Жақында қаладағы ІІІ ықшамауданда гидромассаж орталығының ашылу салтанаты өтті. Оның негізін қалаушы - Миригүл Қожабекова, массаж саласында жүргеніне үш жыл болған. Бастапқыда үйден жасап бастаған ол кейін Алматы қаласынан массаж курсын оқып, кәсібін шыңдады. «Бастау бизнес» жобасымен де білімін шыңдап, сол арқылы грант ұтып алды. Соның арққасында осы орталықты ашуға қол жеткізді. Салтанатты сәтте сөз алған М. Қожабекова:
-Негізі бет массажын жас кезімнен жасаймын. Оған деген кызығушылығым бөлек. Ал балаларға арналған массажды кішкентай кызыма бастап жасап, меңгердім. Басты мақсатым – халықтың алғысын алып, ауырған жанға шипасын тигізу. Массаж жалпы адам денсаулығына өте пайдалы терапия, - дейді Миригүл.
Құттықтау сөз кезегін алған емхана дәрігері, қоғамдық кеңес мүшесі Бақытгүл Өтегенова:
-Бұл жоба бойынша 20 адам оқып, бітіріп шықты. Соның ішінде массаж саласы аудан үшін өте пайдалы. Себебі жүйке жүйесіне зақым келген, аутизм сияқты аурулар көбейген уақытта массаж оның басты емі болып саналады. Сондықтан бұл бағыттағы басталған кәсіп алдағы уақытта өз нәтижесін беретініне сенемін. Жұмысыңызға сәттілік тілеймін! - деді.
Орталықтың алқызыл лентасын қиылып, келген қонақтар гидромассаж орталығының қызметімен танысып шықты. Сөз арасында Миригүлдің алдағы уақытта орталықты кеңейту жоспарының бар екенін де білдік. Оны отбасы да қолдап отыр.
-Сол кезде 4 жастан 12 жасқа дейінгі балаларға ванналар алынады. Онда да арнайы массаж түрлері жасалады. Жалпы болашақта жоспарым мен жасалатын жұмыстар көп, - дейді орталық басшысы.
Әрине, осындай кәсіп түрлері қаламызда көптеп ашылып, көбейе түссе, нұр үстіне нұр болары сөзсіз. Өйткені гидромассаж адам денсаулығына өте пайдалы. Бұл әсіресе «бірінші байлығы» жоққа тән жылыойлықтар үшін аса қажетті емнің бір түрі.
Жұмабике Шаңқанова
