Мұқтаж жандарға көрсетілетін әлеуметтік көмек, қарапайым халықты жұмыспен қамту, баспанасызға тұрғын үй, ауыз су, қараңғы көшелерге тоқ көзі мен тасжол төсеу, ауыл шаруашылығындағы қордаланған мәселелер мен өзге де әлеуметтік, коммуналдық проблемалар аудан тұрғындарын қатты мазалап жүр екен. Бұл жайт жақында аудан әкімі Жұмабек Қаражановтың аудан тұрғындарын жеке қабылдау жүргізуі кезінде белгілі болды.
Қабылдауға аудан әкімінің орынбасарлары, жауапты бөлім басшылары қатысып, әкіммен бірге тұрғындардың сауалдарына жауап беріп, керек жерінде кеңестерін де берді. Жұмабек Байрақбайұлының сол күнгі жеке қабылдауына жеке сұрақтары бойынша 28 тұрғын кіріп-шақты. Аудан басшысы әрқайсысының арыз-талаптарын тыңдап, шешілу жолдарын айтты, орынбасарлары мен бөлім басшыларына тапсырма берді.
Жалпы аудан әкімі жыл басынан бері күні бүгінге дейін 19 қабылдау өткізіп, 300-ден астам тұрғынды жеке қабылдады. Негізінен, өңір басшысы аудандық әкімдіктің арнайы бекітілген қабылдау кестесіне сәйкес тұрғындарды аптасына бір рет қабылдайды. Айта кету керек, аудан әкімінің жеке қабылдауына жазылуды аудан әкімі аппаратының жалпы бөлімі жүргізеді. Байланыс нөмірі: 8 (71237) 5-06-83
Е.БИСЕКЕНҰЛЫ
