Жуырда Маңғыстау өлкесі Ақтау қаласында 22 наурыз Ұлыстың Ұлы күні әз Наурыз мерекесінде қазақтың ұлттық киімін киген 5000 адам Каспий жағалауына жиналып, Гиннестің рекордын орнатқаны аян. Міне, сол тарихи оқиғаға жерлесіміз, ерлі-зайыпты Ескендір Ізмағамбетов пен Гауһар Айтуарова да қатысып, халықтық құндылығымызды ұлықтауға атсалысып қайтты.
Қазақ елін ұлттық киіміміз арқылы әлемге паш еткен маңғаз маңғыстаулықтар ғана емес, киелі кеңжылыойлықтардың да болғаны бізді қатты қуантты.
- Наурыз мерекесі қарсаңында жұртшылық қазақтың ұлттық киімімен Ақтау қаласындағы Каспий жағалауындағы амфитеатр алаңына жиналады дегенді естідік. Ауданымыздан өз үлесімізді қосайық деп Маңғыстау төріне жол тарттық. Ата-бабамыздың ғасырлар бойы сақтап келген мол мұрамызды әлемге паш ететін мүмкіндік бергеніне ерекше қуандық. Жолымыз болып 4531-4532-ші нөмермен ұлттық киімді насихаттаушы болып тіркеліп, қолымызға бирка тағылып, қалың жұрттың арасына сіңіп кеттік. Ол жерде үлкені бар, жасы бар, барлығы да ұлттық нақыштағы сәнді киіммен шықты. 100 жыл бұрынғы киілген қос етекті көйлек, сәукеле, кимешек, білезік, шашбаумен қатар түлкі тымақ елтіріден тігілген ішік (тондар), ғасырлар бойы тарихы бар былғары саптама етік, басқа да ерекше ұлттық киімдердің куәсі болдық,- дейді Гауһар Айтуарова.
Иә, бүгінде ұлттық киімдерді тек мереке қарсаңында ғана емес, күнделікті киюге талпыныс артып келеді. Қазақ халқының дәуірден дәуірге өтіп, дала болмысын, ата-бабамыздың салт-дәстүрін ұмытпай келе жатқаны көңілге қуаныш сыйлайды. «Патриоттық күй кештік» деген жерлесіміздің де ұлттық киімге деген құрметі қуантарлық.
- Маңғыстау халқының ұзақ жылдар бойы құндылығы жоғары ұлттық киімдерді сақтап келгеніне дән риза болдық. Сол күні Алланың нұры жауып тұрды. Тарихи сәт туғанда еліміздің көк байрағын желбіретіп, әнұранын шырқап керемет әсер алдық. Қазақ елінің ауызбіршілігінің арқасында осындай дәрежеге жеттік, ағайын! Біз де сол 5000 адамның ішінен ұлттық киімдерді насихаттауға бір тамшы болса да өз үлесімізді қосып қайтқанымызға қуаныштымыз. Қазақ болып туғанымызға мақтанамыз. Ұлтымыздың рухы биік, құндылығы әрқашанда жоғары болғай! Ана тіліміз бен салт-дәстүріміз асқақтай берсін, әз Наурыз халқымызға аманшылық, әр шаңыраққа шаттық, бақыт әкелсін!- дейді кейіпкеріміз.
Ескендір Ізмағамбетов пен Гаухар Айтуарова – екі ұл тәрбиелеп отырған өнегелі отбасы. Отағасы “Казтрансойл АҚ” Құлсары мұнай құбырлары басқармасының арнаулы техникалар бөлімінің машинисті, ал жұбайы Гаухар Айтуарова аудандық орталық кітапхананың шаруашылық меңгерушісі.
Иә, ұлттық киім – халықтық мұрамыз. Бұл – бүтін бір ұлттың айнасы. Ендеше, сол құндылығымызды дүниежүзіне паш еткен тарихи оқиғаға қатысушы қос жерлесімізбен біз де мақтанамыз.
А.МОЛДАШЕВ
