«Самұрық-Қазына» АҚ биыл қордың 15 жылдығына орай ең алғаш рет компаниялар тобының қызметкерлері арасында «Таланттар байқауын» ұйымдастырған болатын. «Айтыс», «Вокал», Бейнелеу өнері» жанрлары бойынша мықтыларды іріктеген бұл байқаудың басты мақсаты: еңбек ұжымдарындағы өзара қарым-қатынасты нығайту және еңбеккерлердің шығармашылық бастамалары мен қабілетіне қолдау білдіру.
Жақында қазылар алқасының саралауымен өнер додасы өз мәресіне жетіп, ұлттық мерекеміз – Республика күні қарсаңында жеңімпаздар анықталды. Осыған орай, қазанның 23-і күні Астана қаласында өткізілген марапаттау рәсімінде жерлесіміз, айтыскер ақын Ғалымбек Мұстафаның да есімі құрметпен аталды. Ол 17 мекемеден іріктеліп, 37 адам қатысқан байқауға «Қазмұнайгаз» ҰК» АҚ-ның атынан түскен еді. Нәтижесінде «Айтыс» жанры бойынша жүлделі бірінші орынды иеленіп, жеңімпаз деп танылды.
Жүлдегер І дәрежелі дипломмен және 500 мың теңге арнайы сертификатпен марапатталды.
Ербол ҚОШАҚАНОВ
