Жасыратыны жоқ, жерлестеріміз қатты сырқаттанса немесе ауыр ота жасату керек болса, міндетті түрде Ақтөбе, Астана, Алматы қалаларындағы дәрігерлердің көмегіне жүгінеді. Әрине, үлкен мегаполистердегі білікті дәрігерлерге қаралып, өмірі мен денсаулығын сеніп тапсырған дұрыс болар. Бірақ ондай ақ халатты абзал жандар өзіміздің Жылыой өңірінде де бар екенін біле бермейді.
Расында да «Теңізшевройл» компаниясының қаржылай қолдауымен жаңа аудандық орталық аурухана пайдалануға беріліп, жаңа медициналық құрал-жабдықтармен қамтылғалы жергілікті емдеу мекемесінің қызметіне қан жүгірді. Бұл ретте орталық аурухана директоры Асулан Абдрахмановтың ұйтқы болуымен ауданға білікті дәрігерлер де ағылып келе бастады. Онсыз жаңа аурухана ішіндегі толып тұрған жаңа жабдықтарды жұмысқа қосу мүмкін емес те еді. Соның арқасында осыған дейін ауданда бірнеше күрделі оталар жасалып, аудан дәрігерлеріне деген жергілікті халықтың сенімі нығая түсті. Сөзімізді таяуда тағы да жасалған дәл осындай отаның сәтті шығуы айғақтай түседі.
Иә, жақында аудандық орталық ауруханаға 59 жастағы науқас L1 омыртқасының компрессионды екі жақты сынуымен ауруханаға түсті. МРТ және КТ тексерулерінен кейін науқасқа омыртқа жарығын пункциялық цементтеу, вертебропластика отасын жасау жөнінде шұғыл шешім қабылданды. Отаны Атырау облысының штаттан тыс бас нейрохирургы Еркін Ербөлеков, аудандық орталық аурухананың травматология-ортопедия бөлімшесінің меңгерушісі Жақия Байзуллин сәтті жасап шықты.
Бұл Құлсары қаласында жасалған алғашқы нейрохирургиялық ота еді. Сондықтан оның қалай жүргізілгенін нақты білу үшін аудандық орталық аурухананың травматолог-ортопед дәрігері Әбілхайыр Ізімовке хабарласқан едік.
Дәрігердің айтуынша, 1966 жылы туған науқасқа жасалған ота сағат 13:00-де басталып, жарты сағатқа созылып, сәтті аяқталған екен. Отаның негізгі мақсаты: L1 омыртқасының компрессиялық екі жақты сынуымен ауруханаға түскен науқастың ауруынан айығып, қайтадан еркін қозғалуына, яғни аяққа тез тұрып кетуіне көмектесу. Оның сөзінше, қазіргі таңда науқастың жағдайы жақсы. Бірнеше күннен кейін оны аяққа тұрғызып, өз бетімен жүріп-тұруына мүмкіндік туады. Бұл Құлсарыдай шағын шаһар үшін үлкен жетістіктің бірі.
Аудан көлемінде алғаш рет нейрохирургиялық отаның сәтті жасалуы – жергілікті медицинаның дамып келе жатқанын көрсетеді. Алдағы уақытта да мұндай жоғары технологиялы операциялар ауданда жиі жасалатынына сенім мол. Бұл ретте 59 жастағы науқастың тезірек сауығып, аяққа тұрып кетуіне ақ халатты абзал жандардың сіңірген еңбегі орасан.
Әйгерім Ғалымжан
