Таяуда редакцияға Талғат Есенәлиев есімді зейнеткер келді. Ол өзі секілді ауданның бір топ еңбек ардагерімен бірге көгалдандыру жұмысымен айналысады екен. Бұл ретте бастамасына қолдау көрсеткен аудан басшысына да алғысын білдіре келіпті.
- Біздер, бір топ зейнеткер, тарқатып айтар болсам, Құлқара Жұмағалиев, Расул Абдрахманов, Нәсіпқали Сасаев, Хамидолла Қалиев, Асқар Аманқұлов сынды басқа да ардагер азаматтармен ақылдаса келіп, өткен жылдың көктемінен бастап көгалдандыру жұмысын қолға алған едік. Ол үшін Құлсары-Шоқпартоғай тас жолының іргесіндегі жерді таңдап алдық. Сөйтіп ерте көктемнен іске кірісіп, 200-дің үстінде жас шыбық отырғыздық. Айналасын мықтап қоршап, оларды өз күшімізбен баптап, күтімге алдық. Өкінішке қарай, былтырғы тасқын кезінде талдарымызды су шайып кетті. Бірақ алқабымыз суға кетсе де, салымыз суға кеткен жоқ. Кейін бәрін қалпына келтірдік, қазір жас шыбықтар жайқалып өсіп тұр. Енді бізді қинап тұрғаны – суару мәселесі еді,-дейді зейнеткер.
Жақында Талғат Есенәлиев аудан әкімі Жұмабек Қаражановтың қабылдауына жазылып, бұл мәселе жөнінде арнайы барып сөйлесіп, бұйымтайын айтқан. Аудан басшысынан су жинайтын үлкен қазан тауып беруін сұрап, көмектесуге ұсыныс жасаған екен.
- Мың болғыр, айтқан өтінішімді екі етпеді. Ұзындығы 16 метр болатын диаметрі мыңдық қазан тауып берді. Шыңтас, Мырзағұл есімді дәнекерлеуші жігіттер тұрбаны кесіп, бөлшектеп, дәнекерлеп, жүк көлікке тиеп, тасымалдап, біздің тал отырғызған алқапқа жеткізіп, орнатып берді. Қазір жоғарыдағы өзім қатарлы зейнеткерлерге Асқар Сарбасов, Нұрлан Сағынбаев, Хамит Қосаров, Болат Жұмақұлов секілді ардагер азаматтар да қосылып, талдарымызды алаңсыз баптап, өлкемізді көгалдандыруға өз үлесімізді қосып жатырмыз,-деген ардагер зейнеткерлердің өтінішін аяқсыз қалдырмаған аудан әкіміне «Кең Жылой» газеті арқылы алғысын білдіруді жөн көріпті.
- Ардагер азаматтардың бастамасын қызу қолдап, сұраған затымызды көп кешіктірмей тауып, оны егістік алқабына орнатқызып берген Жұмабек Қаражановқа барша зейнеткерлер атынан алғысымызды білдіреміз. Қазақта «Сыйласаңдар кәріңді, жарылқаймын бәріңді» деген екен. Үлкен кісінің өтінішін аяқсыз қалдырмаған аудан әкіміне ризамыз, деніне саулық, алға қарай да еңбегіне толағай табыс тілейміз,-дейді зейнеткер Талғат Есенәлиев. Сөз соңында оқырманымыз көгалдандыру ауқымын кеңейту мақсатындағы өзінің ойын да білдіре кетті.
- Жылда мектеп бітіргеніне 20,30,40, тіпті 50 жылдығын тойлап жатқан әр жылғы түлектерді де ортақ іске атсалысуға шақырамыз. Олар, әрине, мектептің айналасына тал отырғызып жатады. Оны құптаймыз. Бірақ олардың көпшілігі күтімсіздіктен тамыр жайып кете алмайды. Сондықтан біздің алқапқа келіп ескерткішке тал отырғызса деген ұсынысым бар. Жас шыбықтарды өзіміз баптап, күтіп, күнбе-күн қадағалап тұрамыз,-дейді Талғат Есенәлиев.
Иә, қазақтың «Атадан мал қалғанша, тал қалсын» деген қанатты сөзі осы кісілерге қаратып айтылса керек. Еңбек ардагерлерінің өлшеусіз еңбегі еліміздің ертеңі – жастардың келешегіне, табиғатқа құйылып жатқан инвестиция десе де болғандай. Ендеше, қазыналы қариялардың игі бастамасын көп болып неге қолдамасқа?!
Е.ҚОШАҚАНОВ
