Театр – жүректің айнасы, уақыттың үні. Сахнаға шыққан әрбір кейіпкер –өмірдің өзінен сомдалған тағдыр, ал әрбір қойылым – жан дүниенің тереңінде өрбіген сырлы әңгіме. Жайықтың жағасынан бастау алған театр көші ауданымызға табан тіреп, жылыойлық көрермендердің ыстық ықыласына бөленіп қайтты. Атырау жастар театры күрделі жөндеуден өткен аудандық мәдениет үйіндегі жаңа сахнаның шымылдығын Илья Жақановтың «Еділ мен Жайық» мюзиклімен ашты.
Атырау жастар театрының Жылыой жеріне алғаш келуі емес. Осыған дейін де санамызды сан саққа жіберіп, жүрегімізді тебіренткен қойылымдарымен бірнеше рет ауданымызға аяқ басқан. Бұл жолы Илья Жақановтың өмірі мен шығармашылығына арналған «Еділ мен Жайық» мюзиклі де қалың көрерменді терең ойға жіберіп, қағытпа қалжың мен әсем әнімен тербеді. Ішінде драмасы да, комедиясы да, трагедиясы да аса көрнекілікпен қамтылған қойылым бір кезде жылыойлықтардың жанарынан жас үйірсе, бір сәт қыран-топан күлкіге қарық қылды. Театр жанкүйерлерінің бірі Махамбет Асанов:
- Бүгінгі қойылым, шыны керек, жоғары деңгейде болды. Ерекше әсер сыйлады десек те артық айтқандық болмас. Өзім осыған дейін де қойылымдарға барғанды аса қатты ұнатамын. Мүмкіндік туған жағдайда театрды жібермеуге тырысамын. Ал, Атырау жастар театрына келер күнге шалқар шабыт тілеймін,-деді өз сөзінде.
«Еділ мен Жайық» мюзиклі сонау Илья Жақановтың туған кезінен бастап, қарттық кезін де бейнелейді. Талғамы жоғары көрерменге әсіресе Илья Жақановтың махаббат хикаясы ерекше әсер еткендей. Сол бір жастық шақтың жалынын бейнелеген сахналық қойылымға көрерменнің қошеметі ерекше болды. Қойылым соңында өзінің рахметін айтып, аудан әкімі Жұмабек Байрақбайұлының арнайы Алғыс хатын табыстаған аудан әкімінің орынбасары Гүлнафис Айшуақова жас әртістерге ақ жол тілеп, ризашылығын жеткізді. Тамыз айында бастау алған бұл қойылым алдағы уақытта облысымыздың барлық аудандарын аралап шықпақ.
Театр – халықтың рухани қазынасы. Әр қойылым – өткеннің өнегесін, бүгіннің болмысын, ертеңнің үмітін айқындайтын айна. «Еділ мен Жайық» мюзиклі – өнердің осындай құдіретін тағы бір мәрте дәлелдеген туынды болды. Көрерменнің ыстық ықыласына бөленген жас әртістердің шабытты ойыны, сахнаның әсем безендірілуі мен әсерлі әуендер жұртшылықтың жадында ұзақ сақталары сөзсіз. Жаңа сахнаның шымылдығын түрген бұл ерекше кеш жылыойлықтар үшін үлкен рухани мереке, мәдени өмірдің жаңа белесі болды. Театр өнерін сүйген жүрек қашанда асқақ, ал сахнаның шамы сөнбесе, руханияттың шамшырағы да мәңгі жарқырай бермек.
Е.АХМЕТКӘРІМОВ
