Ия, бұл – ауданның мұнайшы ардагері Мұстахима Исаинова. Оны ауданда білмейтін адам кемде кем шығар. Әсіресе, зейнеткерлікке шыққалы қоғамдық жұмыстарға белсене араласатын апайды көпке үлгі етуге болады. Өзі «Жылыой мұнай-газ» мұнай-газ өндіру басқармасының Мұнайшылар ардагерлер ұйымының төрайымы, Жылыой ардагерлер кеңесінің алқа мүшесі, аудандық Аналар кеңесі мен «Әжелер» ансамблінің мүшесі. Қай жерде ұлттық тәрбие, отбасылық құндылық туралы шара өтсе, соның басы-қасында жүреді. Және ол – өте өнерлі. Қазақтың халық әндерін керемет орындайтынын да ерекше атап өткіміз келеді.
Осындай белсенді ардагеріміздің бірі де бірегейі – Мұстахима Малашқызы. Жақында ғана Атырау қаласында өткен «Қос жұлдыз» атты облыстық ән байқауында жүлделі 2-орынды қанжығасына байлады. Облыс бойынша 18 ардагер әнші қатысқан жобада жеңімпаз атану да оңай емес екені белгілі. Өйткені, қатысушылардың басым бөлігі өнер саласында жүрген, тіпті әншілікпен кәсіби түрде айналысатын жандар болып шықты.
Бұл «Қос жұлдыз» байқауы «Ұмытылмас есімдер» атты жоба аясында ұйымдастырылған. Жобаның мақсаты ұлттық өнерді, халықтық салт-дәстүрді кейінгі ұрпаққа насихаттау еді. Бұған дейін осы жоба аясында «Күй дария», «Өсиет», «Шежіре» атты байқаулар өткен болатын. Енді, міне, «Қос Жұлдыз» байқауында жерлесіміз жеңіс тұғырынан көрінді. Онда қатысушылар Шәмші Қалдаяқов пен Ілия Жақановтың әндерін орындауы тиіс. Бір қызығы, бұл байқауға Ілия Жақановтың өзі де көрермен болып қатысып, оның «Нені ойладың, құрбыжан?» әнін шырқаған Мұстахима Малашқызына «керемет орындадың» деп таңғалып, жоғары бағасын берген.
-Жүлдені табыстайтын кезде «Жылыой ауданының мұнайшы-ардагері» деп хабарлады ғой, сол сәтте қуанғанымнан төбем көкке бір елі жетпей қалғандай болды. Жалпы басында бұл байқауға ауданнан қатысатын адам табылмады. Мен намысқа тырысып, шоқпартоғайлық Жеңіс Махамбетовке хабарластым. Оның Шәмшінің әндерін шырқайтынын білетін едім. бірге қатысып қайтайық, деп ұсыныс тастадым. Сонымен екеуміз атсалыстық. Жеңіс алғыс хатпен марапатталды. Мен 2-орынды иелендім. Аяқ астынан аттанғасын дайындығымыз да жеткіліксіз еді. Дегенмен, барымды салып орындап бергенмін. Әділқазылар мен көрермендерге ұнады,-дейді Мұстахима Исаинова.
Мұстахима апайды баянмен Ерқанат Жұмағалиев сүйемелдеп шығыпты.
Перизат ТҮРКЕНБАЙҚЫЗЫ
