Жаз айында адамдар суға шомылып, көл жағасына кеп демалушылар қатары артады. Алайда, суға шомылу кезінде ойламаған жерден оқыс оқиғаға тап болған ересек адамдар да, балалар да жетіп артылады. Соңғы кезде ауданымызда да суға кету деректері көптеп тіркелуде.
Түрлі ақпарат көздерінен суға кету дерегі бойынша оқиғаларды көріп те, естіп те жатамыз. Әсіресе, суға батып бара жатқан балаларды ойланбастан, өз өмірін қатерге тігіп, құтқарып қалған батыр да батыл жандар туралы көп айтылуда.Сондай батыл азаматтар ауданымызда да бар болып шықты. Олар қарапайым жылыойлық тұрғындар Серікбай Аханов пен Есет Отаралиевтер.
Серікбай Сәрсенғалиұлы есімді азамат өткен мамыр айының 25 күні Қамыскөл көліне 9 жасар баланың суға батып бара жатқанын көріп, еш кідірместен құтқару үшін көлге түседі. Көп ұзамай баланы құтқарып, жағаға алып шыққан. Серікбайдың айтуынша, оқиға былай болған. Ол автокөлігімен көл жағасында келе жатып, бір топ балалардың айқайлап көмек сұрағанын естиді. Мән-жайды анықтамақ болып автокөлігін тоқтатып, шыққанда көл бетінде бір баланың жанталасып, тұншығып батып бара жатқанын көрген. Мұны көрген жігіт көп ойланбастан ағыспен ағып бара жатқан баланы жағаға алып шыққан. Алғашқы жедел көмек көрсетіп, есін жиған балақайды «Жедел жәрдем» дәрігерлеріне табыстаған.
- Баланы құтқару кезінде судың ағысы қатты болды. Жағаға шығарар кезде қиындықтар болды. Бала да бірден есін жинай алмай, қорқып қалды. Алғашқы көмек көрсеткеннен кейін ғана жағдайы жақсарды. Мен жанұшырып, жасанды тыныс алу әдісін жасап жатқанда көмек сұраған өзге балалар «Жедел жәрдемге» хабарлап үлгерген екен. Күн салқындау болатын. Бала жылынсын деп көлігіме отырғыздым. «Жедел жәрдем» көлігі де көп кешікпей келді. Дәрігерлер баланың денсаулығын тексеріп, бұдан соң ата-анасына хабарлайтындықтарын айтты,- дейді бүгінгінің батырларының бірі Серікбай Аханов.
Ал екінші жүрек жұтқан Есет Отаралиев есімді азамат бір емес, 12 және 13 жасар екі бірдей баланы ажалдан аман алып қалған. Қалалық №2 МӨСБ-нің байланыс бекетіне 17 сағат 10 минутта Тұрғызба ауылы маңында балалардың суға батып бара жатқандығы жөнінде дабыл түседі. Оқыс оқиға 4 маусымда орын алған. Жем өзенінің негізгі арнасына, ауыл шетінен 200 метр қашықтай жердегі арнайы белгіленбеген орынға сегіз бала суға түскен. Кенет олардың арасынан екі бала суға батып кетеді. Бақыттарына орай, сол маңда жүрген Есет Макутұлы бірден батыл қадам жасап, су тұңғиығына кете жаздаған екі жасөспірімді құтқарып қалған.
Бұл екі оқиға да аудандық төтенше жағдайлар бөлімінің №2 мамандандырылған өрт сөндіру бөлімінің бекетінде тіркелді. Балаларды суға батып бара жатқан жерінен арашалап, лезде көмек берген жандар есімі де белгілі болды.
Бүгінгінің батырлары Серікбай Аханов пен Есет Отаралиевтердің ерлікке пара-пар істерін елеусіз қалдырған жөн емес-ті. Жүрегінде батылдық пен мейірім оты қатар лаулаған азаматтардың ізгі іс-әрекеті өзгелерге үлгі болуы қажет. Аудандық әкімдік ғимаратының мәжіліс залында қос батыр жігітпен кездесу өтті. Марапаттау шарасын аудандық мәслихат хатшысы С.Таласов жүргізді. Оған ауданымыздағы Төтенше жағдайлар бөлімінің басшысы Н.Өтешов, аудандық мәслихат депутаттары және т.б бөлім басшылары қатысты.
Жиында ауданымыздың екі батырына аудандық мәслихат депутаттары және жеке кәсіпкер Әліби Қалдыбаевтың демеушілігімен Алғыс хаттар мен бағалы сыйлықтар табыс етілді.
Кездесуде мәслихат депутаттары қос батыр азаматқа алғыстарын білдірді. Халық қалаулылары атынан тиісті министрлікке жоғары марапатқа ұсынатындарын жеткізді.
Жанқиярлық ерліктері үшін бұл аталған азаматтар қандай да болсын марапатқа лайық. Асау толқынмен жағаласып, өз өмірін қатерге тіге отырып, өзгенің өмірін арашалап құтқарып қалу оңай еместігі белгілі. Сондықтан ержүрек ер азаматтар ісі елеусіз қалмақ емес.
Азамат ЖҰМАБАЙҰЛЫ
