АТЫРАУДА ӨТКЕН ТӘУЛІКТЕ 84 АДАМНАН КОРНАВИРУС АНЫҚТАЛДЫ
524 адам Сovid-19 және пневмониядан инфекциялық стационарларда ем алуда, деп хабарлайды Атырау облысы Денсаулық сақтау басқармасының баспасөз қызметі.
Соңғы тәулікте Атырау қаласында 68 адам Covid-19 жұқтырса, скрининг нәтижесінде Теңіз кен орнында 5 науқастан қауіпті індет анықталды. Сондай-ақ, Жылыой ауданында 6 тұрғын, Исатай ауданында 1 жағдай, Мақатта 1 адам және Құрманғазы ауданында 3 адамнан коронавирус расталған.
Коронавирустық инфекциясы бар 40 науқаста ауру тиісті белгілермен өтуде. Өткен тәулікте облыста коронавирустан 98 адам емделіп шықты.
Қазіргі уақытта 524 адам үй жағдайында, 176 модульдік ауруханада, 130 №2 облыстық ауруханада, 48 фтизиопульмонологиялық орталықта, 122 аудандық инфекциялық стационарларда ем алуда. Теңіз кен орнындағы инфекциялық стационарда 48 науқас емделуде.
Коронавирустық инфекцияның таралуы бойынша Атырау облысы "қызыл" аймақта қалып отыр.
