«Кең Жылыой» мәдениет үйінде Қазақ КСР мәдениет қайраткері, Қазақ КСР халық ағарту ісінің озық қызметкері, еңбек ардагері, ақын, сазгер, термеші, жырау Манап Ғалимұлының 85 жылдығына орай «Манап – мәдениет мұрасы» атты аудандық ән-күй фестивалі өтті.
Фестивальде алдымен көпшілікке ақынның өмір жолы туралы дайындалған бейнеролик ұсынылды. Содан соң Атырау қаласынан арнайы келген қонақтар - ҚР Мәдениет саласының үздігі, ақын Саадат Нұрманов, әнші, термеші Қайрош Қайболдаев, Төлеген Момбеков Манап атамызға арналған арнауларын орындап, халықтың ыстық қошеметіне бөленді.
Шараға сазгердің ұлы Нұрсипат Манапұлы, мәдениет қайраткерлері, шәкірттері қатысты. Салтанатты шарада тұлғаның көзін көрген зиялы қауым өкілдері сөз алып, естеліктерімен бөлісті. Сондай-ақ, бас кейіпкер туралы тың ақпарат берді. Одан әрі жергілікті өнерпаздар «Әке аманаты», «Жауынгер», «Көроғлы», «Ата-ана қадірі», «Ақсақ құлан», «Желкілдек», «Мұнайшы Ақжелең», «Сәттіғұлдың сөз басы», «Терісқақпай», «Наурызбек жыраудың термесі» және «Талкеме» туындыларын орындап, көрерменнің алғысына бөленді.
Жиында ақынның ұлы Нұрсипат Манапұлы сахна төріне шақырылып, сөз берілді. Оның айтуынша, әкесінің дүниеден өткеніне биыл 30 жыл болған. Саналы ғұмырын Кең Жылыойда өткізіп, ұзақ жылдар бойы ұстаз шәкірттер тәрбиеледі. Сондай-ақ, аудан мәдениетін өркендетуге зор үлесін қосты. Әке өнерін жас ұрпаққа кеңінен насихаттау мақсатында ұлы бес жыл сайын осындай ауқымды шараларды өткізіп келемін дейді. Ол кешті ұйымдастырушылар мен мәдениет саласының қызметкерлеріне өзінің алғысын айтты.
Шара соңында Нұрсипат Манапұлына және өнер көрсеткен өнерпаздарға арнайы алғыс хаттар табысталды. Аяулы да ардақты азамат, үлкен жүректі ағамыз ортамызда болмаса да, оның адамгершілік бейнесі, өнегелі ісі, Жылыой өңірінің дамуына қосқан үлесі халықтың есінде мәңгі сақтала бермек.
А.МЕЙРАМБАЙҚЫЗЫ
