Жылыой білім-инновация мектеп-интернатында дарынды жасөспірім балалар білім алады. Бұл оқу ордасында облысымыздың әр аудандарынан келген қабілетті оқушылар одан әрі тереңдетіп оқыту бағдарламасын игереді. Лицейде ғылым-білімнің әр саласы бойынша, атап айтсақ, техникалық және гуманитарлық сала бойынша пәндер және шет тілі жан-жақты оқытылады. Соның ішінде қазақ тілі мен әдебиеті пәні де маңызды орын алады.
Лицейде тек білім беріліп қана қоймай, көптеген танымдық шаралар, белгілі өнер иелерімен, ғалымдармен, ақын-жазушылармен кездесулер жиі өтіп тұрады. Лицей шәкірттері жақында ақын, Қазақстан Жазушылар Одағының мүшесі, Қазақстан Республикасының Мәдениет қайраткері, ҚР Ақпарат саласының үздігі Сәулеш Шәтеновамен кездесті. Рухани-танымдық, әдеби шара «Жырдан сәуле шашқан Сәулеш» деп аталды. Жастар ақын апаларын гүл шоғымен қарсы алды. Кездесуді лицей директорының орынбасары Гүлнұр Мұқанова ашып, келген қонақты таныстырды. Әсерлі шара емін-еркін сұхбаттасу, сырласу сипатында өтті. Алдымен өңірімізге, елімізге белгілі ақынның өмірбаяны мен шығармашылық жолдары туралы бейнебаян көрсетілді.
Бұдан соң ұйымдастырушылар Ербол Құмаров, Алмагүл Қуанған алдын ала дайындаған қазақтың ұлттық салт-дәстүріне қатысты танымдық викториналық сұрақтарға кезек берілді. Ақын Сәулеш Тәжіқызы слайд-тақтадағы ұяшықтарға жасырылған сұрақтарды таңдап, жауап берді. Олар: халқымыздың қонақжайлық, дәстүрі, қолөнер туындылары, ырым-тыйымдар, қару-жарақтар, ұлттық тағам түрлері тәрізді алуан түрлі тақырыптардан құралған. Қаламгер әр сұраққа мүдірмей жауап берді. Қызықты ойыннан соң жастар ортаға шығып, ақын өлеңдерін жатқа оқыды. Бұдан соң сұхбатты жүргізуші мұғалім Мөлдір базарбаева ақынға оның шығармашылығы, өмір жолдарына қатысты сұрақтар қойып, оған кеш қонағы жауап беріп, әсерлі әңгімелер айтты. Жасөспірімдер әдебиетке, бүгінгі қазақ поэзиясына қатысты көптеген құнды мағлұматтар алды. Тәуелсіз еліміздің өткен тарихының қыр-сырларына үңілді.
Сәулеш Тәжіқызы ұзақ жыл «Кең Жылой» газетінде еңбек етті. Ақындық, жазушылық қаламды қаңтарып қойып, газет жұмысының қиын да қызықты бейнетіне белсене кірісіп, бүкіл саналы ғұмырын ақпарат саласына арнағаны да ақиқат. Газетте әдеби қызметкер боп еңбектегі қадамын бастаған ол, бұдан соң тілші, жауапты хатшы, бас редактор қызметтерін атқарды. Өткен жылы аудан айнасы атанған газет 90 жылдық мерейтойын дүркіретіп атап өткені белгілі. Жастар осы қарт басылымның бір ғасырға жуық тарихы мен ауданымыздың рухани саласындағы алар орны, ел дамуына қосқан үлесі туралы біраз сырға қанықты.
Әңгіме тізгіні қайтадан сұлу да сырлы поэзия, сөз өнеріне қарай ойысты. Оқушылар тағы да ақын өлеңдерін оқыды. Қаламгер қазақтың жауһар қазынасы - жыраулық өнері мен классикалық әдебиеті, әлем әдебиеті хақында көптеген әсерлі әңгімелер айтты.
Кездесу кешінің жастарға берер ғибраты мол болды деп айта аламыз. Ақын келешек жас өркендерге тәртіпті де ақылды болу, көп оқып, терең білім алуға ұмтылу, әлемді аралап интеллектуалдық көкжиектерін кеңейтулері, бүгінгі ғаламдық даму үрдісіне ілескен елімізді дамытуға үлес қосулары керектігін айтты.
Лицей ұжымы кездесу қонағы Сәулеш Тәжіқызына уақыт бөліп келгендігі үшін алғыстарын білдірді. Бұдан соң кеш қонағына жазушы Ілияс Есенберлиннің «Алтын орда» трилогиясын сыйға тартты. Ақын өз өлеңдерін оқыған жастарға жыр кітабын ұсынып, қолтаңба жазып берді. Бұдан соң білім-инновация лицейінің жастары мен оқытушылары, қаламгермен естелік суретке түсті. Жастар кездесуден зор әсер алып тарасты.
П.Жауынбай
