Саясат

Қазақстан - бейбітшілік пен келісім, тұрақтылық пен қауіпсіздік идеяларын белсенді түрде жүзеге асырып келе жатқан мемлекет. Еліміз тәуелсіздіктің 30 жылдығы қарсаңында өзінің бітімгершілік бастамаларын, соның ішінде ядролық қарусыздану мен оны таратудан бас тартуын алға тартты. Әлемдегі бітімгершілікке жету әрі оны сақтау жолында Мемлекет басшысы өзге де ең маңызды қадамдарға барып келеді. Президент Қасым-Жомарт Тоқаевтың таяуда Монғолия, Франция, Әзірбайжан секілді елдерге сапар шегіп, жетекші ел басшыларымен кездесіп, жүздесуі – соның айғағы. Ханойдан басталған ынтымақтастық Иә, ішкі саясатпен қатар әр елдің сыртқы саясаты өте маңызды. Осы орайда Қасым-Жомарт Кемелұлы Вьетнам Коммунистік партиясы Орталық комитеті Саяси бюросының мүшесі Нгуен Суан Тхангты қабылдады. Кездесу кезінде көптеген мәселелер көтерілді. Әңгімелесу кезінде Мемлекет басшысы Қ.Тоқаев бүгінде қазақ-вьетнам қатынастары қарқынды дамып келе жатқанын атап өтіп, Президент Вьетнамға жасаған былтырғы ресми сапарын ықыласпен еске алды. Вьетнам астанасы Ханойдағы маңызды келіссөздер екіжақты ынтымақтастыққа серпін беріп, оң нәтижесін көрсетті.

Президенттің пайымдауынша, Вьетнам – еліміздің Оңтүстік-Шығыс Азиядағы негізгі серіктесі. Қазақстан сауда-экономикалық, инвестициялық, мәдени-гуманитарлық салалардағы екіжақты қатынастарды жан-жақты нығайтуға дайын. Одан бөлек, әлеуметтік-экономикалық дамуын заңнамалық тұрғыдан қамтамасыз ету үшін парламентаралық ынтымақтастықты жандандырудың маңызын айрықша атап өтті. Вьетнам Коммунистік партиясы Орталық комитеті Саяси бюросының мүшесі, Хо Ши Мин атындағы Ұлттық саясат академиясының директоры Нгуен Суан Тханг:

-Қазақстан Президентінің Вьетнамға сапары кезінде қол жеткізілген уағдаластықты жүзеге асыруға белсенді атсалысып жатырмыз. Еліміздің ұстанымы ұқсас әрі БҰҰ, АӨСШК сияқты көпжақты алаңдарда табысты ынтымақтастық орнатқан,-деді өз сөзінде.

Қасым-Жомарт Тоқаев Қазақстанның стратегиялық зерттеулер институты мен Хо Ши Мин атындағы Ұлттық саясат академиясы арасында ынтымақтастық жөніндегі меморандумға қол қойылғанын құптады. Бұл құжаттың бірлескен ғылыми зерттеулерге тың серпін беретініне сенім білдірді. Кездесу соңында Қ.Тоқаев Вьетнам Президенті Лыонг Кыонгты келесі жылы Қазақстанға шақырып, оны Астана халықаралық форумына орай ұйымдастыруды ұсынды. Иә, Мемлекет басшысы сыртқы саясатта жақсы келісімдер жүргізіп, еліміздің бітімгершілік бастамаларын қолдап келеді. Әлемнің түкпір-түкпірінде түрлі жағдай орын алып жатса да, бейбітшіліктің бағасын білген біздің мемлекетте тыныштық салтанат құра бермек. Бакудегі басқосудың берері мол Климаттың өзгеруі жөніндегі БҰҰ конференциясы аясында өтетін Дүниежүзілік климат саммиті Әзірбайжан астанасы Бакуде болды. Әлем елдерінің басшылары жиылған бұл жиынға Президентіміз Қасым-Жомарт Тоқаев та қатысып, бүкіл бұқараға үндеу тастады. Өзекті мәселелер көтеріліп, олардың шешімдері туралы сөз болды. Күллі әлем жұрты соңғы аптада Бакуге көз тікті. Себебі, Баку олимпиадалық стадионында өткен саммиттің айтары көп, берері мол еді. Арнайы жұмыс сапарымен Әзірбайжанға жеткен Мемлекет басшысы Қ.Тоқаевты аталмыш мемлекеттің Президенті Ильхам Әлиев пен БҰҰ Бас хатшысы Антониу Гутерриш құшақ жая күтіп алды. Алғашқы болып сөйлеу мәртебесін алған Қасым-Жомарт Тоқаев Қазақстан жаһандық климат күн тәртібін қолдайтынын растап, табиғаттың өзгеруіне қарсы күресте халықаралық ынтымақтастықтың маңызы зор екенін баса айтты. Саммит барысында Мемлекет басшысы:

