Кәсіби жетістіктің кілті

Қазіргі таңда қоғамда жұмысшы мамандықтарына сұраныс артып келеді. Әсіресе өндірістік және техникалық бағыттағы кәсіптер ел экономикасын алға жылжытуда маңызды рөл атқарады. Бүгінде жұмысшы қол еңбегімен шектелмейді. Техникалық, өндірістік, құрылыс, көлік, ауыл шаруашылығы сияқты көптеген салаларда жоғары біліктілік пен технологияны меңгеруі қажет. Жөндеуші (слесарь), дәнекерлеуші, электрик, құрылысшы, машинист, жүргізуші, ауыл шаруашылығы мамандары — осының бәрі елдің күнделікті тіршілігін қамтамасыз етіп отырған жандар.

Жастарды еңбекке баулу, олардың кәсіби бағдарын қалыптастыру мақсатында аудандық Жастар ресурстық орталығының ұйымдастыруымен «Бір күн» айдары өтуде. Бұл айдар аясында түрлі сала мамандары жастармен өз тәжірибелерімен бөліседі.

Ғалымжан Амандықов 1995 жылы Жылыой өңірінде дүниеге келген. 2014 жылы С.Өтебаев атындағы Жылыой мұнай және газ технологиялық колледжін оператор мамандығы бойынша аяқтаған.

- Мұнай-газ саласына көптеген сұраныс болғандықтан осы мамандықты таңдадым. Бұл сала – жауапкершілікті, мұқияттылықты, қауіпсіздік ережелерін қатаң сақтауды талап етеді. Өйткені газбен жұмыс істеу – жоғары қауіп көзі. Сондықтан әрбір әрекет алдын ала жоспарланып, қауіпсіздік шаралары сақталуы қажет. Бұл мамандықта жұмыс істеу үшін, ең алдымен, жауапкершілік керек. Сонымен қатар бұл қызмет тәжірибені де қажет етеді. Тәжірибе болмаса, бұл жұмысты жасау қиынға соғады,- дейді жас маман Ғалымжан.

Ол еңбек жолын осыдан тура он жыл бұрын, 2015 жылы «Жылыойгаз» ЖШС-інен бастаған. Оның айтуынша, алғашқы жұмыс күні-ақ ұжымдастары жылы қарсы алып, бағыт-бағдар беріп, өз тәжірибелерімен бөліскен. - Ұжымға келген сәтте өзімді бөтен сезінген жоқпын. Барлығы көмектесіп, үйретті. Соның арқасында маман ретінде қалыптасып, жетілуіме үлкен жәрдем етті. Сол кісілердің қолдауы мен тәлімінің арқасында үй ішіндегі газ қондырғыларын қамту және жөндеу саласында үздік маман атандым. Бұл – менің осы салада жеткен ең үлкен жетістігімнің бірі,- дейді ол.

Бүгінде Ғалымжан автоматтандырылған басқару жүйелерімен жұмыс істеу бағытын меңгеріп, кәсіби тұрғыдан ізденіс үстінде жүр. Ол болашақта газ саласы бойынша білімін арттырып, шебер маман болуды қалайды.

- Болашақта осы салада білімімді арттырып, шеберлік деңгейге жету – менің арманым. Қазірдің өзінде заманауи технологияларды үйреніп жатырмын. Жас мамандарға айтарым – бұл салада еңбек ету қызықты әрі пайдалы. Әсіресе, өз ісіңе адал болсаң, нәтиже де соған сай болады,- дейді өз ісінің маманы Ғалымжан.

Міне, осылайша ол жастарға өзінің жұмысы туралы айта отырып, техникалық бағыттағы мамандықтардан қорықпауға, керісінше осы салаларда дамуға кеңес береді.

Жас та болса, өз ісінің маманы болып жүрген Ғалымжан Амандықовтың жұмысшы мамандықтарының маңызын, оның артында қаншама тәжірибе мен еңбек жатқанын көрсеткендей. Жұмысшы мамандықтар жылы аясында жас мамандардың өзі секілді жастарға жұмысын кеңінен таныстырып, олар үшін үлкен серпін беретіні сөзсіз.

Жастар ресурстық орталығының «Бір күн» айдары осылайша, болашақ ұрпаққа бағыт-бағдар көрсетіп, еңбекке баулуға, нақты кәсіп таңдауына ықпал етуді мақсат етеді. Ал сол елдің болашағы – білікті мамандардың қолында.

А.ЖҰМАБАЙҰЛЫ

ФОТОГАЛЕРЕЯ

Біріңғай мемлекеттік байланыс

AQPARATPRINT