Бүгінгі күні елімізде қызылша ауруының эпидахуалы күрделі. Аудандағы ауру көрсеткіштері де алаңдатарлық. Осыған орай аудандық орталық емханада жиын өтті. Жиынға аудан әкімінің орынбасары Г.Айшуақова, аудандық бас санитар дәрігер Т.Хабибуллин мен аудандық орталық аурухананың бас дәрігері А.Абдрахманов және медицина қызметкерлері қатысты.
Жыл басынан бері қызылша инфекциясын жұқтырған 319 науқас тіркеліпті. Олардың басым бөлігі – балалар. Жиында қызылша ауруының алдын алу жұмыстарының барысы, вакцинациялау көрсеткіштері туралы айтылып, екпеден бас тартушылармен тиімді жұмыс жасау әдістері, проблемалық мәселелер бойынша тиісті ұсыныстар қаралды.
-Қазірдің өзінде қызылша ауруының көбеюіне байланысты жаппай вакцинациялау жүріп жатыр. Тұрғындар екпе салдыру үшін өзінің учаскелік дәрігеріне немесе орталық емханаға хабарласуына болады,-дейді бас дәрігер.
Бұл ауруға қарсы екпе алған 1 жастағы балалар 94,1% болса, 6 жастағы балаларды вакцинациялау 99% пайызға орындалыпты.
П.Қизатова
