Жылыойлық арулар мереке қарсаңында волейболдан бақ сынады. Сегіз команда қатысқан турнирге аудан әкімінің орынбасары Гүлнафис Аязберікқызы өзі келіп, қатысушыларға сәттілік тіледі. Халықаралық әйелдер күніне орай Орталық стадионда өткен сайыста топқа бөлінген арулар, алдымен, өз төрттіктеріндегі үздіктерді анықтап, әрі қарай плей-оффта чемпиондық атаққа таласты.
Талас пен тартысқа толы турнирдың қорытындысы бойынша «Триумф» командасы қоланы қанағат тұтты. Ал, ақтық айқастағы қос мықтының ойыны көптің таңдайын қаққызып, қошеметіне ие болды. Партиямен алмасқан матчта «Жылыойдан» басым түскен «Ұстаздар» командасы чемпион атанып, алтын кубокты басынан асыра көтерді. Көрермен көзайымына айналып, «Үздік ойыншы» номинациясын жеңіп алған Мөлдір Сәттібекқызы:
- Жарыс жоғары деңгейде өтті. Шыны керек, әйелдер арасында осындай додалар көптеп ұйымдастырылса жақсы болар еді. Бәйгенің атмосферасы бөлек, соны сезініп, бір сергіп қалдық. Ұйымдастырушыларға алғысымды айтамын. Халықаралық әйелдер күнімен жаны да, тәні де сұлу барша әйелдер қауымын құттықтаймын,-деді өз сөзінде.
«Үздік қорғаушы» ретінде Динара Айдарбаева танылса, «Үздік үйлестіруші» Айымгүл Тугаева атанып, «Үздік шабуылшы» номинациясын Әсел Сарсенова жеңіп алды. Барша жеңімпаздар арнайы диплом және "ORLAN" ЖШС атынан ақшалай сертификаттармен марапатталды.
Е.АЛТАЙҰЛЫ
