Қазақ әдебиетінің тарихында көрнекті жазушы Ілияс Есенберлиннің алар орны ерекше. Бала кезден шығармаларымен сусындап өскен классиктің туғанына 110 жыл толып отыр. Осыған орай аудандық кітапхана қабырғасында «Қазақ тарихының жаршысы» атты оқырмандар конференциясы ұйымдастырылды. Шара барысында Есенберлиннің романдарымен қатар өлеңдері де оқылып, қалың көрерменге ой саларлық рухани басқосу өтті. Ілияс Есенберлиннің төлқұжаты «Көшпенділер» трилогиясы десек те болады. Ол трилогияны білмейтін қазақ жоқ та шығар. Қазақ хандығынан бастапқы алтын тарихымызды кеңестік дәуірдің цензурасына қарамастан кітап бетіне түсірген батыл жазушы. Оқушылар да осы трилогияға кеңірек тоқталып, оқырмандар шығарма туралы ойларын ортаға салды.
Атап айтар болсақ, №8 сынып оқушылары Іңкәр Серік, Гауһар Сокол, Гүлнұр Мәжитқызы, Нұрия Нұрдәулет, Ақжарқын Жұмахандар І.Есенберлиннің өмірбаянын айтса, №1 мектептің оқушылары Бибіхан Қадауат, Ханшайым Төреғали, Нұрдәулет Ермекқали, Мұхаммед Челебай, Назира Сағындықтар жазушының шығармашылығымен таныстырды. Кітапханашы Балбала Ілес «Ұлт мақтанышы» тақырыбындағы көрмеге шолу жасап, Ілияс Есенберлиннің еңбектеріне кеңінен тоқталып өтті. Конференцияны жүргізген оқырмандарға қызмет көрсету бөлімінің меңгерушісі Айгүл Жұмырбаева:
- Ілиясты білу, шығармаларын оқу әр қазаққа парыз іспеттес. Себебі, өшпес мұра қалдырған дарынды жазушының алар орны ерекше. Бүгінгі конференцияда оқушылар озықтығын көрсетіп, Ілиястың тек жазушылық емес, ақындық қырын да жақсы білетіндігін көрсетті. Мұндай шаралар оқырмандар арасында орта қалыптастырып, рухани баюға өз септігін тигізері хақ,-деді өз сөзінде. Аудандық кітапхана директоры Сандуғаш Қалиева шара соңында белсенділік танытқан оқушыларға арнайы сыйлық табыс етіп, барша оқырманға өз алғысын жеткізді. Тарихын қадірлей алған елдің болашағы да жарқын болмақ. Сондықтан, өткеннен сабақ алып, алғы күнге арманмен қадам басу керек-ақ.
Е.АЛТАЙҰЛЫ