-Әлемдегі зиянды шығарындылардың бір пайызы ғана Орталық Азия елдеріне тиесілі. Соған қарамастан, бұл аймақ көптеген климаттық қатерге ұшырап отыр. Табиғаттағы өзгерістерге қарай әрекет ету шараларының тиімділігін арттыру үшін біз жасанды интеллект, жерсерік арқылы мониторингтің озық технологияларын, қауіпті алдын ала ескертетін, су және жер ресурстарын анағұрлым тиімді басқаратын басқа да цифрлық құралдарды белсенді қолдануға тиіспіз. Еліміз әлемдік уран жеткізу ісінің 43 пайызын қамтамасыз етеді және көміртегі мөлшері төмен қуат көзі саналатын ядролық энергетиканы дамытуда маңызды рөл атқарады. Биыл қазан айында өткен жалпыұлттық референдумда халқымыздың басым бөлігі Қазақстанда атом электр станциясын салуды қолдады. Біз осы саладағы жетекші технологиялық алпауыттармен серіктесе отырып, аталған жобаның қауіпсіздігі мен тиімділігін қамтамасыз етуге ұмтыламыз. Климаттың өзгеруі жаһандық су цикліне әсер етіп отыр. Әлемдегі табиғат апаттарының 80 пайыздан астамы су төңірегінде орын алады. Биыл біздің еліміз бұрын-соңды болмаған алапат су тасқынымен бетпе-бет келді. Келешекте осындай төтенше жағдайлар кезінде жедел әрекет етіп, одан кейінгі қайта қалпына келтіру жұмыстарын тез атқару үшін қауіп-қатерді басқарудың кешенді жүйесін енгіземіз. Су мәселесіне жаһан назарын аудару мақсатында биыл желтоқсан айында Франциямен бірлесіп One Water саммитін өткіземіз. Форумға қатысушылар су ресурстарын жаһандық деңгейде басқару мәселелерін талқылайды. Бүгінде Каспий теңізіне қауіп төніп тұр. Әлемдегі ең үлкен көлді құтқару – баршаға ортақ міндет әрі бұл ұзақмерзімді халықаралық ынтымақтастықты талап етеді. Осы орайда Президент Ильхам Әлиевтің Каспий маңы мемлекеттерінің сарапшылар тобын құру туралы ұсынысын қолдаймыз. Сонымен қатар Қазақстан Арал теңізін құтқару үшін нақты шаралар қабылдап жатыр,-деді ол өз сөзінде. Сөз соңында Қасым-Жомарт Тоқаев Әзірбайжан елінің COP29-ға табысты төрағалық еткені және саммиттің жоғары деңгейде өткені үшін теңіз арқылы табысатын көрші мемлекет Президенті Ильхам Әлиевке ризашылығын жеткізді. Бакудегі саммитте бас-аяғы 80-ге жуық ел Президенттері, халықаралық, өңірлік ұйымдардың басшылары сөз сөйледі. Соңғы жылдары жаһандық жылынудың жыры үдегені рас. Себебі, дабыл қағарлықтай үдеріс орын алып жатыр. Адамзат дер кезінде табиғатты аяламаса, қолда бар қазынадан қағылып қалуы әбден мүмкін. Оған кейбір мемлекеттер де дәлел бола алады. Көздің жауын алар бұрынғы кей мекендер қазіргі күні қоқыстан арыла алмай, көз көргісіз болған. Ал, табиғатқа, атмосфераға тасталып жатқан зиянды қалдықтар алдағы уақытта өз әсерін бермей қоймайды. Сондықтан, «Қыс қамыңды, жаз ойла» дегендей, қазірден бастап болашақтың қамына кіріспесек, ертеңіміз бұлыңғыр болуы әбден мүмкін. Кей экологтар бұл мәселені де айтып жүр. Мысалы, эколог Азаматхан Әміртай:

