Аудандық орталық кітапханада анықтамалық-ақпараттық библиографиялық бөлімнің ұйымдастыруымен «Журналист - қоғамның айнасы» атты мамандар күні өткізілді. Жас ұрпаққа мамандық таңдауда бағыт-бағдар беріп, өзіне ұнаған салаға қызықтыруды мақсат тұтқан шарада аудан тілшілері мектеп оқушыларымен кездесіп, ұйымдастырушылар кітапхана қорындағы ескі және жаңа әдебиеттерді оқырмандарға насихаттады.
Аталмыш шараны ақпараттық-библиографиялық қамтамасыз ету бөлімінің меңгерушісі Жанат Алашбайқызы жүргізіп, аудандық «Кең Жылой» газетінің тілшілері Перизат Қизатова, Ерназ Ахметкәрімов, Диана Ізбасаровалар келіп, жастармен журналистика саласы жайлы өз ой-пікірімен бөлісті. Олар журналистика мамандығын қалай таңдағанын, қызығы мен шыжығы мол саланың қоғамдағы орнына тоқталып, оқушылардың қызығушылығын оята білді.
-Таңдайынан татымды сөз шыққан Жылыой жерінен талай жасампаз журналистер шыққан. Біз солардың ізін жалғап, ізеттілігін бойымызға дарытып, осынау маңызды мамандыққа қадам басып келеміз. Журналистің қоғамдағы орны ерекше. «Қараңғы қазақ көгіне, өрмелеп шығып күн болған» Ахмет, Жүсіпбек, Міржақыптай қараңғы қоғамға көмескі үміт ұялатып, сәулелі шұғыладай қылаң беріп, қаламымыздан қарымды мақалалар жазу үшін барымызды салып келеміз. Және осы жолда аянып қалмай, аға буынның салып берген сара соқпағымен лайықты жүріп өтеміз деп ойлаймын,-деді сұхбат барысында газет тілшісі Ерназ Алтайұлы.
Тіршілігі мен тілшілігін қатар алып жүрген журналистер әдетте өзгелерге сұрақ қойса, бұл жолы журналистерге жиналғандар сауал жаудырды. «Журналистердің жалақысы қандай?», «Білікті журналист болу үшін неден бастау керек?», «Мақала қалай жазылады?», «Журналистика саласында цензураның бары рас па?» деген сынды сұрақтар легі бірінен соң бірі қойылып, жалындап тұрған жастар қауымы тілшілерден тұшымды жауап та алып жатты. Шараға Д.Жазықбаев атындағы №16 орта мектеп, сондай-ақ №1, №21 жалпы орта білім беретін мектептің 10-11 сынып оқушылары қатысып, ұстаздарымен бірге тағылымды кештегі әсерлі әңгімені ден қойып тыңдады.
Жиын одан әрі анықтамалық ақпараттық қамтамасыз ету бөлімінің редакторы Гүлжазира Дәукенованың «Журналист - қоғамның күзетшісі» атты кітап көрмесімен жалғасып, тілшілердің міндетті түрде оқуы керек шығармаларға талдау жасалды. Кеш соңында аудандық орталық кітапхана директоры Балзия Кенжебекова кітапхана оқырмандары атынан Батыс Қазақстан аймақтық «Ақұштап оқулары» байқауына қатысып, бас жүлде алған «Кең Жылой» газетінің тілшісі Ерназ Ахметкәрімовті марапаттап, диплом табыстады. Сондай-ақ қазақтың көрнекті ақыны, ҚР халық жазушысы Фариза Оңғарсынованың туғанына 85 жыл толуына орай «Патша сөздің Фаризасы» тақырыбындағы аймақтық эссе байқауына белсене қатысқаны үшін №1 жалпы орта білім беретін мектептің 11-сынып оқушысы Меруерт Ізберген Алғыс хатқа ие болды.
Д. ДЕРБІС
