Өткен айдың аяғында Атырау қаласындағы мал базарынан өлген ірі қарадан сібір жарасы анықталғалы аудан аумағында да қауіпсіздік шаралары күшейтілді. Өйткені облыс орталығына көршілес Батыс Қазақстан облысы, Жанқала ауданы, Жаңақазан ауылынан әкелінген ауру сиыр малының Құлсарыға де келіп қалуы ғажап емес. Біз осыған орай аудандық ветеринариялық стансасының бастығы Нұрболат Өрбісіновке жолығып, аудандағы ахуал жайлы сұраған едік.
- Жағдайға байланысты стансаның ветеринариялық мамандарымен шұғыл түрде жиналыс өткізіліп, нақты тапсырмалар берілді. Атап айтқанда, барлық сатылымға жіберілетін жануарларды алдын ала клиникалық қараудан өткізіп, ветеринариялық анықтама беру (құлақ сырғасының бар болуы), күнделікті барлық төрт түлік малының қозғалысын (округ аумағына кіргізілген, шығарылған жануарлардың карантиндік шаралардан өткізілуі) қатаң бақылауда ұстауды және халық арасында түсінік жұмыстарын жүргізуді, жануарлар арасында ауруға қарсы күдікті жағдай байқалса, дереу жергілікті ветеринариялық дәрігерге хабар беру тапсырылды.
Қазіргі уақытта аудан көлемінде эпизоотиялық ахуал тұрақты. Соңғы қарашаның 27-сіндегі ақпар бойынша ауданда 21 826 бас мүйізді ірі қара, 99 253 қой-ешкі, 22 724 жылқы, 12 079 бас түйе бар. 2024 жылға арналған жануарлардың аса қауіпті ауруларының профилактикасы жүргізілген ветеринариялық іс-шаралар жоспарына сәйкес аудан көлемінде сібір жарасы ауруына қарсы екпе жұмыстары жүзеге асырылды. Нақтырақ айтқанда, жоспарланған 23 630 бас мүйізді ірі қара, 73 800 бас ұсақ мал, 5000 жылқы, 9800 бас түйе толықтай егіліп отыр,-деді ол.
Өз тілшімізден
