ӨНЕРЛІ ӨРГЕ ЖҮЗЕР. ЖЫЛЫОЙДА «ӘНІМ СЕНСІҢ, ТУҒАН ЖЕР!» АТТЫ ЖАС ӨНЕРПАЗДАРДЫҢ БАЙҚАУЫ ӨТТІ. ТӘУЕЛСІЗДІКТІҢ 30 ЖЫЛДЫҒЫ ҚАРСАҢЫНДА ӨТКІЗІЛІП ЖАТҚАН ДОДА БАЛАЛАР МЕН ЖАСӨСПІРІМДЕР АРАСЫНДА ЕЛГЕ, ЖЕРГЕ, ОТАНҒА ДЕГЕН ПАТРИОТТЫҚ СЕЗІМДЕРДІ ОЯТЫП, ЖІГЕРЛЕНДІРУ МАҚСАТЫНДА ҰЙЫМДАСТЫРЫЛҒАН. ОНДА 8-16 ЖАС АРАЛЫҒЫНДАҒЫ ЖАС ӨРЕНДЕР БАҚ СЫНАДЫ.
Аталмыш байқауға ауданымыздан 10 өнерпаз қатысып, 2 кезең бойынша сынға түсті. Бірінші кезеңде патриоттық әндер шырқалса, екінші кезеңде байқауға қатысушылар еркін тақырыпта әндер шырқады. Үздік орындаушыны анықтауда жас өнерпаздардың туындыны жеткізуі, сахна тілі мен мәдениетін қаншалықты меңгергендігіне, әнді сүйемелдеуіне, талантына ерекше мән берілді. Жүзден жүйрік шыққандар биік дауысы мен әсем әуені арқылы көзге түсіп, жүлделі орындармен марапатталды. Қазылар арқасының әділ шешімі бойынша 1-орынды Сәндібекқызы Мейірім, 2-орынды Берікұлы Бақытбек және 3-орынды Сүйінғалиева Көрікті иеленді. Сонымен қатар, «Патриоттық әндерді үздік орындағаны үшін» номинациясымен Аққуат Айымгүл, «Әсем дауыс» номинациясымен Тарих Парасат, «Үздік шығармашылық» номинациясымен Досмағанбет Ақжан, «Жарқын бейне» номинациясымен Асхат Гүлзат марапатталды. Таланттылар бәйгесіне қатысып белсенділік танытқаны үшін Амандық Айсезім мен Әлібек Рысбекке Алғысхаттар табыс етілді. Сайысқа дайындағаны үшін Құлсары Балалар саз мектебінің эстрада вокалы пәнінің мұғалімі Есенбаева Әсемгүл, «Үміт» оқу орталығының вокал пәні тәлімгерлері Қуантқанов Дәулеткерей, Құсман Нұрлыбек, Молдашева Жұмагүл Алғысхатқа ие болды. Сондай-ақ барлық өнерпаздарға естелік сыйлықтар мен гүл шоқтары ұсынылды. Шара соңында фотосессия өткізіліп, кофебрейкпен аяқталды.
Аталмыш байқау аудан әкімдігі жанындағы Аналар кеңесінің ұйымдастыруымен және аудандық ішкі саясат бөлімінің мемлекеттік әлеуметтік тапсырысы шеңберінде өткізілді.
А.ЖҰМАБЕРГЕНҚЫЗЫ
