Бір отбасы - бір кітап

Ауданның ауылшаруашылығын өркендетуге зор үлес қосқан еңбек ардагері Талап Нұрғазиев түйе түлігінен төл және өнім алудан үш рет облыс, үш рет Жылыой ауданының, екі рет Қызылқоға ауданының чемпионы атанғаны мақтанышпен айтылады. Сондай-ақ, Еңбек Қызыл Ту, Құрмет белгісі ордендері мен бірнеше медаль, төсбелгілерді кеудесіне таққан ол Сәрсенұлы, расында да, осы саланың нағыз майталман маманы болды.

Міне, осы ерен еңбегімен шаруа тінін ширатқан, ауданға танымал азамат, өнегелі отбасының бәйтерегі Талап Нұрғазиев пен оның жұбайы, ауыл шаруашылығының озық қызметкері, 12 баланы өмірге әкелген батыр ана Үміт Жамиғатова туралы жақында «Шұғылалы шаңырақ» атты жаңа кітаптың тұсауы кесілді. Кітапты қаламгер Нұрдаулет Ақназаров жазды.

Аудандық мұражайда өткен кітаптың тұсау кесер шарасына еңбек ардагерлері мен кітап авторы, Талап Нұрғазиевтің жанұясы қатысты. Алдымен кейіпкерлер туралы бейнебаян көрсетілді. Онда Талап Сәрсенұлының өмірі мен еңбек жолы жайлы сыр шертілді. Ал Үміт апаның он қолынан өнер тамған шебер екенін бүкіл аудан біледі. Өздері тұрып жатқан Шоқпартоғай ауылындағы үйінің шарбағында киіз үйі бар. Ол ақбоз үйдің тұрғанына бірнеше жылдың жүзі болды. Іші қонақтан арылған емес. Онда апамыз қазақтың ұлттық қолөнерімен айналысуды әдетке айналдырған. Оның қолынан өрмек тоқу, ши орау, киіз бен текемет басу, көрпе тігу сияқты түрлі дүниелер шықты. 12 перзентті өмірге әкеліп қана қоймай, оларды өсіріп-өндірген, қызын қияға, ұлын ұяға қондырып, бүгінде үлкен әулеттің мәуелі бәйтерегі болып отырған Талап Нұрғазиев пен Үміт Жамиғатованың ғибратты ғұмыры барша жанға үлгі боларлық-ақ.

Жаңа кітаптың қызыл лентасын ауданымызға белгілі азамат Меңке Бердіғалиев кесті. Туынды авторы Нұрдаулет Ақназаров кітапта кейіпкерлердің өсу, өрлеу жолдары, адами келбеті, жанұя бақытына бөлену сырлары баяндалғанын айтып, жалпы шығарманың мақсаты абзал ата мен асыл әженің өмірі мен өнегесін өскелең ұрпаққа үлгі ету екенін жеткізді. «Шұғылалы шаңырақ» кітабын аудандық мұражай директоры Мұрат Қақпанбаевқа табыс етті. Сондай-ақ, аудандық кітапхана қоры да жаңа кітаппен толықты. Шара барысында көпшіліктің құрметіне бөленген Талап Нұрғазиевтің замандастары мен ұрпақтары ол кісі туралы әсерлі әңгіме өрбітіп, тебірене сыр шерте келіп, өңірдің өсіп-өркендеуіне қосқан үлесі туралы сөз қозғап, естен кетпес естеліктерімен бөлісті.

Перизат ТӘЖІ

ФОТОГАЛЕРЕЯ

Біріңғай мемлекеттік байланыс

AQPARATPRINT