8 наурыз – Халықаралық әйелдер күніне арналған “Асыл аналар – ардақты арулар” атты мерекелік шара Майкөмген ауылдық округіндегі «Майкөмген» мәдениет үйінде өтті. Салтанатты сәтке аудан әкімі Жұмабек Қаражанов қатысып, өңіріміздің өсіп-өркендеуіне өз үлесін қосып жүрген барша әйел-азаматтарға жүрекжарды жылы лебізін білдірді. Салтанатты шараның шымылдығы Асқар Қоңыров, Таңатар Темірханов және Азамат Құлдырахмановтың орындауындағы “Гүл сыйлайық әйелге” әнімен ашылып, аудан әкімінің құттықтау сөзіне жалғасты.
- Сіздерді көктемнің керемет мерекесі 8 наурыз - Халықаралық әйелдер күнімен құттықтаймын. Әйелдер – қоғамның ең құнды жаратылысы. Білімімен біліктілігімен, бар ынта-жігерімен бүгінгі таңда түрлі салада қызмет етіп жүрген аруларға мың алғыс айтамын. Осындай керемет сәтті пайдаланып сіздерге денсаулық, отбасыларыңызға бақ-береке тілеймін,-деді өңір басшысы Жұмабек Байрақбайұлы.
Және әртүрлі салада елеулі еңбек етіп, тұрмыс пен тіршіліктің тізгінін қатар ұстап жүрген әйелдер қауымына Алғыс хатын табыстады. Соның бірі - Зоя Тасболатова еді. Аудан тұрғындарының денсаулығына қашан да жанашырлық танытып, санитарлық-гигиеналық және жұқпалы ауруларға қарсы шараларды белгілеп, оны әркез қадағалауда ұстайтын аяулы ана, ақ жаулықты әже марапатқа лайық жандардың қатарынан табылғанына дән риза.
- Бүгін – керемет күн. Себебі аудан әкімінің қолынан Халықаралық әйелдер мерекесіне орай Алғыс хат алып жатырмын. Біраз жылдан бері еңбегіміз еленіп, осындай керемет мерекелік кешке шақырғанына ризамын. Осындай керемет күні барша әйелдерге, қыз-келіншектерге дендеріне саулық тілеймін. Отбасында бақыт құсы болып жүре берсін. Көрінген бала-шағамыз аман болсын. Ешқандай жаман аурулармен ауырмасын. Бақытты өмір сүре берейік,-деді аудандық санитарлық-эпидемиологиялық басқарманың жетекші маманы З.Тасболатова.
Мерекелік концерт аудан өнерпаздарының әсем әні мен тәтті күйіне, мың бұралған биіне жалғасты. Қызу тіршіліктен бір сәт босаған аналарымыз, апа-сіңлілеріміз де кештің сәнін кіргізбей қоя ма?!
Ақ кимешек тағынған әжелер де алдыңғы қатардан төбе көрсетіп, шат-шадыман күйге бөленді. Олардың осындай жадыраған жүзін көрген Майкөмген ауылдық округінің әкімі Нұржарық Сауытов та әйелдер мерекесіне құттықтау тілегін жеткізіп:
- Құрметті де қадірменді аналар, арулар! Сіздерді 8 наурыз – халықаралық аналар күнімен шын жүректен құттықтаймын. «Ана бір қолымен әлемді тербетсе, бір қолымен бесікті тербетеді» дегендей, сіздерге өмірдің бар жақсылығын тілеп, отбасыларыңызға амандық, дендеріңізге саулық тілеймін.
Барша әйелдер қауымының мерекесіне орай өткізіліп жатырған шара жоғары деңгейде өтуіне тілегін қосты. Бұл концерт әрбір әйелдің көңілінен шығып, олардың махаббат, мейірімділік пен келісімнің қайнар көзі ретіндегі рөлін мойындады. Себебі олар өмір сыйлайды, ұрпақ тәрбиелеп өсіреді. Әйел – күш! Оның энергиясы әлемді өзгертуге, шабыттандыруға аса қабілетті.
Д.ІЗБАСАРҚЫЗЫ
