Аудан

Көп ұзамай Құлсарыда ғимараттардың қасбеттерінде бес ауқымды портрет пайда болады. Олардың біріншісі орталық саябақта ұсынылған-бұл портрет, аты аңызға айналған офицер, Ұлы Отан соғысының қатысушысы және қайтыс болғаннан кейін Кеңес Одағының Батыры атағына ие болған жазушы Бауыржан Момышұлы бейнеленген. Бұл өнер туындысының пайда болуы Ұлы Жеңістің 80 жылдығының символы болып табылады, деп хабарлайды atyraupress тілшісі.
Суретші-дизайнер Мейірбек Жақыпбаевтың айтуынша, алдағы күндері қаланы тағы төрт жаңа қабырға бейнесі салынады, олардың әрқайсысының өзіндік тақырыбы бар.
Атап айтқанда, көрнекті ғалым және қоғам қайраткері Ахмет Байтұрсыновтың, сондай — ақ атақты жерлес-ақындар мен жазушылар Мендекеш Сатыбалдиевтің, Қабиболла Сыдиықовтың және Аманқос Ершу портреттері. Жоба бойынша Мейірбек Жағыпашевпен бірге әлем суретшілері Джанғожиев, Асылбек Бақтияр жұмыс істейді.
- Біздің жоспарымызда-облыстың әртүрлі аудандарында біздің өңіріміз бен Қазақстанның көрнекті тұлғалары бейнеленген мұралдарды құру. Өйткені, әр бұрышта тұрғындар мақтан тұтатын өз кейіпкерлері бар. Біз жастардың подіктері мен жетістіктерінен шабыт алып, олардың есімдерін білгенін және құрметтегенін қалаймыз. Сонымен қатар, бұл жоба көркемөнер өнерінің дамуына үлес қосады, шығармашылыққа деген қызығушылықты оятады және жастарға айналадағы сұлулықты көруге, өнер арқылы сұлулыққа ұмтылуға және өзін - өзі жүзеге асыруға көмектеседі, - деді Мейірбек Жағыпашев.

Бурабайда өткен Ұлттық құрылтайда Мемлекет басшысы Қасым-Жомарт Кемелұлы Тоқаев «Біртұтас тәрбие» бағдарламасын жаңа атаумен — «Адал азамат» деп атауды ұсынды. Бұл — жай ғана атау ауыстыру емес, бұл – ел болашағына бағытталған ерекше мағынасы бар үлкен рухани бағдар.

«Адал азамат» – біздің өсіп келе жатқан ұрпақтың бойына сіңіруіміз тиіс ең асыл қасиеттердің жиынтығы.

Президенттің дәл осы бағдарламаны назарға алып, атауына дейін мән беруі – біздің жұмыстың маңыздылығын көрсететін зор қолдау. Жаңа атаумен жаңаша тыныс алған бағдарламаның дәл осы рухани мерекемен үндесуі – болашаққа үміт пен сенімнің белгісі.

«Адал азамат» – еліміздің ертеңгі тірегі. Осы бағдарлама арқылы біз ұлттық тәрбие жүйесін бекемдеп, нағыз ел жанашырын қалыптастырамыз. Бұл жолда әрқайсысымыздың атқарар рөлі ерекше, ал бірлігіміз – басты күшіміз.

Қызылқоға ауданына қарасты 9 ауылдық округтің 14 елді мекенінде су тасқынының алдын алу шаралары жүйелі түрде атқарылуда. Осы мақсатта 54 шақырым қорғаныш бөгеттері тұрғызылып, жоспар 100% орындалды, деп хабарлайды AtyrauPress тілшісі.

Сонымен қатар, ауыл маңындағы бөгеттердің осал тұстарын бекіту және жаңадан салынған көпірлерді тасқын суынан қорғау мақсатында ҚР Ұлттық Ұланынан 60 жауынгер мен Төтенше жағдайлар департаментінің 37 қызметкері жұмылдырылды. Нәтижесінде, 17 500 қапшыққа құм толтырылып, қажетті аймақтарға төселді.

Аудандағы су тасқынының алдын алу бойынша жұмыстар жоспарға сай жүргізілуде. Бұл туралы аудан әкімдігінің баспасөз қызметі мәлім етті. Қазіргі таңда Ойыл өзені өз арнасымен ағып жатыр, өр суының келуі тұрақты бақылауда. Су деңгейі тәулік бойы қадағалануда. Тасқын қаупін азайту мақсатында Сағыз-Миялы-Қарабау-Индер бағытындағы автомобиль жолының 298-шақырымындағы «Кенен» көпірінде аудандық полиция бөлімі жүк көліктерінің жүруіне уақытша шектеу қойды. Жалпы жағдай тұрақты, бірақ бақылау үздіксіз жүргізілуде.

