Жылыой жұртшылығы лирикаға толы поэзия кешіне куә болды. Жергілікті жас ақындар жүректі тебірентер жауқазын жырларымен тыңдарманының көңілін көтеріп, қара өлеңнің қаймағын қалқып алды. Ынтық ой мен ыстық сезімге толған әсерлі басқосуға ақындардан бөлек қала тұрғындары да келді. Жүрекке тыныштық, жанға рахат сыйлаған, күйбең тіршілікті бір сәт ұмыттыратын рухани кеш көпшілікті тәнті етті.
Әдетте кітапханада, қоғамдық және мәдени орында ұйымдастырылатын поэзия кеші бұл жолы қаламыздың орталығында орналасқан жастар көп баратын «RaiCoffee» кофеханасында өтті. Кешті ұйымдастырушы Жастар ресурстық орталығының басшысы Әлібек Амандықов ашып, келген қонақтарға алғысын айтты.
Еркін түрде жоспарланған кештің ерекшелігі келген қонақтардың да өз қалауымен поэзия оқи алатындығында еді. Қара өлеңге ынтасы бар оқушылар мен ауданның жас ақындары да бұл кеште белсенділік танытты. Олар өздерінің махаббат, туған жер тақырыбында жазған өлеңдерін жарыса оқып, кездейсоқ келген қонақтардың назарын аударды. Сонымен қатар, елімізге танымал ақындардың да бірнеше жырын тебіреніспен оқыды. Кафе қонақтары да бір сәт жырдан сусындап, ақындар есімін жадында түйді.
Иә, поэзия – өнердің биік шыңы. Оны ұғынып, тереңіне үңілетіндер аз. Кештің мақсаты – аудан жастарын поэзияға тарту, өлеңнің де өнер екенін, мәнерлеп оқудың да талант екенін ұғындыру. Міне, осы орайда, олардың көп баратын орындарында осындай әдемі әдеби кеш өткізу көп нәрсеге қол жеткізері белгілі. Кеште жас ақындар – Әлібек Амандық, Ерназ Ахметкәрімов, Дәулет Мадиевтер сиясы кеппеген жаңа жырларын оқып, келген жастардың өлең сөзге деген қызығушылығын оятуға барын салды. Баяу әуен ырғағында оқылған өлеңдердің бәрі дерлік жүректен шығып, жүректерге жетіп жатты. «Өлеңге әркімнің-ақ бар таласы» дегендей, әсіресе кештің ең кішкентай қатысушысы – Дана Русланқызы өзі сүйіп оқитын ақынның жырларын жатқа оқып, зор ықыласқа бөленді.
Кеш соңында өлең оқыған ақындарға да, қонақтарға да Жастар ресурстық орталығының атынан естелік сыйлықтар табысталды.
Д.Ізбасарқызы
