Жылыойлық мұсылман жамағатының асыға күтетін сәтінің бірі - қасиетті Рамазан айы. Биыл ораза көктемнің алғашқы күні - наурыз айының 1-іне тұспа-тұс түсті. Алғыс айту күніне де сәйкес келгендіктен жұртшылық бір-бірін қос мерекемен қатар құттықтап, осы мезгілге төрт көзін түгел қылып жеткізген Жаратқанға да іштей ризашылық сезімдерін білдіріп жатты.
Ораза басталмас бұрын жұртшылық ақпанның 28-і күні кешке Құлсары қаласы мен ауылдық округтердегі мешіттерге жиналды. Онда құптаннан кейін алғашқы тарауық намазы оқылды. Бұрын жамағатқа тарауық оқыту үшін Жылыой мұсылмандары орталық мешітіне Түркия елінен немесе Алматы қаласынан Құранды жатқа оқитын арнайы қари келетін еді. Енді былтырдан бастап жылыойлық жамағат сырттан діни маман іздемейтін болды. Өйткені өзімізден шыққан Ғалымжан Жұмажанұлы атты қасиетті кітапты жатқа оқитын қариымыз бар. Ол Тұрғызба топырағынан түлеп ұшқан жас қари.
2012 жылы Астана медресесінде оқыды. Кейін Ливандағы әл-Джинан университетінде білім алып, Хусамуддин Әс-сығанақи институтында Құран Иджаза бөлімінде Құран иджазасын алды. Яғни, қари ретінде ұстаздық қызмет етуге толықтай құқыққа ие болды. - Құранды жатқа оқитын өзіміздің осындай Ғалымжандай қариымыз болған соң, біз былтырдан бастап түркиялық бауырларымыздың ұсынысын қабылдай алмадық,-деді аудандық мешіттің бас имамы Жасұлан Қағазғалиев.
Ғалымжан Жұмажанов 1995 жылдың қаңтарында Жем ауылдық округінің Тұрғызба ауылында дүниеге келіп, ондағы орта мектепті бітірген. Діни білім алып, қазіргі таңда сол ауылдық мешіттің діни сауат ашу орталығында ұстаздық қызмет атқарады. Өткен жұма күнгі құптаннан кейін жылыойлық мұсылмандар жас қари Ғалымжан Жұмажанұлының имамдығымен намазға ұйып, алғашқы тарауық оқып, қасиетті Рамазан айының құлшылығын бастап кетті.
Е.ҚОШАҚАНОВ