Атырау облысындағы су нысандарының деңгейі мен жағдайына тұрақты мониторинг жүргізу мақсатында «Қазгидромет» РМК Атырау облыстық филиалы мемлекеттік бақылау желісі бойынша деректеріне сүйенсек, 1 сәуірдегі гидрологиялық бақылау нәтижелері төмендегіше ақпараттарды ұсынып отыр.

Ойыл өзені (Миялы ауылы маңында) – таңғы 08:00 және 12:00 уақыттарында су деңгейі өзгеріссіз қалып, 564 см деңгейінде тұрақтады.

Аймақтағы су нысандарының деңгейі бақылауда, қазіргі уақытта су тасқыны қаупі тіркелмеген. Алайда, мамандар судың деңгейін тұрақты қадағалап, кез келген өзгерістер туралы тиісті органдарға ақпарат беруді жалғастыруда.

Төтенше жағдайға қарсы күреске барлығы 144 адам және 66 техника жұмылдырылды: ТЖМ (Төтенше жағдайлар министрлігі) – 37 адам, 3 техника; ІІМ (Ішкі істер министрлігі) – 20 адам, 10 техника; ЖАО (Жергілікті атқарушы орган) – 67 адам, 53 техника; Еріктілер – 20 адам.

Материалдық-техникалық қамтамасыз ету мақсатында қосымша жабдықтар мен қажетті құралдар қоры толықтай жасақталған. Қызылқоға ауданындағы су тасқыны жағдайы толығымен бақылауға алынған. Жауапты органдар мен мамандар тасқынның алдын алу және салдарын жою бағытында тынымсыз жұмыс атқаруда. Аудан халқының қауіпсіздігі басты назарда ұсталып, кез келген өзгерістер шұғыл түрде бақыланып отырады.

Амандық АБДОЛ

БИЫЛҒЫ ЖЫЛДЫ МЕМЛЕКЕТ БАСШЫСЫ «ЖҰМЫСШЫ МАМАНДЫҚТАР ЖЫЛЫ», ДЕП ЖАРИЯЛАҒАНЫН КӨҢІЛІМ ҚҰП АЛДЫ. СЕБЕБІ, ЕЛ ДАМУЫН, ӨРКЕНДЕУІН АЛҒА СҮЙРЕЙТІН ЛОКОМОТИВ – ҚАРАПАЙЫМ ЖҰМЫСШЫЛАР. СӘУЛЕТШІНІҢ СЫЗҒАН СЫЗБАСЫН, ҒАЛЫМНЫҢ ЖАСАҒАН ЖОБАСЫН ӨМІРДЕ ЖҮЗЕГЕ АСЫРАТЫН – СОЛАР. ЖҰМЫСШЫ – ҚАНДАЙ ҚОҒАМНЫҢ ДА ҚАЙЫСПАС ҚАРА НАРЫ. СОНДЫҚТАН 2025 ЖЫЛДЫҢ «ЖҰМЫСШЫ МАМАНДЫҚТАР ЖЫЛЫ» АТАНҒАНЫН ӨЗ БАСЫМ ОЛАРҒА КӨРСЕТІЛГЕН ҚҰРМЕТ ЖӘНЕ ОСЫ МАМАНДЫҚҚА ЖАСТАРДЫҢ ҚЫЗЫҒУШЫЛЫҒЫН ОЯТАТЫН ИГІ БАСТАМА ДЕП ҚАБЫЛДАДЫМ.