-Жаһандық жылынудың алдын алуға болады. Ол үшін әлем елдері келісім шартқа отыру керек. Қазіргі кезде Еуропа елдерінің бірқатары балама энергия көздеріне 30-40%-ға көшті. Осы бағытта Америка, Еуропа елдері жақсы жұмыс жасап жатыр. Қазақстан да жаһандық жылыну мәселесін алдын алуға байланысты қыруар жұмыс атқару керек,-дейді өз сөзінде.

Бұл саммит осы бастамалардың бастауы болмақ. Бүкіл әлем біріге жұмыс істемесе, нәтиженің жемісті болуы да белгісіз. Саммитте өзекті мәселелерді көтерген ел Президенті мұқым жұртқа үлгілі үндеу жасады. Алып компаниялардан бөлек қарапайым күнде де тұрғындар табиғатты аялауы керек. Бұл мәселе де біздің ауданда айтылып жүр. Сондықтан, еңбектеген баладан еңкейген кәріге дейін туған жерімізді іс жүзінде де таза ұстап, дәлелдеуіміз керек. Трамп таққа тағы отырады Мұхиттың арғы жағалауында орналасқан құрлықта орын алып жатқан саясат сахнасындағы науқан біздің елімізді де айналып өтпесі анық. Өйткені Америка Құрама Штаты – тәуелсіздігімізді алғаш мойындап, бізбен бірінші іскерлік байланыс орнатқан елдердің бірі. Сондықтан АҚШ Қазақстанның жаһандық және бітімгершілік бастамаларын қолдап отырған әлемдегі жетекші мемлекет. Өткен аптада Президент Қасым-Жомарт Тоқаев АҚШ-тың қырық жетінші Президенті атанған Дональд Трампты жеделхат арқылы құттықтады. Жеделхатта ізгі тілек айтылып, екі ел арасындағы ынтымақтастық жайында жазылды.

Еске сала кетейік, қараша айында Америка Құрама Штаттарында Президент сайлауы өтті. Талас пен тартысқа толы додада Республикалық партия сапынан сынға түскен Дональд Трамп 312 дауыс жинап, қарсыласы Камала Харристан басым түсті. Трамптың жеңісінен кейін ізін суытпай, әлем Президенттері құттықтап жатты. Оның ішінде Мемлекет басшысы Қ.Тоқаев та бар еді. Жеделхатта мынадай мәселелер мен тілектер айтылды: «Қазақстан Президенті қауіпсіздік, ядролық қаруды таратпау, инвестиция салаларындағы екіжақты ынтымақтастық дәйекті түрде дами беретініне сенім білдірді. Қасым-Жомарт Тоқаев Дональд Трампқа Америка халқының өсіп-өркендеуі жолындағы, сондай-ақ жаһандық тұрақтылық пен қауіпсіздікті қамтамасыз етудегі қызметіне табыс тіледі».

АҚШ-тың әлем экономикасына әсері зор екенін мұқым ел білетіні белгілі. Және дәл осы мемлекетпен ара қатынасымыз да аса маңызды. Себебі, қара алтынның да бағамы Президент сайлауынан кейін күрт төмендеп, бүкіл әлем валюталары аз да болса құлдырауға ұшырап, доллар өзінің позициясын мықтап алды. Саяси аренада да АҚШ-тың айтары көп. Дональд Трамп Ресей мен Украина арасындағы қақтығысты тоқтату үшін жедел түрде шешімдер қабылдайтынын баса айтқан болатын. Дәл осы бағытта ел Президенті Қ.Тоқаев та екі елді бейбітшілікке шақырып жүрген еді.

