Дәрігер болу жай ғана кәсіп емес, ол – жүректің қалауымен таңдалатын өмірлік миссия. Осындай мәртебелі мамандықты меңгерген абзал жанның бірі – Ардақ Орынбайқызы.
Ардақ Орынбайқызы - 1967 жылы 5 мамырда Шоқпартоғай ауылында дүниеге келген. Ел ішінде қадірлі, еңбекқор отбасында тәрбиеленген ол бала күнінен дәрігер болуды армандады. Алғашында 1977 жылы Жданов атындағы орта мектептің табалдырығын аттап, кейін ата-анасының қызмет бабына байланысты Тұрғызба ауылына қоныс аударады. Сол жердегі Мұхтар Әуезов атындағы №4 орта мектепті 1984 жылы «өте жақсы» деген бағамен аяқтап шығады. Жастайынан өз мақсатына берік болған жас түлек бала арманының жетегінде Ақтөбе қаласындағы Мемлекеттік медициналық институтының «Емдеу» факультетіне оқуға түседі. Жоғары оқу орнын 1990 жылы табысты тәмамдап, туған ауылына оралып, еңбек жолын Тұрғызба ауылдық амбулаториясында терапевт-дәрігер болып бастайды.
– Ол жылдары ауылда 3000-ға жуық тұрғын болатын. Қай кезде болсын халыққа үздіксіз қызмет көрсету басты міндетіміз еді. Жұмыс уақытына қарамастан, шалғайдағы 50-150 шақырым жердегі малшы ауылдарына барып, екпе жүргізіп, жұқпалы аурулардың алдын алуға күш салдық, – деп еске алады Ардақ Орынбайқызы.
Заты нәзік жан болса да, қызмет барысында ер-азаматтармен иық тірестіріп, ешбір қиындықтан тайсалмаған. Тынымсыз еңбегінің арқасында халықтың денсаулығын жақсарту жолында аянбай тер төгіп, обаға қарсы екпелер жүргізіп, флюорографиялық тексерістер ұйымдастырып, туберкулездің алдын алуға бағытталған жұмыстарды абыроймен атқарды.
1992 жылы Ақкиізтоғай ауылына келін болып түскен Ардақ Орынбайқызы дәрігерлік қызметін сол жерде жалғастырады. Ауылдық ауруханаға терапевт болып орналасып, 25 төсектік стационарлық емдеу мекемесінде еңбек етеді. Ол кезеңде ауыл халқы 3000 адамға жуықтаған. Ауылға қарасты кең аймақтағы малшы ауылдардың тұрғындары да осы ауруханаға келіп қаралатын. Жас дәрігер үшін бұл – үлкен сынақ болса да, сүрінбей өтіп, науқастардың дертіне шипа, жүзіне күлкі сыйлады.
– Жолдасым да дәрігер. Екеуміз бір күні, бір уақытта құжат тапсырып, Ақтөбе қаласындағы институтқа бірге түстік. Отбасымызда 4 бала дүниеге келді. Олардың екеуі дәрігерлік жұмыстың қиындығына қарамастан, біреуі психология мамандығын, екіншісі статистика кабинетіндегі программист мамандығын игеріп шықты. Одан кейінгі ер бала мұнай-газ колледжін бітірді. Ал кенже қызым мұғалім мамандығын таңдап, қазір еңбекке араласты,-дейді ол өз отбасы жайлы. Бұл ретте маусым айының үшінші жексенбісі белгіленген Медицина қызметкерлері күнімен барша жылыойлық ақ халатты жандарды құттықтап, еңбектеріне табыс, отбасыларына амандық тіледі.
Денсаулық сақтау саласында қызмет еткен жылдары Ардақ Орынбайқызы үнемі өзінің білімін көтеріп, әр бес жыл сайын арнайы біліктілік курстарынан өтіп, жаңа ем-дом шараларын қолданып отырды. 2008 жылы 6 айлық қайта даярлау курсынан өтіп, өз білімін жетілдірді де, сол жылдан бастап Ақкиізтоғай ауылында жалпы тәжірибелік дәрігер қызметін мүлтіксіз атқарып келеді. Ал 2013 жылы Ақтөбе қаласынан білім жетілдіру кафедрасының толық курсынан өтіп, мамандығына деген махаббатын тағы бір дәлелдеді. Бүгінде «дәрігер боламын, адамдарды емдеймін» деген бала күнгі арманы мен Гиппократ антына адал ақ халатты абзал жан адам жанын аман сақтау жолында үнемі ізденісте болды. Оған білікті маманның 1992 жылдан бастап 30 жыл еңбек ете жүріп алған жетістіктері айғақ. Өңірдегі денсаулық сақтау саласын дамытуға қосқан елеулі үлесі мен халыққа сапалы медициналық көмек көрсетудегі жоғары кәсіби шеберлігі үшін 2002 жылы облыс әкімінің Құрмет грамотасын, 2012 жылы Денсаулық сақтау министрлігінің Құрмет грамотасы мен денсаулық сақтау басқармасының Алғыс хатын, 2020 жылы «Алтын дәрігер» төсбелгісін иеленді. Облыстық, аудандық денсаулық сақтау басқармасы мен бөлімдері, Денсаулық сақтау министрлігінің көптеген Құрмет грамотасы мен Алғыс хаттарымен де марапатталды. Ал 2023 жылы «Денсаулық сақтау саласына қосқан еңбегі үшін» медалімен марапатталды.
Дәрігерлік қызметті тек мамандық деп емес, өмірлік ұстаным деп қабылдаған Ардақ Орынбайқызы бүгінде көпжылдық тәжірибесімен, сабырлы болмысымен, жүректен шыққан жылы лебізімен ел алғысына бөленіп жүрген ақ халатты абзал жан. Жарты ғасырға жуық ғибратты ғұмырын ауданның денсаулық сақтау саласына сарп етіп, соның ішінде ауыл халқының денсаулығын тынбай күзетіп келе жатқан ол бүгінде тек мықты дәрігер ғана емес, өнегелі ана, үлгілі жар, ұрпағына ұлағатты тәрбие беріп отырған асыл әже. Ең бастысы - бала күнгі арманының асқарына шығып, сол мақсат үдесінен шыға білген қайсар жан. Оның жүрегі дәрігер ретінде адам өміріне араша болуға деген шынайы махаббатпен соғады.
Д.ІЗБАСАРОВА