Әркімнің туған жері – ұжымағы. Ауылым көркейсе, жаным сүйсінеді. Талай жерлерде болдым, бірақ ешқайсысы туған өлкемдей ыстық көрінген емес. Бүгінде Құрманғазы ауылы қала типтес елді мекенге айналса, онда жұмысшы тап – құрылысшылардың төккен тері, қалдырған қолтаңбасы жатыр. Мақтануға тұрарлық іс. «Аудан орталығына көрік берген анау аудан әкімдігінің, сіздер (редакция) отырған бұрынғы атқару комитетінің, Абай, Әуезов орта мектептерінің, агроколледждің ғимараттарын біз салғанбыз. «Жақсы», «өте жақсы» деген сапамен тапсырдық. Содан бері елу жылға жуықтаса да олар әлі міз бақпай тұр», дейді Қазақстанның Құрметті құрылысшысы, Құрманғазы ауданының Құрметті азаматы Мәлік Матыбаев ағамыз. «Аудан орталығында қазіргі Құрылысшылар ауылы деген атымен болған жоқ. 1974 жылы қазіргі Мұхтар Әуезов атындағы орта мектептің орнында өр суы жатқанының, Кресті ауылының балалары сазанды қуып жүріп шаншығанының куәсі болғанмын» дейді құрылыс саласының ардагері Елдос Бектеміров ағамыз. Біздің бала кезімізден есімде қалғаны аудан орталығы – Құрманғазы ауылы басқа елді мекендерден көп ерекшелене бермейтін. Төбесіне шөп өскен, жаңбыр өтпесін деп күл төгілген, қабырғасы сиырдың жапасын қосқан сазбен сыланған тоқал тамдар менмұндалайтын. Еңселі дегенде қос қабатты Ломоносов орта мектебі, ПМК-903, СПМК- 29 мекемелерінің ғимараттары, аудандық аурухана, үш қабатты мектеп-интернат, кәсіптік- техникалық училище және керемет саябақ бар болатын. Сексенінші жылдары олардың қатарын үш қабатты Абай, қос қабатты М.Әуезов орта мектебі толықтырды. Орталықтан басқа жердегі көшелердің бәрінің шаңы бұрқырап жататын. Аудан орталығының Бұзауслан, РТС мөлтек аудандары жаңбыр жауса, саз балшыққа айналатын. Жоғарыда Елдос Бектеміров ағамыз Құрылысшылар ауылының болмағанын айтса, Бұзауслан ауылында бірнеше, Жапырықта бір қолдың саусағын толтырмайтын үйлер бар еді. Қазір бәрі өзгерді.Оған сәл төменде тоқталамыз. Қазір құрылысшылар жайлы әңгімеміздің желісін жалғайық.

Жұмысшы дегенде, көз алдыма туған жерімізді көркейткен құрыш қолды құрылысшылар келеді. Жаздың ыстық аптабында, көктемнің өткір желінде, күздің қара суығында, тіпті қыста да жұмыс жасайтын жанқияр адамдар. Ыстықта белге дейін шешініп тастап, тілерсегі майысып, терлеп-тепшіп жүріп зембілмен тас пен ерітілген цементті тасығандарды көре қалдық. Көзіне құйылған ащы терді қолымен бір сүртіп, қабырғаны өруді жалғастырған тас қалаушы да көз алдымызда. Біте келген құрылыстың ішінде шашы мен бетін орамалмен байлап алып, нәзік жандар – сылақшылар жүретін. Осылардың бәрі де қиын жұмысты қабақ шытпай, әзілдесе жүріп атқаратын. Барлығы да туған ауылының көркін айшықтайтын нысан салып жатқанына көңілі қуанып, шаршау дегенді ұмытатын. Олардың қолынан шыққан көз тартар ғимараттар – қай ауылдың да сәні. Адал еңбек қашанда бағаланады. Оғандәлел қатардағы құрылысшылар Орақ Алқалиев – «Қазақ КСР- не еңбегі сіңген құрылысшы», ауданның Құрметті азаматы атағының, сылақшылар бригадирлерінен Мансура Рахметова – «Еңбек Қызыл ту», Талшын Қалбекова және тас қалаушылар бригадирі Қазбек Татаев – ІІІ дәрежелі «Еңбек даңқы» ордендерінің, прораб Шапих Смағалиев – «Еңбектегі ерлігі үшін» медалінің иегерлері. Мекеме басшысы М.Матыбаев «Қазақстан Республикасының Құрметті құрылысшысы», сәулетші Т.Жаудин «Қазақстан Республикасының Құрметті сәулетшісі», Е.Рысқалиев «Қазақстан Республикасының Құрметті жолшысы» атанды. Мұны кейінгі жастарға өнеге болсын деп келтіріп отырмыз. Туған жеріміздің түлегені – тәуелсіздіктің тұсы. Дербес ел болып, өз қасығымыз аузымызға жеткенде ауылға көбірек көңіл бөлінді. Құрманғазы ауылының көшелері асфальттала бастады. Жаңа типтегі мектеп, аурухана, емхана, шағын және орта бизнеске қолдау көрсетілгеннен кейін қос қабатты сауда орындары, бұрын үлкен қалалардан көретін сырты әйнекпен қапталған зәулім ғимараттар салынды. Бүгінде қаладан айырмашылығы шамалы. Жаз мезгілінде жасыл желек жамылып, құлпырып тұрады. Құрылыстар әлі де жалғасып жатыр.