«Жақсы жанжалдан жаман бітім артық. Бейбітшіліксіз даму болмайды. Қазақстан қажет болған жағдайда өз жәрдемін көрсетуге дайын. Украинадағы ахуалға қатысты біз екі елді де диалогқа қол жеткізу үшін бүкіл күш-жігерді жұмсауға және бейбіт реттеу ісін бастауға шақырамыз. Басқа жолы жоқ», – деп жазған болатын Қазақстан Президенті Twitter парақшасында.

Соңғы жылдары екі ел арасында әуе кеңістігінде тікелей рейс ашу да қозғалып жүргенін білеміз. Дональд Трамптың АҚШ-тың 47-Президенті ретінде сайлануы қос тарап арасындағы ынтымақтастықты күшейтіп, ел экономикасына оң әсерін береді деп сенім білдіреміз.

Айта кетейік, АҚШ Президенті өз қызметіне ресми түрде 2025 жылдың 20 қаңтарында кірісетін болады. Сондай-ақ, Мемлекет басшысы Палестина Президенті Махмұд Аббасқа құттықтау жеделхатын жолдады. Ел Президенті Палестина халқын тәуелсіздік күнімен құттықтады. Иә, қазір Палестинаның басынан оңай күндер өтіп жатқан жоқ. Дегенмен, туы тұғырлы, елі егеменді елдің рухы да биік болуы тиіс. Бұл ел 1988 жылдың 15 қарашасында өзінің тәуелсіздігін алып, жаһанға жар салған болатын. Содан бері әлемдік аренада өз орны бар мемлекет. Ел Президенті Қасым-Жомарт Тоқаев құттықтау жеделхатында өзінің ізгі тілегін жеткізіп, екі ел арасындағы қарым-қатынас қос халықтың игілігі үшін дами беретініне сенім білдірді. Айта кетейік, Махмұд Аббас 2013 жылдың 5 қаңтарынан бастап Палестина Президенті қызметін атқарып келеді. Ал, Израиль мемлекетімен қақтығыс соңғы уақыттарда күрделеніп, шиеленісе түсті. Қазақстанда өз тарапынан екі ел арасындағы бітімгершілік бастамаларға қолдау көрсетіп келеді.

Е.АХМЕТКӘРІМОВ

Референдумға орай Жылыой ауданында спорттық шаралар өтіп жатыр. Соның бірі - Майкөмген ауылдық округіне қарасты 109 дауыс бер учаскесі маңындағы - садақ ату жарысы.
Мұнда өз дауысын беруге келген жастар ұлттық спортымызға ден қойып, өзінің мергендігін сынға салды. Спорттық шараға қатысқан ауыл жастары референдум кезінде де белсенділік танытуда.

П.Тәжі

Мемлекет басшысы Қасым-Жомарт Тоқаев елордадағы сайлау учаскесіне барып, АЭС салу бойынша референдумда дауыс берді, деп хабарлайды Zakon.kz.
Мемлекет басшысы Қасым-Жомарт Тоқаев таңдауын жасағаннан кейін БАҚ өкілдерінің алдына шығып, бірнеше сауалға жауап берді. Оның ішінде көпті толғандыратын Атом электр станциясын кім салады деген сұрақ та болды.

Президенттің сөзінше, бұл қиын мәселе. Сондықтан Үкімет оны талдап, тиісті келіссөздер жүргізуі керек. Бірақ бұл мәселеге менің жеке көзқарасымды айтсам, Қазақстанда халықаралық консорциум жұмыс істеуі керек. Ол мәндетті түрде ең озық технологиялары бар жаһандық компаниялардан тұруы керек. Бірақ, өмір көрсетеді", — деді президент.

Еске сала кетейік, дауыс беру тізіміне 12,3 миллионға жуық қазақстандық енгізілген. Референдумға 30 шет мемлекет пен төрт халықаралық ұйымның (Тәуелсіз Мемлекеттер Достастығы, Шанхай ынтымақтастық ұйымы, Түркі мемлекеттері ұйымы, Азиядағы өзара іс-қимыл және сенім шаралары жөніндегі кеңес) атынан 177 байқаушы қатысады.

Дауыс беру барысын 14 мемлекеттің орталық сайлау органдарының өкілдері, соның ішінде Әзірбайжан, Беларусь, Тәжікстан және Өзбекстан орталық сайлау органдарының төрағалары да бақылап отыр.

