Аталған жалпы мектепті бітіргендердің арасында жасы 40-тан асқан сотталған да бар
Атырау облысы бойынша қылмыстық-атқару жүйесі департаментіне бағынысты УГ-157/9 (ерлер жазасын өтейді) және УГ-157/11 (әйелдер жазасын өтейді) қауіпсіздігі орташа түзеу мекемесінде жазасын өтеп жатқан сотталғандар мекеме аумағындағы мектепті бітіріп, оларға жалпы орта білім алғаны туралы аттестаттар табысталды, – деп хабарлайды Polisia.kz.
Аталған жалпы мектепті бітіргендердің арасында жасы 40-тан асқан сотталған да бар. Коронавирустық инфекцияның таралуына жол бермеу мақсатында, мектеп бітіруші жазасын өтеушілерге аттестатты мекеме басшылығы барлық санитарлық талаптарды сақтай отыра табыстады.
Қылмыстық-атқару кодексінің талаптарына сай сотталғандарға орта білім алу міндеттеліп, жасы 30-дан асқандар арасында сауат ашудың қажеттілігі туралы тәрбие жұмыстары жүргізіледі. Дегенмен, 30-дан асқан сотталғандар арасында да аттестаты жоқтары кездессе, олар өз еріктерімен білім алуға өтініш білдіре алады.
Жалпы, мектепті оқу кезінде жазасын өтеушілердің қызығушылығы негізінен – тарих, география, “Адам, қоғам, құқық” пәндеріне жоғары болып келеді. Айта кету керек, биылғы жылы 11 сыныпты 18 сотталушы аяқтады. Ресми шарадан кейін жалпы орта білімді аяқтаған сотталушы түлектер аттестаттарын қолдарына ұстап, естелік суретке түсті.
