Әлемдегі ең ардақты да қиын мамандықтың бірі – дәрігерлік. Нағыз тәжірибелі де білікті сандаған дәрігерлер науқасты дертінен айықтырып, аяғына тік тұрғызады.
Ақ халатты абзал жандар адамзатты ажалдан арашалаушы періштелер сияқты. Басымыз ауырып, басқа да ағзаларымыз сыр берсе дәрігерлердің көмегіне жүгінетініміз анық.
Қазіргі таңда жасы үлкен тәжірибелі дәрігерлермен иық тіресіп жұмыс істеп келе жатқан жас маман дәрігерлер мен орта буын медицина қызметкерлері де бар. Олар ұдайы білімдерін жетілдіріп, практика сыныптарынан өтіп, өз туған өлкесінде қалтқысыз қызмет етуде. Олардың арасында жас мейірбикелердің бірі Парахат Байниязова да бар. Ол 2011 жылы Ақтау қаласындағы «Мейірбике» медициналық колледжіне мейірбике ісі мамандығы бойынша оқуға түседі. Оқуын жақсы аяқтаған соң, аудандық ауруханаға жұмысқа орналасады. Жас маман көп жылдар бойы ауруханада қызмет етіп келе жатқан дәрігерлердің қасында жүріп, екпе егіп, науқастардың дертіне дауа, жанына шипа болады.
-Мектеп оқып жүргенде-ақ мейірбике боламын деп алдыма мақсат қоя білдім. Мамандығым өзіме ұнайды. Жинаған білімім мен тәжірибем арқылы ауданымыздағы науқас жандарға шапағатым тисе, мен үшін өте қуантарлық жағдай,- дейді мейірбике Парахат.
Сонымен қатар, ол бір орында тұрақтап қалмай, біліктілігін арттыру үшін 2019 жылы Атырау қаласындағы «Аман-саулық» емханасында да еңбек етті. Қазіргі таңда жас мейірбике ауданымыздағы «Олимп» клиникалық-диагностикалық зертханасында науқастарға қызмет етуде. Аталған клиникалық-диагностикалық зертханада тапсырылған қан талдауларының нәтижесі жылдам шығады және білікті мамандармен сапалы қызмет көрсетуде.
Медицина саласының мамандары қандайма құрметке лайық. Сөйте тұра елімізде дәрігерлер жетіспейтіні де ащы шындық. Әсіресе, осындай тәжірибелі жас мейірбикелер медицина саласында қашан да керек-ақ. Өйткені олар күн демей, түн демей дамылсыз науқастарға көмек қолын созады. Кейде түнгі кезекшілікте ауруханаларда ұйқы көрмейтін мезгілдері жиі. Оларға құрмет көрсету – əрбіріміздің азаматтық борышымыз.
А.ЖҰМАБАЙҰЛЫ
