Жақында аудандық орталық аурухананың қабылдау бөліміне тұрмыстық жағдайда жарақат алған науқас келіп түсіп, ақ халатты абзал жандардың көмегіне жүгінеді. Науқастың айтуынша, оң жақ иығы мен жамбасында ауырсыну бар. Дәрігер-травматологтар жүргізген тексерулер мен клиникалық зерттеулер нәтижесінде науқасқа «Күрделі жарақат. Сол жақ бұғананың акромиалды ұшының жабық сынуы. Оң жақ жамбас сүйегі мойнының жабық субкапитальды сынуы» деген диагноз қойылады. Оған шұғыл түрде ота жасау қажет екені белгілі болды. Бұған дейін де күрделі оталар жасап, науқас жандардың алғысын арқалаған ақ халатты абзал жандар нар тәуекелге бел буды. Осылайша заманауи талаптарға жауап беретін жаңа медициналық құрал-жабдықтармен жарақтанған аудандық орталық жаңа ауруханада тағы да алғаш рет «Оң жақ жамбас сүйегінің тоталды эндопротезі» отасы жүзеге асты.
Бұл күрделі операцияны Атырау облысының бас травматологы Б.Күлниязов пен аудандық орталық ауруханасының травматология бөлімінің меңгерушісі Ж.Байзұллин бірге жасап шықты. Әрине, күрделі ота заманауи медициналық жабдықтарды және дәрігерлердің жоғары кәсіби деңгейін талап етті. Ақ халатты абзал жандар сол үрдістен шыға білді. Сөйтіп бұл да өңірде тұңғыш рет сәтті жасалған күрделі оталардың біріне айналды. Қазіргі уақытта науқастың жағдайы тұрақты, дәрігерлердің жіті бақылауында.
П.ТӘЖІ
