Шоқпартоғайдың шоқтығы биік

Жылыойлық жасөспірімдер халықаралық дүбірлі додадан жеңіспен оралды. Орал қаласында дзюдодан «Batyr open cup» турнирі өтіп, №3 балалар-жасөспірімдер спорт мектебінің спортшылары үздіктер қатарынан көрінді. 2009-2016 жылы туған балалар арасындағы айтулы бәсеке талас пен тартысқа толы болды. Батыс Қазақстан облысында ұйымдастырылған турнирге Алматы, Қостанай, Ақтөбе, Маңғыстау, Батыс Қазақстан облысы, Атырау облыстарынан бөлек көршілес Ресей мемлекетінен де палуандар келді. Бірнеше салмақ дәрежесіндегі медальдар жиынтығы сарапқа салынып, қатысушылар өзара мықтыларды анықтады.

Турнирге Қара Арна ауылдық округінің №3 балалар-жасөспірімдер спорт мектебінің шәкірттері де үкілеген үмітін арқалап барған болатын. Үміт ақталып, қанжыға майланып, туған жерге ақжолтай хабармен жетті. Атап айтсақ, Мұса Серік пен Кәусар Ахметова қоланы қанағат тұтса, Бақдаулет Сабыр, Даниял Оңайбай, Әбубәкір Амандық, Шапағат Амандық, Досымжан Алпамыстар алтыннан алқа тағып, чемпион атанды. Сонымен қатар, Бекжан Бекболат «Жеңіске деген жігері үшін» атты арнайы жүлдемен марапатталды. Топ жарған жас дзюдошылардың жаттықтырушылары Манас Қайырбай мен Амантай Өришанов шәкірттеріне дән риза. Жеңістен жүзі бал-бұл жайнаған балғын палуан Досымжан Алпамыс:

- Ағайларыма мың рахмет. Жаттығуда көрсеткен әдіс-тәсілдері мен тактикаларын татамиде қолдану үшін барымды салдым. Соның нәтижесінде жеңіске жеттім деп ойлаймын. Алдағы уақытта да туған жеріме тек қана алтын жүлде сыйлап, Жылыойдың атын әлемге танытқым келеді,-деді өз сөзінде.

Иә, шынында, Шоқпартоғайда дзюдо спорты бұрыннан-ақ ілгері дамыған. Оған кешегі Париж паралимпиадасында шәкірттері атой салған Жандос Қияновтар дәлел. Ұлттық құраманың тізгінін ұстаған білікті бапкерді шығарған мекеннен олимпиада ойындарының өзінен жүлде алып келетін таланттар қанат қағары даусыз. Тек жас спортшыларға лайықты жағдай жасалу керек. Жеңімпаздарды біз де құттықтап, көк туымызды көкте желбіретер өрендеріміз татамиде жауырыны жер иіскемесін деп тілейміз.

Е.АЛТАЙҰЛЫ

ФОТОГАЛЕРЕЯ

Біріңғай мемлекеттік байланыс

AQPARATPRINT