Қазақстан Республикасының Сыртқы істер министрлігі 37 елден 200 шетелдік журналистерді аккредиттеді, олар да республикалық референдумды бақылап, ақпарат таратады.

Президент  өз сөзінде бұрын-соңды болмаған геосаяси тұрақсыздық жағдайында дипломатия шешуші рөлге ие болғанын атап өтті.
– Геосаясат пен геоэкономикадағы түбегейлі өзгерістер, жаһандық деңгейдегі климаттық және демографиялық сын-қатерлер, пандемияның жаңа қаупі, қарулану бәсекесінің өрши түсуі, технологиялық прогресс, соның ішінде жасанды интеллектіні енгізу жағдайында стратегиялық тұрақтылық пен орнықты даму мәселелері баршамыз үшін өзекті бола түсті. Бұдан шығатын қорытынды анық: халықаралық қоғамдастық сындарлы диалогқа тың серпін беруі үшін күн тәртібіне оң өзгеріс жасауы қажет. Сондықтан біртұтас еуразиялық қауіпсіздік идеясы көпполярлы, әділетті және орнықты әлемдік тәртіпті қалыптастыруға тұжырымдамалық негіз бола алады, – деді Қасым-Жомарт Тоқаев.

Бұдан кейін Мемлекет басшысы конференция қатысушыларына қоғамдық өмірдің барлық саласында жүзеге асырылып жатқан Қазақстандағы ауқымды өзгерістер жөнінде мәлімет берді.

Қасым-Жомарт Тоқаевтың пікірінше, саяси реформалардың ең басты жаңалығы – Конституцияда Президент мандатын 7 жылдық бір мерзіммен шектеу туралы ереженің бекітілуі.

– Мұндай норма посткеңестік елдердің, тіпті одан тысқары мемлекеттердің ешқайсысында жоқ. Менің ойымша, Президентті бір рет жеті жылға сайлау – оның сайлауалды бағдарламасы мен реформаларын жүзеге асыруға жеткілікті уақыт.

Оған қоса Президент – халық жалдаған мемлекеттік қызметкер. Елімізде Заң мен Тәртіп үстемдік құруға тиіс екеніне сенімдімін. Тек сонда ғана реформаларды жүзеге асыруға, сондай-ақ Қазақстан экономикасына инвестиция тартуға қажетті жағдай жасай аламыз. Заң мен Тәртіп – Әділетті Қазақстанның негізі. Әділдікке қашан да, қай жерде де мұқтаждық бар. Біздің елде де солай. Қолға алған реформаларды іске асыру қаншалықты қиын болса да, діттеген мақсатымызға жетпей қоймаймыз. Оны ешкім тоқтатпақ тұрмақ, бағытынан жаңылдыра алмайды, – деді Мемлекет басшысы.

Форум басталғанға дейін Қазақстан Президенті мен Германияның Федералдық канцлері энергетика, машина жасау, логистика, тау-кен металлургиясы және ауыл шаруашылығы салаларындағы қазақ-герман бірлескен жобаларына арналған көрмені тамашалады.
Президент өз сөзін Германияның Федералдық канцлері Олаф Шольц пен осы елдің ірі бизнес өкілдеріне аталған форумға қатысқаны үшін ризашылық білдірумен бастады.

Мемлекет басшысының айтуынша, Канцлердің ресми сапары қазақ-герман қатынастарында маңызды кезең басталғанын білдіреді әрі өзара ықпалдастықты тереңдету үшін мол мүмкіндікке жол ашады.

– Елдеріміз арасындағы тығыз дипломатиялық қарым-қатынастар кең ауқымды экономикалық байланыстардың дамуына ықпал ететін негізгі фактор саналады. Германия дүние жүзіндегі ірі әрі ең дамыған экономикалардың бірі ретінде өндіріс, технология, жасыл экономика және инновация салаларында әлемдік стандарттарды айқындайды. Неміс өнімі өзінің ерекше сапасымен және сенімділігімен баршаға мәлім, – деді Мемлекет басшысы.

