Майкөмгендіктер мәселесі қашан шешіледі?

Өткен аптада аудандық мәслихат төрағасы, депутат Қанат Мыңбаев пен “AMANAT” партиясы аудандық филиалының төрағасы Сайлаубай Таласов Майкөмген ауылы тұрғындарымен кездесті. Алақандай ауылдың шағын мәдениет үйінде өткен жиынға тұрғылықты жерінің басты мәселелеріне жауап іздей келген жергілікті жұртшылық қатысты. «AMANAT» партиясы аманатқа қиянат жасамайтын болар» - деп бастады әңгімесін тұрғындар. Сондай-ақ, партия өкілдерінің бұған дейін де бірнеше рет ауыл халқымен кездесіп, бірақ көтерілген мәселеден ешқандай нәтиже шығармай жүргендігін де баса айтты. Оларды қажытқан проблема көп болмаса да, әлі күнге шешімін таппай келеді. Жиын барысында шалғай ауылдың өзекті мәселесін ортаға салған Мүтайыр Әкенов: - Бізді жол мәселесі әбден қажытты. Қаншама рет осы ауылға келіп жүрсіздер, әр кездескен сайын жол салып беруді сұраймыз. «Әне салады, міне салады» деп мәселені жылы жауып келе жатқанына 8 жылға таяды. Енді 2 жыл өтсе 10 жыл болады екен. «Жылдың аяғына дейін жасалады» дегенді талай естідік. Бірақ жыл басталғалы ауылдан бірде-бір арнау-лы техника көрмедік. Неге бізде жұмыс тым жақсы басталып, арты сиырқұйымшақтанып кетеді? -деді мұңын шағып. Бұл сауалға жауап іздеу мақсатында жауапты мердігер мекеме басшысына хабарласқан аудандық мәслихат төрағасы Қанат Мыңбаев ауыл халқы алдында жол мәселесіне қатысты жауабын берді: - Міне, сіздің алдыңызда «Атырау-Армандастар» ЖШС-нің басшысы Амандық Иманбаевпен сөйлесіп отырмын. Былтыр Майкөмген ауылына автомобиль жолын салуға осы мердігер мекеме арқылы келісім шарт жасақталды. Яғни, 3 шақырым тас жолды осы кәсіпорын салуы керек. Бұл кісі ауылға техника ертең-ақ жетіп, жұмыс жалғасатынын айтып отыр. Құрылыс басталса, бірден бізге хабар беріңіздер. Өйткені осы үшін арнайы құрылған 8 адамнан тұратын бақылау комиссиясы бар. Сондай-ақ бұл жаққа мектеп салу мәселесінің де жиі айтылатынын жақсы білемін. Күні кеше «Теңізшевройл» компаниясы қоғамдық тыңдау өткізген еді. Онда осы ауылға мектеп салынатынын айтты. Бірақ нақты қашан басталып, қашан аяқталарын білмейміз. Оны өздеріңізге қосымша хабардар етерміз,-деді өз сөзінде. Ауылдағы екінші бір мәселе байланыс желісі екен. Одан бөлек «Қазақтелекомның» табалдырығын тоздырып, «Wi-Fi» орната алмай жүрген бірнеше үй бар. «Ғасырдың көшіне ілесеміз бе десек, кейін жүріп барамыз ба, қаламен байланыс орната алмау, тіпті, сұмдық қой» - деді жиналғандар. Тұрғындардың айтуынша, бағаналардың арасы алшақ, сол үшін электр желілері желді күндері жиі үзілетін көрінеді. Ал ауыл тұрғындарының мазасын қашырып, тіпті баспананы бұздырып, қайта тұрғызуына дейін әкеп соқтырған құмырсқаның бір түрі – «термиттердің» көбеюі майкөмгендіктер үшін үлкен мәселеге айналып отыр. Олардың бірі үй төбесін жыл сайын бұзып тазалайтын болса, бірі үй іргесін улап, мезі болған. Тас пен темірден өзгенің бәрін кеміретін жәндіктермен осы уақытқа дейін ауыл азаматтары өздерінше күресіп келгенімен әрі қарай құтылудың амалын таба алмай отыр. Себебі «термиттер» күн өткен сайын жылдам көбеюде. - «Термит» деп аталатын құмырсқа, шыны керек, биыл тіпті өршіп кетті. Менің тек мал қорамда ғана бар. Ал кейбір тұрғындардың үйін басып алды. Баспананың еденінде, төбесінде, қуыс-тесіктің барлығында қаулап жүр. Қарызданып, қауғаланып әрең дегенде үй салған ауыл адамдарының қайтадан пәтер тұрғызып жатқанын көріп жаның ашиды. Одан құтылу үшін қолымыздан келгеннің бәрін, бар білетінімізді жасап жатырмыз. Бірақ әрі қарай күресуге жағдайымыз келмейді,-дейді амалын табуға көмек сұраған ауыл тұрғыны Жұмагүл Жұмаева. Расымен де, Майкөмгеннен Құлсарыға немесе Майкөмгеннен Боранқұлға шығар жолдың екі жақ бөлігінен төмпешік боп жатқан әлгі құмырсқаның илеуін көруге болады. Тұрғылықты халықтың сөзіне сүйенсек, бұл төмпешіктер уақыт өткен сайын көбею үстінде. Мәселе жақын арада мықтап тұрып қолға алынбаса, Құлсары қаласына да қауіп төндіруі әбден мүмкін дейді олар. Ал зиянды жәндікті улау жұмыстары әлі күнге жүргізілмеген. Бұл мәселе бойынша “AMANAT” партиясы филиалының төрағасы Сайлаубай Таласов Майкөмген ауылының депутаты Әлібек Амандықовқа ескертетінін айтты. Депутатқа өзіміз байланысып көрдік. Ол өз сөзінде: - Мен қазір бұл мәселе бойынша депутаттық сауал дайындап жатырмын. Және алдағы аптада бұл істі денсаулық сақтау министрлігіне жолдаймын. Себебі бұған не Денсаулық министрлігі, не болмаса санитарлық-эпидемиологиялық станциясы жауап беру керек. Содан кейін барып істі қолға аламыз,-дейді «термиттерді» жою мақсатында жұмыс жасалатындығын айтып. Иә, майкөмгендіктер бұл жолы да мәселенің мән-жайын жеріне жеткізе айтып берді. Халықтың аманаттап тапсырғанын “AMANAT” партиясының белсенді басшы азаматтары бұл жолы аяқсыз қалдырмай, түпкілікті шешеді деген сенімдеміз. Д.ІЗБАСАРҚЫЗЫ