Абай Құнанбайұлы – ұлттық ой мен сөз өнерінің мәңгілік шамшырағы.
Оның шығармалары ұлттың рухани болмысы мен мәдениетін, табиғат пен адамзаттың үндестігін айшықтайтын асыл қазына. Осы мол мұрадан шабыт алған кәсіби суретшілер аудандық музейде өткен «Табиғат - таң қаламын тамашаңа» атты сурет көрме-байқауда бас қосты.
Аудандық музейде өткен бұл шара ақынның 180 жылдығы қарсаңында ұйымдастырылды. Абайдың шығармаларын насихаттап, сурет өнері арқылы оған үн қосу, ұлы ақынның мол мұрасын сурет тілімен жаңа қырынан танытуды мақсат тұтқан көрме-байқауда қылқалам шеберлері ақынның терең ойы мен көркем бейнелерін өрнектеп, Абай шығармаларын өз туындыларында жаңғыртып, поэзия мен бейнелеу өнерін үйлестіре ұсынды.
Бұл көрме-байқауға кәсіби суретшілердің көздің жауын алатын жиырмаға жуық туындысы ұсынылған. Көрмені аудандық музей басшысының міндетін атқарушы Жазира Бердіқұлқызы ашып, қатысушы көрермен мен суретшілерге ерекше алғысын білдірді. Ол өз сөзінде барша қатысушыларға сәттілік тілеп, көрменің Абай шығармашылығын сурет тілімен дәріптеудегі маңызын және оның рухани мәнін айрықша атап өтті.
Көрмеге келген әрбір жан қылқалам шеберлерінің ғажайып туындыларына тамсанып, шығармашылық әлеміне терең бойлады. Ал сурет авторлары мен музей қызметкерлері әр суреттің тарихын баяндап, өнердің мәні мен сұлулығын көрермен жүрегіне жақындата түсті. Айта кету керек, Абайдың көптеген шығармалары табиғаттың ғажайып сұлулығына арналған. Мысалы, ақынның төрт мезгілге арнап жазған өлеңдері әр маусымның өзіндік ерекшелігін ашып қана қоймай, сол кезеңдегі қазақ халқының тұрмыс-тіршілігін бейнелей отырып, табиғат пен ұлт болмысын шебер ұштастырады. Бұл туындыларда қазақ халқының ұлттық рухани бейнесі аса ерекше мазмұнмен, терең тебіреніспен суреттеледі. Міне, көрме кезінде көрерменнің жүрегін жаулаған кескіндемелер де осы мазмұнға негізделген еді. Мысалы, «Желсіз түнде жарық ай», «Қыс», «Жазғытұры», «Күз» өлеңдеріне арналған туындылар да бой көрсетті. Қалың көрермен суретшілердің еңбегімен танысып болғасын, №6 жалпы орта білім беретін мектептің оқушысы Мехмет Клыч Шамильұлы ақынның «Ғылым таппай мақтанба» өлеңін, ал белсенді ұзақ өмір сүру орталығының зейнеткері Малика Қоңырбайқызы «Сегіз аяқ» және «Жасымда ғылым бар деп ескермедім» шығармаларын оқып, Абай шығармашылығына суреттерден бөлек, поэзия арқылы да жан бітірді. Бұл сәт көрмені одан әрі әсерлі етіп, көрерменге ерекше рухани күй сыйлады.
Көрме соңында әділқазылар құрамында болған өлкетанушы Нұрдәулет Ақназаров, облыстық қолөнер байқауының лауреаты Қуаныш Шалабаев және қолөнер шебері Нұргүл Елтезерова қылқалам шеберлерінің еңбегін жоғары бағалап, әр туындыға ерекше ықыласпен қарап, жылы пікірлерін білдірді. Байқау нәтижесінде І орын Бауыржан Қожасейловқа бұйырса, ІІ орынға Қоскұлақ Қыдыров пен Ләззат Мамырова ие болды. Ал ІІІ орын Жадыра Ізімова, Нұрила Мақсотова және Бағытжан Дәумегеновқа берілді. Сондай-ақ, Аманжан Қожасейлов пен Нұрлан Сағынғалиев сертификатпен марапатталды. Ал жүлделі орын алған туындылар «Жылыойлық суретшілердің қолымен» атты аудандық музей бұрышына қойылатын экспонат ретінде қорға қабылданды.
Бұл көрме-байқау қылқалам шеберлерінің өнерін дәріптеп қана қоймай, олардың шығармашылық әлеуетін арттыра түссе керек. Әрбір қатысушы көрерменге ой сала отырып, Абай шығармаларын қылқалам арқылы айшықтай білді. Иә, мұндай шаралар өнерге деген қызығушылықты оятып қана қоймай, жас таланттардың шабытын ұштап, дамуына жол ашары сөзсіз.
Әйгерім Ғалымжан