Қазақстан Республикасы Премьер-Министрінің орынбасары Тамара Дүйсенова Парламент депутаттарымен кездесу өткізіп, онда ел Президентінің тапсырмаларын іске асыру шеңберінде шаралар ұсынды. Кездесуге оқу-ағарту, ғылым және жоғары білім, еңбек және халықты әлеуметтік қорғау министрлері, сондай-ақ жоғары оқу орындарының басшылары қатысты.
Вице-премьер өз сөзінде елдегі шетелдік жоғары оқу орындарының филиалдарымен жұмыс істеуге назар аударды. Бұл бағытта Ғылым және жоғары білім министрлігі білім беру бағдарламаларын, оқыту технологияларын трансферттеу және оларда оқитын студенттердің білім деңгейін, құзыреттері мен дағдыларын бағалау бөлігінде олардың жұмысына бірыңғай талаптар қабылдауды жоспарлап отыр. Отандық жоғары оқу орындарының бәсекеге қабілеттілігін арттыру үшін білім беру сапасын тәуелсіз бағалау ұйымдастырылады. Бұл ретте негізгі критерийлер ЭЫДҰ елдері қолданатын көрсеткіштер болады. Бағалау нәтижелері бойынша жоғары оқу орындары лигаларға бөлінеді.

«Жаңа ережелер білім беру гранттарын бөлуге де әсер етеді. Алдағы жылдарда гранттар жоғары оқу орындарының кіретін лигасына қарай және ұлттық бірыңғай тестілеуде жоғары балл алған, бірақ конкурс аясында өте алмай қалған түлектерді қолдау мақсатында сараланатын немесе дифференциаланатын болады», — деді Тамара Дүйсенова.

Лигаларға бөлу колледждер арасында да жоспарланған. Мемлекет басшысы келесі жылды «Жұмысшы мамандықтары жылы» деп жариялады. Осыған байланысты Білім министрлігі ТжКБ трансформациясының кешенді жоспарын дайындауда.
Орта білім беру сапасын арттыру мақсатында өңірлерде тірек мектептер желісін құру, шағын жинақты мектептерді трансформациялау бойынша жұмыс жалғасады. Сондай-ақ жыл соңына дейін «Жайлы мектеп» жобасы аясында салынған мектептерді басқару жүйесінің жаңа моделі бекітіледі.

«Қаржыландыру көздері нақтылана отырып, алдағы 3 жылда 1300 мектепті күрделі жөндеу жоспары 1 желтоқсанға дейін әзірленеді. Мемлекеттік қолдаудың ашықтығын қамтамасыз ету үшін балаларды тәрбиелеу, оқыту және тамақтандыруға бөлінетін қаражат көлемі мобильді қосымшада немесе ата-аналардың «Әлеуметтік әмиянында» қызметті нақты алу фактісіне қарай көрсетіліп отыратын болады», — деді вице-премьер.

Премьер-Министрдің орынбасары сондай-ақ мектепке дейінгі білім беруге қатысты жоспарланып отырған шаралар туралы айтты. Оның айтуынша, балабақшалардың білім беру бағдарламаларын мектептердің бастауыш сыныптарымен синхрондау, Бірыңғай цифрлық кезек жобасын іске асыру жұмыстары жалғасады. Бұл жұмыс заңнамаға өзгерістер енгізуді талап етеді.
Дене шынықтыру және спорт саласында да жаңалықтар күтілуде. Атап айтқанда, спортты дамытудың үш сатылы жүйесі құрылатын болады. Сондай-ақ жоғары жетістіктер спорт түрлерінің тізбесі қайта қаралады. Осы салаға бөлінетін қаражатты тиімді және ұтымды пайдалану үшін жан басына шаққандағы қаржыландыру нормативі енгізіледі, спорт түрлері бойынша кадрлар даярлау жүйесі қайта қаралады. Бұл өзгерістер Мәжіліс қабырғасында қаралатын заң жобасы шеңберінде енгізілетін болады.

Денсаулық сақтау саласында да реформалар көзделген. Кепілдендірілген базалық және сақтандыру пакеттерінен тұратын медициналық көмектің Бірыңғай пакетін қалыптастыру ұсынылады. Ашықтықты қамтамасыз ету үшін цифрландыру енгізілуде. Жыл соңына дейін медициналық сақтандыру қорын цифрландыру бойынша жұмыстарды аяқтау және келесі жылдың соңына қарай Бірыңғай ұлттық ақпараттық жүйені енгізу жоспарлануда.