Бүгінде Бұзауслан, Жапырық ауылдары өсіп, мөлтек ауданға айналып кетті. Қазір Болашақ пен Шипажай деген мөлтек аудандарда құрылыс қарқын алуда. Жеке меншік үйлерді айтпағанда, ауылымызда «Жайлы мектеп», Кадыркада 60 пәтерлік үш қабатты тұрғын үйдің құрылысы жүргізілуде. Бірақ қазір құрылыс жұмыстарына бет бұратын жастар аз. Барса тұрақтап қалмайды. Кейбір нысандар сырттан келген жұмыс күшімен тұрғызылады. Мысалы, өзбектер құрылыс саласында ерінбей- жалықпай жұмыс жасайды. Біздің жігіттеріміз олардан осал ма? Өмір бойы құрылыста жұмыс жасап, ел құрметіне бөленген Орақ Алқалиев ағамыздың ізбасарлары қайда? Ауылымыз көркейе түскені, оған шырай беретін ғимараттар өз қолымыздан шыққаны жақсы емес пе? Туған жерімізді түлетсе, оның дамуына қосқан үлесі болып қалады. Ертең Мәлік Матыбаев ағамыз сияқты кейінгі буынға мақтанышпен көрсете алады. Жұмысшы мамандықтар жылында жастарымыз осы жағын да ойлағаны дұрыс.

Қанат ҒҰМАРОВ

#ЗАҢМЕНТӘРТІП

Атырау облысы аумағында 1 сәуір- 31 мамыр аралығында «Бекіре-2025» жедел-профилактикалық іс-шарасы өтеді. Іс-шараның мақсаты - балық пен балық өнімдерінің заңсыз айналымын анықтауға, алдын алуға және жолын кесуге бағытталған. Акция кезінде республикалық, облыстық және жергілікті маңызы бар республикалық және облыстық тас жолдарда, сондай-ақ қала маңындағы далалық жолдарда мобильдік бекеттер және облыс аумағында бірнеше мобильдік топтар жұмыс істейді.  Айта кету керек, заңсыз балық аулаудың жолын кесу және қоғамдық тәртіпті қамтамасыз ету мақсатында Жайық өзені жағалауларында орналасқан қалалық полиция басқармасының Жедел басқару орталығының бейнебақылау камераларымен бақылау күшейтіледі.

Құрметті облыс тұрғындары! Осыған байланысты, жедел-алдын алу жұмыстарын жүргізу кезінде құқық қорғау органдары қызметкерлерінің заңды талаптарына аса түсіністікпен қарауларыңыз сұралады.

Қазақстан Тұран жолбарысының популяциясын қалпына келтіруге білек сыбана кірісті.  

Президент Қасым-Жомарт Тоқаев Бурабайда өткен Ұлттық құрылтайдың IV отырысында сөйлеген сөзінде ілбістерді сақтап, оның санын көбейтуді тапсырды, деп хабарлайды inbusiness.kz сайты.

"Табиғи байлығымен, жан-жануарлар дүниесімен бүкіл әлемге танымал еліміздің биологиялық әралуандығын қорғау айрықша маңызды міндетке айналды. Кеше жұмыс секциясы кезінде "Ауыл" партиясының өкілдері киіктер туралы мәселе көтергенін білемін. Аймақтардан да осыған қатысты өтініштер-хаттар келіп жатыр. Рұқсатсыз аң аулағандарға жазаны күшейту үшін менің бастамаммен 2019 жылы заңнамалық шаралар қабылданды. Осы және басқа да жан-жақты шаралардың арқасында еліміздегі киік саны күрт артты. Қазір оларға жойылып кету қаупі төніп тұрған жоқ", - деді Президент.

Оның айтуынша, ауыл шаруашылығы зардап шегіп жатыр. Эпизоотиялық ахуалдың да күрделеніп кету қаупі бар. Жалпы экожүйеге түсетін салмақ артты. Мемлекет басшысы Үкіметке білікті мамандарды жұмылдыра отырып, осы мәселені жан-жақты зерделеуді және байыпты шешім қабылдауды тапсырды.

"Біз Балқаш көлінің айналасында Тұран жолбарысының популяциясын қалпына келтіруге кірістік. Бұл – шаруашылық қызметке байланысты шешуге тура келетін көптеген мәселемен қатар жүретін күрделі міндет. Келесі кезекте ілбістерді сақтап, оның санын көбейтуіміз керек", - деді Қасым-Жомарт Тоқаев.