Таяуда аудандық сотта Қазақстан Республикасы Әкімшілік құқық бұзушылық туралы кодексінің 463-бабының 1-бөлігімен әкімшілік құқық бұзушылық туралы іс қаралды.
Іс материалдарына сүйенсек, 1971 жылы туған 54 жастағы азамат биылғы жылдың 19 ақпанында Құлсары қаласының ішінде «Кia Optima» жеке автокөлігімен такси қызметін көрсеткен. Бірақ кейін анықталғанындай, ол кәсіпкер ретінде тіркелмей, жолаушыларды заңсыз тасымалдағаны белгілі болды. Сондықтан құзырлы орган қызметкері оның үстіне тиісті хаттама толтырып, ісін аудандық соттың қарауына жолдады.
Сот отырысында құқық бұзушы жасаған кінәсін толықтай мойындап, тексерген кезде өзінің рұқсат құжатының болмағанын айтып көрсетті. Оның кінәсі істің өзгеше материалдарымен толықтай дәлелденді.
Сондықтан сот қаулысымен құқық бұзушы О. кінәлі деп танылып, оған 41 283 теңге көлемінде әкімшілік айыппұл салынды. Күні бүгін сот қаулысы заңды күшіне енді.
Жайнагүл Төкешова,
аудандық сот әкімшісінің бас маманы
