Таяуда мұнай-газ саласы қызметкерлерінің біліктілігін шыңдауға және кәсіби шеберлігін арттыруға бағытталған «Ембімұнайгаз» АҚ-ның «Үздік маман-2025» дәстүрлі кәсіби байқауы өз мәресіне жетті.
Биылғы байқаудың екінші кезеңі «Жайықмұнайгаз» мұнай-газ өндіру басқармасының оқу-жаттығу полигонында өткізілді. Мұнда 81 қатысушы 15 мамандық бойынша бақ сынап, өздерінің теориялық білімі мен тәжірибелік шеберлігін іс жүзінде көрсетті.
Айта кетерлігі, байқау биыл Мемлекет басшысы Қ.Тоқаевтың жариялаған «Жұмысшы мамандықтарының жылы» аясында өткізілді. Бұл – еліміздің экономикасында маңызды рөл атқаратын өндіріс мамандарының еңбегіне көрсетілген құрметтің жарқын үлгісі болды.
Конкурстың алғашқы кезеңі кәсіпорынның өндірістік-құрылымдық бөлімшелері деңгейінде өтіп, үздік шыққандар екінші кезеңге жолдама алған болатын.
Байқаудың басында «Ембімұнайгаз» АҚ Бас директоры Ринат Ізмұханбет байқаудың маңыздылығын атап өтті:
- Ембілік мұнайшылардың толағай табыстарға қол жеткізуі – жұмысшы-қызметкерлеріміздің біліктілігі мен кәсібилігіне тікелей байланысты. «Үздік маман» байқауын ұдайы ұйымдастыра отырып, шеберлікті одан әрi шыңдау үшін үздік мамандарды iздейміз. Әрбір қатысушы конкурстық іріктеу барысында өзін жан-жақты қырынан көрсетіп, сол арқылы өз саласында ең жоғары деңгейге жетеді. Соның нәтижесінде еңбек өнімділігі, қауіпсіздік деңгейі және өндіріс тиімділігі артады. Бұл – біздің басты мақсатымыз,– деді ол.
Байқауға біздің ауданнан «Жылыоймұнайгаз», сондай-ақ көршілес «Жайықмұнайгаз», «Доссормұнайгаз», «Қайнармұнайгаз» мұнай-газ өндіру басқармаларының үздік мамандары қатысты. Сайыс соңында озық шыққан қызметкерлер марапатталып, жүлдегерлерге дипломдар мен қаржылай сыйақы және имидждік сыйлықтар табыс етілді. Сонымен қатар, жеңімпаздарға бір жыл бойы жалақыларына пайыздық үстемақы қосылатын болды.
Сонымен байқаудың басты жеңімпазы кімдер дейсіз ғой? Өзге әріптестеріне қарағанда өзіміздің «Жылыоймұнайгаз» мұнай-газ өндіру басқармасының жұмысшы-қызметкерлері байқаудан бағы жанып, жоғары нәтижелер көрсетіп, жүлделі орындарды қанжығаға байлап қайтты.
Атап айтсақ, ұңғымаларды зерттеу жөніндегі оператор Жасұлан Каким, цементтеу агрегатының машинисі (моторшы) Асқар Беркалиев, Құлсары АЭТ электр жабдықтарын жөндеу және қызмет көрсету электромонтерлері Әлішер Далапқалиев пен Абай Иманғалиевтер ІІІ орындарды иеленді. Мұнай және газ өндіру операторы Аманкелді Ерсайынов, темір жонушы Марат Қордашев, химиялық талдау жасау лаборанты Нұрбике Есімова, компрессорлық қондырғылар машинисі Дулат Нұртазин, тауар операторы Азамат Нұрбауовтар ІІ орынды жеңіп алды. Ал технологиялық қондырғылар операторы Азамат Бисенов, жер қабаты қысымын сақтау операторы Руслан Абдрахманов, технологиялық сораптардың машинисі Асқар Қарымсақов, көлік жүргізуші Әлібек Жармағанбетов, электргазбен дәнекерлеуші Амандық Дүйсенғалиевтер І орынмен қанжығасын майлап қайтты. Ынталандыру жүлдесімен марапатталғандар қатарында басқарманың ұңғымаларды жерасты жөндеу операторы Тимур Ташенов, Абат Төлеубаев, Ерлан Тайшиев, слесарь-жөндеуші Айбек Ерғалиев те бар.
Жалпы қорытынды ұпайлар бойынша «Жылыоймұнайгаз» мұнай-газ өндіру басқармасының еңбеккерлер командасы жүлделі І орынды иеленіп, өзге әріптестерінен озық шығып, кәсіби шеберлік пен ұжымдық үйлесімділіктің үлгісін көрсетті.
Әрине, бұл жетістік – тек байқаудағы жеңіс емес, ауданымыздың мұнай-газ саласында еселі еңбек етіп келе жатқан мұнайшы мамандарының терең біліктілігі мен мол тәжірибесінің айқын дәлелі болды. «Үздік маман – 2025» кәсіби шеберлік байқауы – жұмысшылардың өз ісіне деген жауапкершілігін арттырып қана қоймай, еңбек адамының қоғамдағы орнын айқындайтын маңызды алаңға айналды. Байқау барысында көзге түскен жас мамандар мен тәжірибелі шеберлер – отандық өндірістің берік тірегі екенін тағы бір көрсетті.
«Жылыоймұнайгаз» мұнай-газ өндіру басқармасының мұнайшылары байқаудағы жоғары жетістігімен аудан абыройын асқақтатып қана қойған жоқ, жоғары кәсіби шеберлік пен ерен еңбектің озық үлгісін көрсетті. Мұндай шаралар жас мамандарды қолдауға, кәсіби өсуге жол ашып, мұнай-газ саласының сара жолмен дами түсуіне серпін берері сөзсіз.
А.МОЛДАШЕВ
