Қозғалыссыз тіршілік жоқ. Қозғалыстың жеткілікті болуы ағзаның тыныс алуын, қан айналымын жақсартып, оның мүшелерінің оттегі мен коректік заттармен жабдықталуын тәртіпке келтіріп, жақсы жұмыс істеуін қамтамасыз етеді. Дұрыс зат алмасу, үйлесімді өсу, ептілік пен шыдамдылық, тіпті ақыл- ойдың дамуы осыған байланысты.
Гимнастикамен, жазғы және қысқы спорт ойындарымен үнемі және жүйелі түрде айналысқан адамдардың дене жаттығуларымен айналыспаған құрдастарына қарағанда денсаулығы күшті болатыны белгілі.Спорттың қоғамға жат қылықтармен күресуге көмектесетіндігі, өзара көмек және ұжымдық сезімді қалыптастырып, белсенді өмірлік көзқарас пен жоғары адамгершілік қасиеттерге тәрбиелейтіндігі даусыз. Дене шынықтырумен айналысуға тек дене тәрбиесімен айналысып, спорт секциясындағы сабақтарға қатынасу ғана емес, дұрыс ұйымдастырылған күн тәртібі, дұрыс тамақтану, оқу, еңбек және демалу ережелерін дұрыс сақтай білу де жатады. Таңертеңгілік гимнастика адамның ұйқылы-ояу жағдайынан көтеріңкі көңіл-күйге тез ауысуына көмектеседі, жұмысқа қабілеттілігін арттырады. Таңертеңгілік бой жазу шынығулары қозғалыс-тірек аппаратының нығаюына, буындардың қозғалмалылығын арттыруға, жалпақтабандылық пен мүсіндегі ақауларды түзетуге мүмкіндік туғызады. Сондықтан шынығумен шұғылданбай денсаулықты жақсарту мүмкін емес. Өйткені, ағза табиғатта болып жатқан өзгерістерге дайын болуы керек. Табиғатта қолайсыз, жаман ауа райы жоқ. Тек ағзамыздың дәрежесінің төмендігі ғана қиыншылықтар туғызады. Күнделікті таңертеңгілік беті-қолды жуыну кезінде мойын мен аяқты салқын сумен шайып отырудың өзі ағзаны шынықтырады. Дене жаттығулары пайдалы болу үшін денеге түсетін күш адамның жасына, салмағына, бойына лайық болуы қажет, дене қимылы адамға тек қуаныш сыйлауы керек және дене шынықтырумен тұрақты түрде айналысу шарт. Салауатты өмір салтын сақтап, денсаулықты үнемі нығайта берейік.
А.Бекмағамбетова, №4 Атырау қалалық емхананың салауатты өмір салтына жауапты мейірбикесі
