Адамның әрбір қадамы – ертеңге деген үміттің нышаны, әрбір тынысы – өз-өзімен күрестің белгісі. Жүгіру спорты – жүректің соғысын жеделдетіп, жігерді шыңдайтын нағыз сын. Ол бірде толассыз ағып жатқан өзенге ұқсаса, бірде тауға өрлеген саяхатшының қадамындай. Әсіресе 10 шақырымдық қашықтық – жеңіл серуен емес, нағыз төзімділікпен табандылықтың мектебі. Ауданымызда өткен «Жылыой желаяғы» 10 шақырымдық жүгірісі де жастар мен қоса зейнеткерлердің де шабытын оятып, өздерін бір сыннан өткізуге мүмкіндік сыйлады.
Аудандық мәдениет, тілдерді дамыту және спорт бөлімінің ұйымдастыруымен өткен айтулы додаға 200-ден астам спортшы қатысты. Жарыс шекарасы ауданмен шектелмей, Атырау қаласы мен өзге аудандардың желаяқтары да қатардан қалмады. Кәрісі мен жасы қатар шапқан бәйгеде кәсіби түрде спортпен шұғылданушылар да мәре сызығын кесті.
Атыраулық Еркебұлан Аташов ерлер арасында чемпиондық атақты жеңіп, көштің басында болды. Ал, 14 жастағы Зереп Абдрахманова қыздар арасында ешкімге қара көрсетпей, алтын алқаны иемденді. №9 мектептің 9-сынып оқушысы:
-Менің екінші жүгірісім. Қарсыластар өте мықты болды. Дегенмен, бар күш-жүгерімді жиып, соңына дейін босаңсымауға тырыстым. Ұйымдастырушыларға зор алғысымды білдіремін,-деді өз сөзінде. Каратэ спортының секциясына қатысатын Зереп бұл додаға өзінің спорттағы құрбыларымен бірге келген екен. Олар да үздіктер қатарынан көрініп, аттары әйгіленіп жатты. Еске сала кетейік, мәре сызығын аттаған барлық қатысушыға естелік медаль табыс етілді.
Бұл жарыс жеңімпаздарға ғана емес, мәреге жеткен әрбір қатысушыға үлкен жеңіс болды. Өйткені 10 шақырымды еңсеру тек спорттық бәсеке емес, адамның өз шыдамдылығы мен қайратына берген бағасы. Бірі үшін бұл - арманға қарай жасалған алғашқы қадам, енді бірі үшін – жүрек соғысын жеделдеткен жаңа қуаныш, ал басқалары үшін – өмірге деген құлшынысты қайта жандырған шабыт.
Е.АХМЕТКӘРІМОВ
