас мәселесімен емес, осындай өңірімізге ортақ мәселелерді арқалап келеді. Өкінішке қарай, қашан да мардымды жауап ала алмаймыз,-деді өз ойын жеткізіп.

Депутат Әділ Жұбанов осы мәселелер төңірегінде әлеуметтік карта жасақталып жатқанын және оны тамыз айында Үкіметке ұсынатынын жеткізді. «Жалпы халық соңғы кездері өзінің жеке басының сұрақтарын емес, елдің, көптің көкейінде жүрген өткір мәселелерін көтеріп жүр. Ел жақсы өзгерістердің болғанын қалайды, тіпті соны асыға күтеді. Осыны билік ешқашан естен шығармай, барлық мүмкіндікті жасауы қажет»,–деді депутат. Сонымен қатар, бірнеше азаматты жеке қабылдап, олардың да көкейтесті сұрақтарына назар салды.

«Аралтөбе» су қоймасы қашан салынады?

Мәжіліс депутаты Дүйсенбай Тұрғанов сапарын, жоғарыда айтқанымыздай, ең алдымен Құлсары қаласының орталығындағы жарылыс болған «Ниет» жанар-жағармай бекетінен бастады. Ол жерде мәселенің мән-жайын толық қарап, зерделеу жұмыстарын жүргізіп, нысандағы ахуалға қатысты қажетті мәліметтерді назарға алатынын айтты.

Бұл жағдай төңірегінде аудандық Төтенше жағдайлар бөліміне қандай көмек керектігін сұрап, жарылыс салдарынан материалдық шығынға ұшыраған жандардың өтемақы мәселесінің қалай шешіліп жатқанын да есепке алды. Одан кейін депутаттың қатысуымен аудан әкімдігінде кеңейтілген жиын өтті. Жиынға аудандық мәслихат депутаттары, қоғамдық кеңес мүшелері, дербес бөлім басшылары, қала, кент және ауылдық округ әкімдері қатысты. Күн тәртібінде Жем өзені бойына Аралтөбе су қоймасын салу, «2023–2027 жылдарға арналған Жылыой ауданы бойынша сайлауалды бағдарламасының» 2025 жылғы 1 шілдедегі орындалу барысы, аудандағы жұмыссыздық деңгейі және қаламыздағы апатты жағдайдағы тұрғын үйлерді реттеу сынды төрт мәселе қаралды. Оның ішінде Аралтөбе су қоймасы жөнінде сөз сөйлеген ҚР Парламент Мәжілісінің депутаты Дүйсенбай Тұрғанов:

- Биыл өңір судан аман қалса да, су басу қаупі жоғары аймақта 2600-ден астам тұрғын үй мен 403 кәсіпорын тұрды. Бұл төтенше жағдай ғана емес, су ресурстарын басқаруда ұзақ мерзімді жүйелі шешімдердің қажеттілігін дәлелдеп отыр. Жем өзені - аудан аумағынан өтетін бірден-бір су көзі. Сондықтан, Жылыой ауданының бүкіл ауыл шаруашылығының дамуы осы суға байланысты. Көктемде тасқын сулар табиғи жолмен 17 мың гектардан астам шабындықтарды суарып, малды азықпен қамтамасыз етеді. Осы табиғи ресурсты тиімді пайдалану мақсатында Аралтөбе су қоймасын салуды жоспарлап отырмыз»,- деді.

Депутаттың айтуынша, қазіргі уақытта жобаның техникалық-экономикалық негіздемесі әзірленіп, кеңестік кезеңдегі мұрағат материалдары зерттеліп жатыр. Су қоймасының сыйымдылығы 220 миллион текше метр деп белгіленген. Жоба аясында Құлсары қаласы мен Жаңа Қаратон ауылын қосымша ауыз сумен қамтамасыз ету, сондай-ақ 5 мың гектар ауыл шаруашылығы алқаптарын жүйелі түрде суару көзделіп отыр.

Жиында «Amanat» партиясының сайлауалды бағдарламасының «Жол картасын» жүзеге асыру барысы да талқыланды. Бағдарламаның кейбір тармақтарының орындалмау қаупі бар екені айтылып, бұл мәселелерді жүйелі түрде пысықтау қажеттігі баса айтылды. Сонымен қатар, Теңіз кенішіндегі Келешек кеңею жобасының аяқталуына байланысты халықты жұмыспен қамту және жаңа жұмыс орындарын ашу мәселелері де көтерілді. Бұл ретте аудандағы апатты жағдайдағы үйлер мәселесі де назардан тыс қалған жоқ. Тұрғын үйлердің тозығы жеткенін, олардың орнына жаңа үйлер салу қажеттілігі сөз болды.

Жасөспірімдер қылмысқа неге бейім?

Депутат аудан басшылығымен кездесу жиынынан кейін аудандық ішкі істер бөліміне табан тіреді. Онда өңірдегі жыл басынан бергі қылмыс көрсеткішімен танысып, кәмелетке толмаған жасөспірімдердің құқық бұзушылық салдарын анықтады. Бұл жөнінде ол:

- 2025 жылдың алғашқы бес айында жасөспірімдер жасаған қылмыстар саны артқан. Иә, құқық қорғау органдары жиі профилактикалық жұмыстар жүргізіп жатыр. Атап айтсақ, «Түнгі қалада – бала» рейдтері, мектептердегі онлайн талқылаулар, БАҚ-та жарияланған материалдар олардың жұмыс жасап жатқандығын көрсетеді. Дегенмен, статистика барлық тараптардың, соның ішінде мектеп, ата-ана, жастар ұйымдары мен құқық қорғау органдарының бірлесіп жұмыс істеуі керектігін көрсетіп отыр. Одан бөлек қазіргі уақытта штат бойынша 263 полиция қызметкері болуы тиіс болса, бүгінгі есеппен нақты жұмыс істеп жатқан полицейлер саны – 200 ғана екен. Сондықтан жаңа кадрларды тартып, олардың тиімді қызмет етуіне жағдай жасау шараларын қолға алу қажет. Сондай-ақ, 1960 жылдары салынған, заман талабына сай келмейтін полиция бөлімшесі ғимаратын қайта жөндеуге қатысты өзекті мәселе бар. Девиантты мінез-құлықты балаларға арналған мектептер ұйымдастырып, сот шешімімен сол жерге жіберу мәселесі де көтерілді. Қазіргі уақытта мұндай шаралар тек атышулы жағдайда ғана қолданылады. Полиция қызметкерлері бұл механизм жүйелі түрде жұмыс істеуі керек деп есептейді. Барлық айтылған сұрақтар мен ұсыныстарды тиісті мемлекеттік органдармен бірлесіп пысықтайтын боламыз,-деді түсіндіріп.

Иә, Мәжіліс депутаттарының ауданымызға жасаған сапары халықтың ашық пікір білдіруіне және өзекті мәселелерді тікелей жеткізуге мүмкіндік бере алды. Бірақ көптің көңілінде күдіктің де қалғаны рас. Өйткені бұл проблемалардың басым көпшілігі жылда көтеріліп, депутаттар келгенде айтылып та, жазылып та жүр. Сондықтан, оларға артылған сенімге сызат түспей, «халықтың қалаулысы» деген атқа лайықты қызмет атқарып, артылған аманатқа адалдық танытса деген тілек те болды.

Д.ІЗБАСАРҚЫЗЫ