Құрманғазы ауданында еліміздің гимнінің авторларының бірі, белгілі ақын Жұмекен Нәжімеденовтың рухына арналған бокстан жасөспірімдер арасында республикалық ашық турнир өтті.

Оған көршілес Ресей, Түркістан, Ақтөбе, Маңғыстау облыстарынан және облысымыздағы Мақат, Махамбет және Жылыой аудандарынан жүзден астам жасөспірім боксшы қатысты. 5 күнге созылған дүбірлі додада жылыойлық спортшылар мықтылық танытып, жүлделі орындарға ие болды. Атап айтсақ, 50 кг салмақта қолғап түйістірген Мирас Төлеген сан мықтының ішінен топ жарып, «Бокстан ҚР спорт шеберлігіне үміткер» атағына ие болды.

Сонымен қатар, Нұрсұлтан Жақсылықов, Шакен Ізденов, Жанарыс Орынбасар, Еркебұлан Аманкелдиев жүлделі 3-орынды еншіледі. Республикалық ашық турнирде ауданымыздың намысын қорғап қайтқан боксшыларымызды дайындаған бапкер Талғат Ахметұлы болатын.

Қ.Дүйсенбетов.