Бүгін этнос өкілдерінің қарашаңырағы, рухани әрі мәдени орталығы саналатын Атырау қаласындағы Достық үйінде Қазақстан Республикасының Тәуелсіздігіне арналған мерекелік мәдени кеш ұйымдастырылды. Аталған басқосу елдегі ұлтаралық келісім мен өзара сыйластықты нығайтуға, Тәуелсіздіктің тарихи маңызын дәріптеуге арналды.
Мерекелік кеш қазақ би өнерінің көркем үлгісі — «Қараторғай» биімен ашылды. Бұл биді «Шаттық» би ансамблі орындап, жетекшісі Исатай Елеусінов көрермен ықыласына бөленді. Одан кейін үлкен топтың орындауында «Ата толғауы» мен «Балбырауын» күйлері орындалып, ұлттық рух асқақтады.
Бағдарлама барысында «Меруерт» үлгілі би ансамблінің орындауындағы халық биі көрерменге жол тартты. Ансамбль жетекшісі Мерует Сейітова дайындаған бұл нөмір сахнаның сәнін келтіріп, көрермендердің ыстық ықыласына ие болды.
Сонымен қатар домбыра өнерін енді меңгеріп келе жатқан жас өнерпаздар сахнаға шығып, «Айжан қыз», «Тойбастар», «Домбыра күйі», «Айналайын, мама», «Тепеңкөк» шығармаларын орындады.
Жиын барысында 1986 жылғы Желтоқсан оқиғасына ерекше назар аударылып, «Жолашар» филиал топтарының орындауында «Адай», «Жауға», «Көрғұлы», «Ерке сылқым» күйлері тарту етілді.
Мерекелік кеш соңында марапаттау рәсімі өтіп, іс-шара ұйымдастырушылары — «Алия» этно-мәдени бірлестігінің төрағасы Михаил Щадилов, дүнген этномәдени орталығының облыстық филиалының төрағасы Хаят Жапаров және «Жолашар» қоғамдық қорының жетекшісі Назгүл Хибашева қатысушыларға алғыс білдірді.
Тоғжан ЕРМЕК
Суреттерді түсірген Расул СЕРІКОВ