Үкімет Отбасының цифрлық картасының деректеріне сәйкес дағдарыстық және шұғыл санаттарға жатқызылған отбасылар санын азайту жөніндегі жұмысты жалғастырады.
«Өздеріңіз білетіндей, бұл шара әр отбасымен жекелей жұмыс істеп, олардың мүмкіндігіне қарай мейілінше оңтайлы мемлекеттік қолдау түрлерін ұсынуға бағытталған. Келесі маңызды шара – «Әлеуметтік әмиянды» енгізу. Онда әр отбасыға әлеуметтік мәртебесіне қарай ұсынылатын барлық мемлекеттік қолдау түрлері болады. Сондай-ақ қолдаудың нақты берілу фактісі негізінде мемлекет тарапынан көрсетілген көмек сомасы да көрсетіледі», — деп түйіндеді Тамара Дүйсенова.

2024 жылы 2 қыркүйекте Мемлекет басшысы Қасым-Жомарт Тоқаев "2024 жылғы 6 қазанда республикалық референдум өткiзу туралы" Жарлыққа қол қойды, деп хабарлайды Zakon.kz.
Жарлық мәтіні Ақорда сайтында жарияланды.

Қазақстан Республикасы Конституциясының 44-бабының 10) тармақшасына және "Республикалық референдум туралы" Қазақстан Республикасы Конституциялық заңының 18-бабына сәйкес ҚАУЛЫ ЕТЕМІН:

1. 2024 жылғы 6 қазанда республикалық референдум өткізілсін.

2 Республикалық референдумға: "Сіз Қазақстанда атом электр станциясын салуға келісесіз бе?" деген сауал шығарылсын.
3 Осы Жарлық 2024 жылғы 3 қыркүйекте бұқаралық ақпарат құралдарында ресми түрде жариялансын.

4 Республикалық референдумды ұйымдастыру мен өткiзу Референдумның орталық комиссиясының қызметін атқаратын Қазақстан Республикасының Орталық сайлау комиссиясына, сондай-ақ референдумның аумақтық және учаскелiк комиссияларының қызметiн атқаратын аумақтық және учаскелiк сайлау комиссияларына жүктелсiн.

5 Қазақстан Республикасының Үкіметі Қазақстан Республикасының Орталық сайлау комиссиясымен, Қазақстан Республикасының басқа да орталық мемлекеттік органдарымен және жергілікті атқарушы органдарымен бірлесіп республикалық референдумды ұйымдастыру мен өткізу бойынша қажетті шараларды қабылдасын.
"Осы Жарлық қол қойылған күнінен бастап күшіне енеді", делінген құжатта.

Айта кетсек, бүгін, 2024 жылғы 2 қыркүйекте ҚР Парламенті палаталарының бірлескен отырысында Мемлекет басшысы Қасым-Жомарт Тоқаев ел халқына Жолдауын жариялады.

Өз Жолдауында Президент: Атом электр стансасын салу мәселесіне қатысты жалпыұлттық референдум биылғы 6 қазанда өтеді. Бүгін тиісті Жарлыққа қол қоямын, деген еді. Президент бұл ретте жаһандық энергия тапшылығының өсуін ескере отырып, Қазақстан сенімді және экологиялық таза энергия көздеріне аса мұқтаж екенін баса атап өтті.

Президент Қазақстандағы кемінде 10 мың шақырым жолды орташа жөндеумен қамтуды және ол бойынша қоғамдық бақылауды күшейтуді тапсырды.

"Біздің автожолдарымыздың жағдайы - өзекті мәселе. Мен бұл туралы бұрын айтқан болатынмын. Ағымдағы жылы бүкіл ел бойынша 12 мың шақырымға жуық автомобиль жолдары жөнделіп, салынуда. Бұл Қазақстан үшін бұрын-соңды болмаған көлем болып табылады. Астана – Алматы, Ақтөбе – Атырау – Астрахань, Талдықорған – Өскемен трассаларын қайта жаңарту аяқталуда",-деді Тоқаев Қазақстан халқына Жолдауында.