Ер есімі-ел есінде. Иә, қашанда елі үшін еткен еңбек өтелмей қалмақ емес. Ауданымызда Бердіғали Мұқановтың есімін білмейтіндер жоқ болар, сірә?! Сонау сұрапыл жылдары,1941-1945 жылдар аралығында болған Ұлы Отан соғысына Жылыой өңірінен аттанған ерлердің бірі еді.
Кез келген өлкенің шырайын кіргізетін - сәулеті жарасқан ғимараттар мен саясы мол саябақтармен қатар көшелер. Атауы арқылы тарихтан тамыр тартып, ұлыларымызды ұлықтауға үлес қосатын, ұлтымызды дәріптеуге дем беретін көше атауларының да маңызы зор. "Жер-судың аты - халықтың хаты" деген сөз бекер айтылмаса керек-ті.
Өткен аптада Құлсары қаласындағы 4-ші ықшамаудандағы 228-ші көшеге Ұлы Отан соғысының ардагері, «Ерен еңбегі үшін», «Ленинградты қорғағаны үшін» медальдарының иегері Бердіғали Мұқанов есімі берілді. Мұндағы мақсат - елі үшін еңбек еткен ердің өткен ғұмырынан ғибрат шерту, игі істерінің есімінің ұрпақ санасында жаңғырып, ұмытылмауына үлес қосу. Осыған орай ауданымызда салтанатты шара өтіп, Құлсары қаласы әкімінің орынбасары Арай Нұрмаханова құттықтау сөз сөйлеп, майдангер өмірінен біраз сыр шертті.
Бердіғали Мұқанов 1911 жылы 15 қаңтарда қарапайым отбасында дүниеге келген. Қосшағыл поселкесіндегі М.Ю. Лермонтов атындағы орта мектепте білім алып, 1930 жылы бітіреді.
1941-1942 жылдары ІІ Дүниежүзілік соғысқа қатысып, Воронеж майданында 748-атқыштар полкінің взвод комондирінің көмекшісі болып, әскери қызметін атқарады. 1945 жылы Балашова қаласында паровоз депосы отрядының командирі болды. Ұлы Отан соғысында 1946 жылы «Германияны жеңгені үшін» медальмен, 1966 жылы «Ұлы Отан соғысындағы жеңіске 20 жыл» медальдарымен марапатталады.
1956-1971 жылдары А.С. Пушкин атындағы мектепте зейнеткерлікке жеткенше, дене тәрбиесі және әскери дайындық пәндері мұғалімі болып қызмет етті. Қарап отырсақ, қас қағым сәттей өтіп кеткен ғұмырында қаншама игі істер атқарып, айналасына мейірім шуағын сыйлап өткен. Жақсы адамның жақсылығын бір күн емес, бүкіл ғұмыр бойы сезініп өтерің хақ.
Бердіғали ағаның зайыбы Дәния Мұқанова да еңбек және тыл ардагері ретінде бірнеше рет «Ана даңқы» орденімен марапатталған. Осындай зиялы да үлгілі жандардың жанұясында 5 ұл, 3 қыз тәрбиеленіп, бүгінде саялы орманға айналған-ды. Ұл-қыздарынан тараған немере, жиен, шөбере, шөпшектері ата-әжесінің мерейін арттырып, биік белестерді бағындырып жүр.
Иә, ерлік ешқашан ұмытылмайды, әсіресе, кешегі қан майданда бүгінгі бейбіт күннің бірлігі үшін, жер үшін жан қиған боздақтар, батыр, жауынгерлер мәңгі ұрпақ жадында сақталары анық.
Айкерім ШАҒАТАЕВА,
Сүлеймен Демирел атындағы университеттің 2-курс студенті
