Жастарды патриотизмге тәрбиелеп, еліміздің тұтастығы мен бірлігін нығайту мақсатында Кеңес Одағының батыры Әлия Молдағұлованың туғанына - 100 жыл толуына орай «Атамекен» атты патриоттық әндер байқауы өтті. Аудандық мәдениет, тілдерді дамыту, дене шынықтыру және спорт бөлімінің ұйымдастыруымен тұсауы кесілген шығармашылық сайыс тасада жүрген жас әншілердің жарыққа шығуына септігін тигізді.
Әрине, ән додасына жастар арасынан қатысуға ниет білдіргендер көп болды. Алайда көптің ішінен «жүзден жүйрігі» ғана іріктеліп алынып, таланттылар ғана сахна төріне шыға алды. Екі кезеңде бақ сынасқан қатысушылар алғашқыда Қазақстан, Отан, туған ел, туған жер тақырыбындағы әндерді арқау етсе, екінші кезеңде еркін тақырыпта өздері таңдаған әндерді шырқады.
Байқау барысын бақылап, баға беруге Атырау қаласынан арнайы келген қазылар алқасы Жылыойдан қанат қағар таланттардың аз еместігін көріп, бір қуанып қалды. «Құлақтан кіріп, бойды алған» патриоттық әндер бірінен соң бірі асқақ әуенмен шырқалып, көрерменнің рухын бір көтеріп тастады.
Байқаудың қорытындысымен Айтқали Жайымовтың «Жылойға сәлем», Б.Есебаевтың «Дариға жүрек» әндерін тамылжыта шырқаған Бейбіт Балғымбаев ІІІ орынды жеңіп алса, Арман Дүйсеновтің «Туған жер», Н.Әмірдің «Жұлдызым» әндерін орындаған мәдениет үйінің қызметкері Аймира Орынбасарова ІІ орынды иеленді.
Жүлделі Ⅰ орынды Қуаныш Бекеновтің «Кең Жылойым», П.Лидың «Саған ғашық» әндерін тамылжытқан әуесқой әнші Рүстем Бақтияров жеңіп алды. Ал Д.Шеңгелбайдың «Туған жері» мен халық әні «Арман—айды» нақышына келтіре шырқаған Құлсары балалар өнер мектебінің вокал пәнінің мұғалімі Перизат Көшербай қазылар алқасының шешімімен Бас жүлдеге лайықты деп танылды. Өзге үміткерлер де алғыс хаттар мен қаржылай сыйлықпен марапатталды. Ән додасынан «мыңнан тұлпар» шығып, бұлбұл дауысымен көптің есінде қалған Перизат Көшербай байқау жөнінде:
– Қатысушылардың барлығы да осал емес. Бұл байқауға барымды салып дайындалдым. Бүгін, міне, сол еңбегім ақталды. Мен өзім әннен сабақ беріп, шәкірт тәрбиелеймін. Сол үшін мұндай байқаулар біз үшін жетістік болып саналады. Осы сынды ән сайыстары көптеп өткізілсе, келесіде оқушыларымды да қатыстырғым келеді,-дейді.
Д.ЕЛЕУСІН
