Наурызнама онкүндігі бастау алғалы ауданымызда бірқатар мәдени-спорттық шаралар ұйымдастырылуда. Соның бірі, ұлттық спортымыз, қазақ күресінен жасөспірімдер арасында аудандық ашық турнир өтті. Боз кілемде бақ сынаған болашақ чемпиондардың жеңіске деген жігері жанкүйерлердің арқасын қоздырып, мерекелік көңіл-күй сыйлады.
Наурыз мерекесіне орай өткен бұл турнир аудандық мәдениет, тілдерді дамыту, дене шынықтыру және спорт бөлімінің ұйымдастыруымен өтіп, 2012-13 және 2014-15 жылы туған спортшылар қатысты. Аталған жарысқа Маңғыстау, Ақтөбе, Атырау облыстарынан жалпы есебі 220 спортшы мен 11 команда келіп, 8 салмақ дәрежесінде өзара мықтыларды анықтады. Дода барысында ауданымыздағы №1 балалар-жасөспірімдер спорт мектебінің шәкірттеріне қазақ күресінен «1 -жасөспірімдік разрядты спортшы» разряд куәлігі берілді.
Ұйымдастырушылардың бірі, аудандық мәдениет, тілдерді дамыту, дене шынықтыру және спорт бөлімінің бас маманы Анарбек Мұратұлы:
-Дода жоғары деңгейде өтуде. Аудандық ашық турнир емес, Батыс аймағының чемпионаты іспеттес. Себебі, спортшылардың барлығы тыңғылықты дайындықпен келіп, өздерінің шеберліктерімен тәнті қылуда. Боз кілемге шыққандар арасында көк туымызды көкте желбіретер болашақ чемпиондарымыз жүргеніне сенімдімін. Барша жеңімпаздарды жеңісімен, жерлестерімді айтулы мерекемен құттықтаймын,-деді өз сөзінде.
Аудан намысын қорғаған Д.Таңжарбай, А.Төкен, П.Қазиз, Т.Қадауат, С.Шопандар алтыннан алқа тағып, жылыойлықтардың жігерін жаныды. Құрманғазыдан Ю.Асқар, Хромтаудан И.Ақылбек, Атырау қаласынан келген А.Қуанышқалилар да жеңіс тұғырынан көрініп, өз салмақ дәрежесінде чемпион атанды.
Барша жеңімпаздар мен жүлдегерлер арнайы диплом және медальмен марапатталды. Жауырыны қақпақтай, қара айдары тоқпақтай қара күш иегері Қажымұқанның ізін қуған жас палуандардың бұл күні мерейі үстем болып, ұлттық спорт түрі ұлығыланды.
Е.АЛТАЙҰЛЫ
