Атырау облысында 9 жасар бала 4-қабаттан құлап кетті. Қазір жасөспірім облыстық балалар ауруханасында жатыр.
Оқиға кеше, 2 қыркүйекте Жылыой ауданының орталығы – Құлсары қаласында болған.
«Құлсары қаласындағы аудандық орталық ауруханаға көпқабатты үйдің 4-қабатынан 9 жасар бала жеткізілді. Жасөспірім аурухананың жансақтау бөліміне сүйек сынықтарымен түсті. Оның жағдайы ауыр, травматологиялық күйзеліс алған. Біздің аурухананың дәрігерлері медициналық ем-дом көмегін жасады», - деп мәлім етті аурухананың директоры Нұрбек Үкібаев.
Кейін жасөспірім облыстық балалар ауруханасына жеткізілді.
Облыстық төтенше жағдайлар департаменті қоғаммен байланыс тобының мәліметінше, терезеден құлаудың басты себебі – тұтқасы оңай ашылатын, әрі қорғалмаған терезе.
«Терезедегі масадан қорғаайтын торға балалар сүйенуге болады деп ойлайды. Алайда, ол баланың салмағына шыдамайды. Оқиғалар хроникасына көбінесе 5 жасқа дейінгі балалар түседі. Бұл осындай оқыс оқиғаның 80%-ын құрайды. Сол себептен, бірнеше қарапайым ережені есте ұстау қажет. Біріншіден, терезе 12,5 см-ден астамға ашылса, балалардың терезеден құлап кетуі мүмкіндігі артады. Екіншіден, барлық терезеге 12,5 см-ден астам ашуға мүмкіндік бермейтін тақтай немесе қоршау орнату қажет. Үшіншіден, механизмдердің жабық терезе режимінде ғана емес, желдету режимінде де жұмыс істеуі қадағалануы тиіс. Төртіншіден, балаларды терезенің қасында ойнатпаған жөн. Өтіп бара жатқан көлікті, өзге нәрселерді көрсету үшін оларды терезенің алдына отырғызбау керек. Бесіншіден, терезенің жанына жиһаз қоймау және москит торына сенбеу қажет», -деп мәлім етті қоғаммен байланыс тобынан.
Inform.kz
